ৰাষ্ট্ৰীয় তদন্ত সংস্থাই মুম্বাই বিমানবন্দৰত সন্ত্ৰাসবাদী সংগঠন ISIS-ৰ শ্লীপাৰ চেলৰ দুজন সদস্যক গ্ৰেপ্তাৰ কৰিছে। শনিবাৰে এন আই এ এই গ্ৰেপ্তাৰৰ কথা ৰাজহুৱা কৰে। গ্ৰেপ্তাৰ হোৱা দুজন হৈছে আব্দুল্লা ফৈজ শ্বেইখ (ওৰফে দৈপৰৱালা) আৰু তালহা খান বুলি জানিব পৰা গৈছে শুকুৰবাৰে নিশা জাকাৰ্টাৰ পৰা মুম্বাই বিমানবন্দৰত উপস্থিত হোৱাৰ সময়ত তেওঁলোকক গ্ৰেপ্তাৰ কৰে। এই দুজন দীৰ্ঘদিন ধৰি পলাতক আছিল আৰু পুনেত ইম্প্ৰ’ভাইজড বিস্ফোৰক ডিভাইচ (IED) তৈয়াৰ আৰু পৰীক্ষণৰ সৈতে জড়িত থকাৰ অভিযোগ আছিল।
NIAৰ সূত্ৰ অনুসৰি, ২০২৩ চনৰ এই গোচৰৰ তদন্তৰ সময়ত আব্দুল্লা আৰু তালহা জাকাৰ্টাত আত্মগোপন কৰি আছিল। তেওঁলোকৰ তথ্যৰ বাবে NIAয়ে ৩ লাখ টকাৰ পুৰস্কাৰ ঘোষণা কৰিছিল, আৰু মুম্বাইৰ NIA আদালতে তেওঁলোকৰ বিৰুদ্ধে গ্ৰেপ্তাৰৰ পৰোৱানা জাৰি কৰিছিল বুলি জানিব পৰা গৈছে।
NIAৰ মতে, পুনেত বিস্ফোৰক তৈয়াৰৰ এই ঘটনাত আব্দুল্লা আৰু তালহাৰ উপৰিও ISISৰ শ্লীপাৰ চেলৰ আন আঠজন সদস্য জড়িত আছিল, যিসকলক ইতিমধ্যে গ্ৰেপ্তাৰ কৰা হৈছে। ২০২২-২৩ চনত পুনেত বিস্ফোৰক তৈয়াৰৰ প্ৰশিক্ষণ শিবিৰো অনুষ্ঠিত হৈছিল বুলি জানিব পৰা গৈছে। এই শ্লীপাৰ চেলৰ উদ্দেশ্য আছিল ভাৰতৰ শান্তি আৰু সাম্প্ৰদায়িক সম্প্ৰীতি বিঘ্নিত কৰা। তদন্তকাৰী সংস্থাই জানিবলৈ দিয়ে যে এই কোষটো গোপনে কাম কৰি আছিল আৰু সন্ত্ৰাসবাদী কাৰ্যকলাপৰ পৰিকল্পনা কৰিছিল।
এই গোচৰত আব্দুল্লা, তালহাৰ লগতে স্লিপাৰ সেলৰ মুঠ ১০ জন সদস্যৰ বিৰুদ্ধে অবৈধ কাৰ্যকলাপ প্ৰতিৰোধ আইন (UAPA), অস্ত্ৰ আইন, বিস্ফোৰক পদাৰ্থ আইন, আৰু ভাৰতীয় দণ্ডবিধিৰ বিভিন্ন ধাৰাৰ অধীনত গোচৰ তৰা হৈছে। ইতিমধ্যে আঠজনক গ্ৰেপ্তাৰ কৰাৰ পিছত এইবাৰ বাকী দুজনক গ্ৰেপ্তাৰ কৰে।
