এয়াৰ ইণ্ডিয়া টাটা গ্ৰুপৰ দ্বাৰা পৰিচালিত। সেই এয়াৰ ইণ্ডিয়াৰ বিমান আহমেদাবাদত দুৰ্ঘটনাগ্ৰস্ত হৈছে। এইবাৰ সেই টাটা গ্ৰুপৰ পৰা দিয়া হৈছে এক বিশেষ বাৰ্তা।
এক্স বাৰ্তাত টাটা গ্ৰুপে কয়, ‘এয়াৰ ইণ্ডিয়া ফ্লাইট ১৭১ত সংঘটিত হোৱা দুৰ্ঘটনাটোত আমি মৰ্মাহত। এই সময়ত এই দুখ প্ৰকাশ কৰিবলৈ কোনো ভাষা নাই। মৃত্যু হোৱা সকলৰ পৰিয়ালৰ লগত আমি আছো। আহতসকলৰ বাবে আমি প্ৰাৰ্থনা কৰিছো।‘
‘টাটা গ্ৰুপে মৃতকৰ পৰিয়ালক ১ কোটি টকা দিব। আহত হোৱা সকলৰ বাবে আমি সকলো চিকিৎসাৰ ব্যৱস্থা কৰিম। আমি নিশ্চিত কৰিছো যে তেওঁলোকৰ বাবে সকলো চিকিৎসা ব্যৱস্থা কৰা হ’ব। ইয়াৰ লগতে আমি বি জে মেডিকেলৰ বাবে হোষ্টেল নিৰ্মাণত সহায় কৰিম।’
টাটা সন্সৰ অধ্যক্ষ এন চন্দ্ৰশেক্ৰনে এক্স বাৰ্তাযোগে কয়, ‘আমি আক্ৰান্ত লোকসকলৰ লগত আছো।’
আহমেদাবাদ বিমানবন্দৰৰ পৰা উৰণৰ পিছত দুৰ্ঘটনাগ্ৰস্ত হয় বিমানখন। বিমানখনত অগ্নিকাণ্ড সংঘটিত হয়। বিমানখন সম্পূৰ্ণৰূপে ধ্বংস হয়। চিকিৎসকসকলৰ হোষ্টেলত খুন্দা মাৰে বিমানখনে। বিমানখনত বহু বিদেশী নাগৰিকো আছিল। বহুতৰে মৃত্যু হ’ল। এটা মৰ্মান্তিক দুৰ্ঘটনা।
পাইলটে শেষ মুহূৰ্ততে মে’ ডে’ কল কৰিছিল। কিন্তু শেষ ৰক্ষা নহ’ল। দুৰ্ঘটনাত পতিত হয় এয়াৰ ইণ্ডিয়াৰ বিমানখন। ইটোৰ পিছত সিটোৰ মৃত্যু। খবৰ অনুসৰি দুৰ্ঘটনাগ্ৰস্ত হোৱা হোষ্টেলৰ কেইবাজনো আৱাসী চিকিৎসকৰ মৃত্যু হয়।
এজন ব্যক্তিয়ে কয়, মই ঘৰত আছিলো। সেই সময়ত মই এটা ডাঙৰ শব্দ শুনিলোঁ। কি হৈছে চাবলৈ ঘৰৰ পৰা ওলাই আহোঁতে দেখিলোঁ ধোঁৱাৰ কুণ্ডলী এটা ওপৰলৈ উঠি আহিছে। অলপ ওচৰ চাপি আহোঁতে দেখিলোঁ চাৰিওফালে মৃতদেহবোৰ সিঁচৰতি হৈ আছে। চাৰিওফালে ধ্বংসাৱশেষ।
ইপিনে, ঘটনা সংঘটিত হোৱাৰ পিছতে অগ্নিনিৰ্বাপক বাহিনী অঞ্চলটোত উপস্থিত হয়। জুই নুমুৱাবলৈ চেষ্টা কৰে। পৰিস্থিতি একেবাৰে ভয়ংকৰ আছিল। উদ্ধাৰকাৰী দলটোৱে দ্ৰুতগতিত উদ্ধাৰ কামত নামিল। ইটোৰ পিছত সিটো মৃতদেহ উদ্ধাৰ কৰে। এই দুৰ্ঘটনাত বহু লোকে নিজৰ আপোনজনক হেৰুৱাইছিল। অৱশ্যে সৌভাগ্যক্ৰমে বিমানখনৰ এজন যাত্ৰী বাচি যায় বুলি বাতৰি প্ৰকাশ পাইছে।
