বৃহস্পতিবাৰে বিয়লি এম ভি ভাগীৰথী নামৰ ফেৰীৰ পৰা এজন যাত্ৰীয়ে নিজকে নিঃশেষ কৰি দিয়াৰ উদ্দেশ্যে ব্ৰহ্মপুত্ৰ নদীত জাপ দিয়াৰ খবৰ পোৱা গৈছে।
গুৱাহাটীৰ পৰা উত্তৰ গুৱাহাটীৰ ৰজাদুৱাৰলৈ যোৱা ফেৰীখনত বিয়লি প্ৰায় ৩:২০ বজাত সংঘটিত হয় এই শোকাৱহ ঘটনা।
জানিব পৰা মতে, যাত্ৰীগৰাকী নলবাৰী জিলাৰ দহুদীৰ বাসিন্দা গোলক ৰাজবংশী (৬০) বুলি জানিব পৰা গৈছে।
সূত্ৰৰ পৰা জানিব পৰা মতে, ঘটনাৰ কিছু মুহূৰ্ত পূৰ্বে ৰাজবংশীক শান্ত যেনেই দেখা গৈছিল। ফেৰীৰ ডেকত তেওঁ এৰি থৈ গৈছিল এটা সৰু বাণ্ডিল, য’ত অসমৰ মুখ্যমন্ত্ৰী হিমন্ত বিশ্ব শৰ্মাক উদ্দেশ্যি হাতে লিখা এটা চুইচাইড নোটৰ লগতে তেওঁৰ চেণ্ডেল আৰু নগদ ৩০০ টকা আছিল।
তেওঁৰ মৰ্মস্পৰ্শী চূড়ান্ত বাৰ্তাত ৰাজবংশীয়ে তেওঁৰ কঠোৰ পদক্ষেপৰ কাৰণ হিচাপে শাৰীৰিক অসুস্থতা আৰু আৱেগিক দুৰ্দশাৰ কথা উল্লেখ কৰে। নোটখনত মুখ্যমন্ত্ৰীলৈ আন্তৰিকতাৰে কৰা দুটা আবেদনো সন্নিবিষ্ট কৰা হৈছে।
তেওঁ লিখিছে, ‘শাৰীৰিক অসুস্থতাৰ বাবে মই এই পদক্ষেপ লৈছো।ইয়াৰ বাবে কাকো দোষাৰোপ কৰিব নালাগে।
চিঠিখনত আৰু কোৱা হৈছে, “মাননীয় মুখ্যমন্ত্ৰী মহোদয়ৰ বাবে মোৰ মাত্ৰ দুটা অনুৰোধ আছে। প্ৰথমতে মোৰ একমাত্ৰ পুত্ৰৰ চাকৰি নিশ্চিত কৰক। দ্বিতীয়তে, মোৰ মৃতদেহ বিচাৰিবলৈ এছডিআৰএফ বা এনডিআৰএফক নিৰ্দেশ নিদি মোক নদীৰ বুকুত বিলীন হৈ যাব দিয়ক। ”
ফেৰীখনৰ প্ৰত্যক্ষদৰ্শীসকল হঠাতে হোৱা এই কাণ্ডত স্তম্ভিত হৈ পৰে আৰু ঘটনাৰ আকস্মিকতাৰ বাবে হস্তক্ষেপ কৰিব নোৱাৰিলে।
ইপিনে, কৰ্তৃপক্ষক ততাতয়াকৈ অৱগত কৰা হয় আৰু ৰাজ্যিক দুৰ্যোগ সঁহাৰি বাহিনী (এছডিআৰএফ) আৰু ৰাষ্ট্ৰীয় দুৰ্যোগ সঁহাৰি বাহিনী (এনডিআৰএফ)ৰ অনুসন্ধান আৰু উদ্ধাৰকাৰী দলক দ্ৰুতগতিত ঘটনাস্থলীত নিয়োগ কৰা হয়।
শেহতীয়া খবৰ অনুসৰি গোলোক ৰাজবংশীৰ মৃতদেহৰ অনুসন্ধান অব্যাহত আছে যদিও এতিয়াও সন্ধানহীন হৈ আছে।
