এটা প্ৰশ্ন! প্ৰশ্নটো হ’ল সাংসদ গৌৰৱ গগৈ পাকিস্তানলৈ গৈছিলনে নাই? আৰু যদিহে গৈছিল ক’লৈ গৈছিল আৰু কিয় গৈছিল! এই প্ৰশ্নৰ পোনপটীয়া উত্তৰ দিয়াৰপৰা বিৰত আছে গৌৰৱ গগৈ আৰু ইয়াৰ বিপৰীতে মুখ্যমন্ত্ৰী ড° হিমন্ত বিশ্ব শৰ্মাই গৌৰৱ গগৈৰ পাকিস্তান ভ্ৰমণ সন্দৰ্ভত ইটোৰ পাছত সিটো বিস্ফোৰক অভিযোগ উত্থাপন কৰি গৈছে। ছেপ্টেম্বৰত গৌৰৱ গগৈৰ পাকিস্তান ভ্ৰমণৰ সকলো তথ্য ফাদিল কৰাৰ লগতে এইক্ষেত্ৰত ব্যৱস্থা গ্ৰহণ কৰা হ’ব বুলি মুখ্যমন্ত্ৰীগৰাকীয়ে দাবী কৰিছে। ইয়াৰ বিপৰীতে “ছেপ্তেম্বৰত মুখ্যমন্ত্ৰীৰ মিথ্যাচাৰ ফাদিল হোৱাৰ পিছত বিজেপিত এটা ডাঙৰ ভূমিকম্প হ’ব” বুলি প্ৰতিক্ৰিয়া প্ৰকাশ কৰিছে গৌৰৱ গগৈয়ে।
মুখ্যমন্ত্ৰীৰ দাবী ছেপ্তেম্বৰত তথ্য সহকাৰে ফাদিল হ’ব সাংসদ গৌৰৱ গগৈৰ পাকিস্তান কাণ্ড! কেৱল সেয়াই নহয় জব্দ হ’ব গৌৰৱ গগৈৰ পত্নীৰ পাছপৰ্ট। মুখ্যমন্ত্ৰীৰ মতে সাংসদ গৌৰৱ গগৈ পাকিস্তানৰ যি ঠাইলৈ গৈছিল আৰু যি ধৰণে গৈছিল সেয়া অত্যন্ত ঘৃণনীয় আৰু নিন্দনীয়।
কিন্তু মুখ্যমন্ত্ৰীৰ বিস্ফোৰক অভিযোগৰ প্ৰত্যুত্তৰত গৌৰৱ গগৈয়ে পুনৰ তেওঁ পাকিস্তানলৈ যোৱা নোযোৱা সন্দৰ্ভত স্পষ্ট উত্তৰ নিদি কয় যে বক্সিঙত যেনেদৰে নকআউট পাঞ্চ শেষত দিয়ে, তেনেদৰে এই বিতৰ্কৰ নকআউট পাঞ্চ উত্তৰটো শেষত দিবলৈ তেওঁ ৰৈ আছে। সাংসদ গৌৰৱ গগৈয়ে কয় যে ছেপ্তেম্বৰৰ ১০ তাৰিখে বিজেপিত এটা বৃহৎ ৰাজনৈতিক ভূমিকম্প হ’ব। সেই দিনটোৰ পিছত মুখ্যমন্ত্ৰী ড° হিমন্ত বিশ্ব শৰ্মাই তেওঁৰ মিথ্যাচাৰৰ বাবে ৰাইজৰ ওচৰত ক্ষমা বিচাৰিব লাগিব বুলি দাবী সাংসদ গৌৰৱ গগৈৰ। আনহাতে এই সমগ্ৰ পাকিস্তান বিতৰ্কটোক এখন বিগ বাজেটৰ চিনেমা আখ্যা দি ছেপ্তেম্বৰত ৰিলিজ হোৱাৰ পিছত এই চিনেমাখন ফ্লপ মাৰিব বুলি কটাক্ষ কৰিছে গৌৰৱ গগৈয়ে। সাংসদগৰাকীৰ মতে এই চিনেমাখনৰ নাম হল “হাজাৰ মিছা কথা কোৱা হিমন্ত বিশ্ব শৰ্মা ডাঙৰীয়া”।
মুখ্যমন্ত্ৰীগৰাকীয়ে তেওঁৰ অভিযোগসমূহ মিছা হলে গৌৰৱ গগৈক তেওঁৰ বিৰুদ্ধে গোচৰ ৰুজু কৰিবলৈ আহ্বান জনাইছে। আনহাতে, গৌৰৱ গগৈয়ে তেওঁৰ বিৰুদ্ধে পাকিস্তান বিতৰ্ক সন্দৰ্ভত মুখ্যমন্ত্ৰীগৰাকীক শীঘ্ৰে প্ৰমাণসমূহ ৰাজহুৱা কৰিবলৈ দাবী জনাইছে ।মুঠৰ ওপৰত অসমৰ ৰাজনীতিত এতিয়া গৌৰৱ গগৈৰ পাকিস্তান ভ্ৰমণ এটা বৃহৎ প্ৰশ্ন হৈ পৰিছে।
