ভাৰতীয় মহাকাশ গৱেষণা সংস্থা চমুকৈ ইছৰোৰ নতুন অভিযান ব্যৰ্থ হৈছে। ইঅ’এছ-০৯ উপগ্ৰহ মহাকাশলৈ প্ৰেৰণ কৰিবলৈ ইছৰোৰ ৰকেটে উৰা মাৰিছিল। কিন্তু ৰকেটে উপগ্ৰহটো মহাকাশলৈ নিক্ষেপ কৰাত ব্যৰ্থ হয়।
ভাৰতীয় মহাকাশ সংস্থাটোৰ বিষয়াসকলে যান্ত্ৰিক সমস্যাৰ বাবে এই অভিযান মাজভাগত বাতিল কৰিবলৈ বাধ্য হয়। ইফালে অভিযান বিফল হোৱাৰ পাছত মহাকাশত ধ্বংস হৈ পৰে ৰকেটখন।
এই তথ্য ভাৰতীয় সংবাদ সংস্থা এএনআইৰ উদ্ধৃতি দি দেওবাৰে (১৮ মে’) এনডিটিভিয়ে এক প্ৰতিবেদনত প্ৰকাশ কৰিছে।
সংবাদ মাধ্যমে জনোৱা মতে, দেওবাৰে স্থানীয় সময় অনুসৰি পুৱা ৫:৫৯ বজাত অন্ধ্ৰ প্ৰদেশৰ শ্ৰীহৰিকোটাৰ সতীশ ধৱন মহাকাশ কেন্দ্ৰৰ পৰা ই অ’ এছ-০৯ কঢ়িয়াই অনা PSLV-C61 মহাকাশযানখনে উৰা মাৰিছিল। উৎক্ষেপণ সফল হয়। কিন্তু তৃতীয় পৰ্যায়ৰ অভিযানৰ সময়ত এটা যান্ত্ৰিক সমস্যা ধৰা পৰিছিল। ফলত বিষয়াসকলে ইয়াক বাতিল কৰিবলৈ বাধ্য হয়।
ইফালে ইছৰোৱে উৎক্ষেপণৰ সময়ৰ পৰাই সমগ্ৰ অভিযানটো লাইভ সম্প্ৰচাৰৰ ব্যৱস্থা কৰিছিল। সংগঠনটোৰ মুৰব্বী ভি নাৰায়ণনে তাতেই স্বীকাৰ কৰে যে এই অভিযান বিফল হৈছে। পাছত ইছৰোৱে ছ’চিয়েল মিডিয়াত এক বিবৃতি প্ৰকাশ কৰি কয় যে, “আজি ১০১ নং অভিযান আৰম্ভ কৰা হ’ল। দ্বিতীয় পৰ্যায়লৈকে পিএছএলভি-চি৬১ স্বাভাৱিক আছিল। কিন্তু তৃতীয় পৰ্যায়ত বিশেষ পৰ্যবেক্ষণৰ বাবে এই অভিযান সম্পূৰ্ণ কৰিব পৰা নগ’ল।”
সংবাদ মাধ্যমৰ বাতৰি অনুসৰি ইছৰোৰ EOS-09 উপগ্ৰহৰ ওজন ১,৬৯৬ কিলোগ্ৰাম। এই কৃত্ৰিম উপগ্ৰহটো ৫২৪ কিলোমিটাৰ (Sun-synchronous polar orbit) কক্ষপথত নিক্ষেপ কৰাৰ কথা আছিল। কিন্তু মিছনৰ তৃতীয় পৰ্যায়ত ব্যৱহৃত মটৰটোত ২০৩ ছেকেণ্ডৰ পাছত যান্ত্ৰিক সমস্যাৰ সৃষ্টি হয়।
ইছৰোৱে ২০১৭ চনৰ পৰা পি এছ এল ভি ৰকেট ব্যৱহাৰ কৰি বিভিন্ন অভিযান চলাই আহিছে।এতিয়ালৈকে এই ৰকেটটো ৬৩টা উৎক্ষেপণত ব্যৱহাৰ কৰা হৈছে। সেই মিছনৰ তিনিটা সম্পূৰ্ণ বিফল হৈছিল। ইছৰোৰ অভিযন্তাসকলে এই সমস্যাৰ কাৰণৰ তদন্ত অব্যাহত ৰাখিছে। ব্যৰ্থতা বিশ্লেষণ সমিতিও গঠন কৰা হৈছে।
ইফালে অভিযান বিফল হোৱাৰ পাছত মহাকাশত ধ্বংস হৈ পৰে ৰকেটখন। ইয়াৰ ধ্বংসাৱশেষ পৃথিৱীত পৰিব। অৱশ্যে সংবাদ মাধ্যমৰ বাতৰিতো দাবী কৰা হৈছে যে ইছৰোই যাতে ইয়াৰ পৰা কোনো বিপদৰ সৃষ্টি নহয় তাৰ প্ৰতি লক্ষ্য ৰাখিছে।
