যোৱা এবছৰত বেংকৰ জালিয়াতিৰ পৰিমাণ প্ৰায় ১৯৪ শতাংশ বৃদ্ধি পাইছে। দেশৰ ৰাষ্ট্ৰীয় বেংক, ৰিজাৰ্ভ বেংকে প্ৰকাশ কৰিছে চকু কপালত তুলিব পৰা এই তথ্য। আৰ বি আইৰ তথ্য অনুসৰি বিগত বিত্তীয় বৰ্ষত বেংকৰ জালিয়াতিৰ মূল্য ১২,২৩০ কোটি টকা। ২০২৫ চনৰ মাৰ্চ মাহত সমাপ্ত হোৱা বিত্তীয় বৰ্ষত ইয়াৰ পৰিমাণ তিনিগুণ বৃদ্ধি পাই ৩৬,০১৪ কোটি টকা হৈছে।
যোৱা বছৰৰ তুলনাত এই বছৰ আৰু বহু বেছি জালিয়াতিৰ অভিযোগ দাখিল হোৱাৰ বাবেই মুঠ পৰিসংখ্যা বৃদ্ধি পোৱা বুলি অনুমান কৰা হৈছে। যদিও প্ৰৱঞ্চনাৰ টকাৰ সংখ্যা বৃদ্ধি পাইছে, তথাপিও কমিছে প্ৰৱঞ্চনাৰ সংখ্যা। ২০২৩-২৪ চনত ৩৬,০৬০ টা অভিযোগ আছিল আৰু ২০২৪-২৫ চনত সেই সংখ্যা ২৩,৯৫৩ লৈ হ্ৰাস পাইছে।
এই বছৰ সংঘটিত হোৱা ৩৬,০১৪ কোটি টকাৰ বেংক জালিয়াতিৰ ভিতৰত ২৫,৬৬৭ কোটি টকা চৰকাৰী বেংকত সংঘটিত হৈছে। যোৱা বছৰ চৰকাৰী বেংকত জালিয়াতিৰ পৰিসংখ্যা আছিল ৯,২৫৪ কোটি টকা। ৰাজহুৱা আৰু ব্যক্তিগত দুয়োটা বেংকতে যোৱা বছৰৰ তুলনাত প্ৰৱঞ্চনাৰ টকাৰ সংখ্যা হ্ৰাস পাইছে যদিও প্ৰৱঞ্চনাৰ পৰিমাণ যথেষ্ট বৃদ্ধি পাইছে।
দেশৰ ব্যক্তিগত বেংকত সংঘটিত প্ৰৱঞ্চনাৰ মুঠ পৰিমাণ ২৫,৬৬৭ কোটি টকা। ২০২৪ চনৰ বিত্তীয় বৰ্ষত এই সংখ্যা আছিল ৯,২৫৪ কোটি টকা। ব্যক্তিগত বেংকতো প্ৰৱঞ্চনাৰ সংখ্যা ২৪,২০৭ৰ পৰা ১৪,২৩৩লৈ হ্ৰাস পাইছে। আৰ বি আইয়ে জনোৱা মতে, বেংকৰ অধিকাংশ জালিয়াতি ডিজিটেল পেমেণ্টৰ সৈতে জড়িত। অৰ্থাৎ কাৰ্ড বা ইণ্টাৰনেটৰ জালিয়াতিৰ সংখ্যা বেছি। ইয়াৰ লগতে ঋণৰ জালিয়াতিও চলি আছে। ব্যক্তিগত বেংকত হোৱা মুঠ জালিয়াতিৰ অধিকাংশই ডিজিটেল পেমেণ্টৰ জালিয়াতি। আনহাতে ৰাজহুৱা বেংকত প্ৰৱঞ্চনাৰ এটা বৃহৎ অংশ ঋণৰ জালিয়াতি।
