গুজৰাটৰ দাহোদ জিলাৰ এখন ফাৰ্মৰ পৰা এটা অত্যন্ত বিৰল প্ৰজাতিৰ দুই মূৰ আৰু চাৰিটা চকু থকা সাপ উদ্ধাৰ কৰা হৈছে। প্ৰায় ছয় ইঞ্চি দীঘল এই আচৰিত ধৰণৰ সাপটোক দেখা পাই স্থানীয় লোকৰ পৰা আৰম্ভ কৰি বন্যপ্ৰাণী বিশেষজ্ঞসকলৰ মাজতো হুলস্থূল লাগি পৰিছে। দাহোদৰ ধানপুৰ তালুকৰ অগাসৱানি গাঁৱৰ এখন খেতিমাটিত স্থানীয় কৃষকসকলে পোনপ্ৰথমবাৰলৈ সাপটোক প্ৰত্যক্ষ কৰে। খবৰ পোৱাৰ লগে লগে এদল বন্যপ্ৰাণী সুৰক্ষাকৰ্মীয়ে ঘটনাস্থলীত উপস্থিত হৈ কোনো ধৰণৰ ক্ষতি নকৰাকৈ সাপটোক অক্ষত অৱস্থাত উদ্ধাৰ কৰিবলৈ সক্ষম হয়।
বিশেষজ্ঞসকলে জনোৱা মতে, উদ্ধাৰ হোৱা সাপবিধ বিষহীন উলফ স্নেক বা সাধাৰণ ঘৰুৱা সাপ, যি মানুহৰ বাবে একেবাৰে ক্ষতিকাৰক নহয়। কিন্তু ইয়াৰ শৰীৰত প্ৰকৃতিৰ এক অদ্ভুত অস্বাভাৱিকতা দেখা গৈছে, যাক বিজ্ঞানৰ ভাষাত বাইচেফালি বুলি কোৱা হয়। সাধাৰণতে ভ্ৰূণৰ বিকাশৰ সময়ত কোষ বিভাজন সম্পূৰ্ণ নহ‘লে এনে শাৰীৰিক ত্ৰুটিৰ সৃষ্টি হয়। ইয়াৰ ফলত এটা মাত্ৰ শৰীৰতে দুটা পৃথক মূৰ গজি উঠে। এই সাপবিধৰ ক্ষেত্ৰতো দুয়োটা মূৰৰ পৃথক পৃথক চকু আছে আৰু চিকিৎসকসকলৰ অনুমান অনুসৰি ইয়াৰ মগজু আৰু স্নায়ুতন্ত্ৰও পৃথকভাৱে কাম কৰে।
বন্যপ্ৰাণী কৰ্মীসকলৰ তথ্য অনুসৰি, গুজৰাটৰ ইতিহাসত দুটা মূৰৰ সাপ দেখা পোৱাৰ এইটোৱে প্ৰথম ঘটনা। সমগ্ৰ ভাৰতবৰ্ষতো এনে ঘটনা আঙুলি মূৰত গণিব পৰা ধৰণৰ হে, তাৰ ভিতৰত ইয়াৰ পূৰ্বে মাত্ৰ দুটা ফেঁটি আৰু তিনিটা উলফ স্নেকৰ ক্ষেত্ৰতহে এনে নজিৰ আহিছিল। বাহ্যিকভাৱে বিষয়টো ৰোমাঞ্চকৰ যেন লাগিলেও বন্য পৰিৱেশত এই সাপবিধৰ জীয়াই থকাটো অতি কঠিন। যিহেতু দুয়োটা মূৰে স্বতন্ত্ৰভাৱে চিন্তা কৰে আৰু খাদ্য বা বিপদৰ সন্মুখত বেলেগ বেলেগ প্ৰতিক্ৰিয়া প্ৰকাশ কৰে, সেয়ে চিকাৰ ধৰোঁতে বা আত্মৰক্ষা কৰোঁতে সিহঁত বিভ্ৰান্ত হৈ পৰে। উদ্ধাৰকাৰীসকলে জনোৱা মতে, সাপটোৰ বয়স প্ৰায় এবছৰ আৰু বৰ্তমান ই যাতে সুৰক্ষিতভাৱে জীয়াই থাকিব পাৰে, তাৰ বাবে প্ৰয়োজনীয় যত্ন আৰু নজৰদাৰী অব্যাহত ৰখা হৈছে। প্ৰকৃতিৰ এনে বিৰল জীৱবৈচিত্ৰ্যৰ নিদৰ্শনে বিজ্ঞানমহলতো বিশেষ কৌতূহলৰ সৃষ্টি কৰিছে।
