দিল্লী-ভোপাল ৰে’লযাত্ৰাৰ সময়তে উত্তৰ প্ৰদেশৰ বিজেপি বিধায়ক ৰাজীৱ সিঙৰ সৈতে হোৱা এক ঘটনাক কেন্দ্ৰকৰি সামাজিক মাধ্যমতে তীব্ৰ প্ৰতিক্ৰিয়া প্ৰকাশ পাইছে। যোৱা বৃহস্পতিবাৰে ভাৰত বন্ধ চলি থকা সময়তে ৰাজীৱ সিঙে পৰিয়ালসহ ঝান্সীৰ দিশে যাত্ৰা কৰি আছিল। সেই সময়তে ৰে’লখনৰ ভিতৰত এই ঘটনা সংঘটিত হয়।
প্ৰত্যক্ষদৰ্শীৰ মতে বিধায়ক ৰাজীৱৰ আসন ৰে’লখনৰ একেবাৰে শেষৰফালে আছিল, আৰু ৰে’লত আগতীয়াকৈ বহি আছিল তেওঁৰ পত্নী আৰু সন্তান। বিধায়কগৰাকীয়ে যাত্ৰীৰ পৰা আসন সলনি কৰাৰ অনুৰোধ জনায়, যাতে তেওঁ নিজৰ পৰিয়ালৰ ওচৰত বহিব পাৰে। কিন্তু ভোপাল অভিমুখী যাত্ৰীগৰাকীয়ে এই অনুৰোধ প্ৰত্যাখ্যান কৰে।
এই ঘটনাৰ পাছতেই ঝান্সী ষ্টেচনত ৰে’লত উঠা কিছুমান লোকে যাত্ৰীগৰাকীৰ ওপৰত আক্ৰমণ চলায় বুলি অভিযোগ কৰে। ছচিয়েল মিডিয়াত ভাইৰেল হোৱা ভিডিঅ’ অনুসৰি, সেই যাত্ৰীগৰাকীক নিজৰ আসনত বহি থকা অৱস্থাত কেইবাজনে ঘুচা মাৰে। নাকৰ পৰা তেজ ওলাই থকা দৃশ্যও দেখা গৈছে। যদিও এই ভিডিঅ’ৰ সত্যতা এখন সংবাদ মাধ্যমেও নিশ্চিত কৰা নাই, ঘটনাটোৰ প্ৰতিবাদ ব্যাপক ৰূপ লৈছে।
ঝান্সীৰ ৰে’লৱে আৰক্ষী অধীক্ষক বিপুল কুমাৰ শ্ৰীবাস্তৱে ঘটনাটোৰ স্বীকাৰোক্তি দি কয়, চিচিটিভি ফুটেজ পৰীক্ষা কৰি দোষীৰ বিৰুদ্ধে আইনগত পদক্ষেপ গ্ৰহণ কৰা হ’ব।
বিধায়ক ৰাজীৱ সিঙৰ বিৰুদ্ধে দাখিল কৰা অভিযোগ অনুসৰি, সহযাত্ৰীগৰাকীয়ে তেওঁ আৰু তেওঁৰ পৰিয়ালৰ সৈতে অসৎ আচৰণ কৰিছিল আৰু ঝান্সীৰ কিছুমান লোকক ফোন কৰি হেঁচা দিয়াৰ কথাও উল্লেখ কৰিছে।
