কেন্দ্ৰীয় ঔদ্যোগিক নিৰাপত্তা বাহিনী চমুকৈ চি আই এছ এফৰ মহিলা উপ-পৰিদৰ্শক গীতা সামোতাই ৮,৮৪৯ মিটাৰ উচ্চতাৰ মাউণ্ট এভাৰেষ্টত সফলতাৰে আৰোহণ কৰি ইতিহাসৰ সৃষ্টি কৰিছে। তেওঁ হৈছে এভাৰেষ্ট জয় কৰা প্ৰথমগৰাকী চিআইএছএফৰ কৰ্মী।
২০২৫ চনৰ ১৯ মে’ত গীতা সামোতাই সফলতাৰে মাউণ্ট এভাৰেষ্ট আৰোহণ কৰে। চি আই এছ এফে ইনষ্টাগ্ৰামত পোষ্ট কৰি গীতা সামোতাক অভিনন্দন জনাইছে।
ৰাজস্থানৰ ছিকাৰ জিলাৰ চক গাঁৱত জন্ম গ্ৰহণ কৰা গীতা সামোতাই ২০১১ চনত চিআইএছএফত যোগদান কৰিছিল।
২০১৫ চনত আউলিৰ ভাৰত-তিব্বত সীমান্ত আৰক্ষী (আই টি বি পি) প্ৰশিক্ষণ প্ৰতিষ্ঠানত ছয় সপ্তাহৰ মৌলিক পৰ্বতাৰোহণৰ পাঠ্যক্ৰমৰ বাবে নিৰ্বাচিত হৈছিল সীমা। তেওঁ উক্ত প্ৰশিক্ষণৰ একমাত্ৰ মহিলা অংশগ্ৰহণকাৰী আছিল।
২০১৭ চনত তেওঁ উন্নত পৰ্বতাৰোহণৰ প্ৰশিক্ষণ সম্পূৰ্ণ কৰে। উন্নত পৰ্বতাৰোহণৰ প্ৰশিক্ষণ সম্পূৰ্ণ কৰা প্ৰথমগৰাকী চিআইএছএফৰ কৰ্মী হিচাপে পৰিগণিত হয়।
উল্লেখ্য যে এভাৰেষ্টৰ লগতে গীতা সামোতাই আন বহু শৃংগ সফলতাৰে আৰোহণ কৰিছে।
চিআইএছএফে প্ৰকাশ কৰা এক প্ৰেছ বিজ্ঞপ্তিত কোৱা হৈছে যে গীতা সামোটাৰ ঐতিহাসিক সফলতাৰ পৰা অনুপ্ৰাণিত হৈ চিআইএছএফে ২০২৬ চনত মাউণ্ট এভাৰেষ্ট বগাবলৈ এটা দল প্ৰেৰণ কৰাৰ পৰিকল্পনা কৰিছে।
