সোমবাৰে পুৱা তেলেংগানাৰ চাংগাৰেড্ডী জিলাৰ ঔদ্যোগিক এলেকাৰ ৰাসায়নিক কাৰখানাত সংঘটিত হোৱা এক বৃহৎ বিস্ফোৰণত কমেও ১০ জন লোক নিহত হয়। ৰাসায়নিক আৰু অগ্নিকাণ্ডৰ ফলত অগ্নিদগ্ধ হৈ আৰু প্ৰায় ১৫ জন শ্ৰমিক গুৰুতৰভাৱে আহত হয়।
এজন জ্যেষ্ঠ আৰক্ষী বিষয়াই জনায় যে বিস্ফোৰণৰ কাৰণ জানিব পৰা হোৱা নাই। বিস্ফোৰণত সম্পূৰ্ণৰূপে ধ্বংস হয় কাৰখানাটো। তীব্ৰতা ইমানেই বেছি আছিল যে বিস্ফোৰণৰ বাবে একাংশ লোক প্ৰায় এশ মিটাৰ দূৰলৈ ছিটিকি পৰিছিল। কাৰখানাটোত সংঘটিত হোৱা বিস্ফোৰণৰ ফলত এটা ঘৰ ভাঙি পৰাৰ লগতে কাষৰীয়া এটা ঘৰত ফাট মেলিছে।
আৰক্ষীয়ে জনোৱা মতে, বিস্ফোৰণত জুই লাগি থকা অধিকাংশ কৰ্মী-শ্ৰমিক যদিও লৰালৰিকৈ বাহিৰলৈ ওলাই আহিছিল, তথাপিও কিছুমানৰ ভিতৰত আবদ্ধ হৈ থকাৰ আশংকা কৰা হৈছে।
অগ্নিকাণ্ডৰ তথ্য লাভ কৰাৰ পিছতে ১১খন অগ্নিনিৰ্বাপক বাহিনীৰ গাড়ীয়ে জুই নিৰ্বাপনৰ বাবে তৎপৰ হৈ পৰে। অগ্নিদগ্ধ হোৱাৰ ফলত ১০জন লোকৰ মৃত্যু হোৱাৰ লগতে কমেও ১৫জন আহত হোৱা বুলি জানিব পৰা গৈছে।
জিলা দণ্ডাধীশ আৰু আৰক্ষী অধীক্ষকে ঘটনাস্থলীত উপস্থিত হৈ অগ্নিনিৰ্বাপক আৰু উদ্ধাৰ অভিযানৰ তদাৰক কৰে। তেওঁলোকে জনোৱা মতে, চিগাচি ইণ্ডাষ্ট্ৰীজ প্ৰাইভেট লিমিটেড নামৰ এই কাৰখানাটোত মাইক্ৰ’ক্ৰিষ্টলাইন চেলুল’জ আৰু খাদ্য সংযোজকত ব্যৱহৃত ৰাসায়নিক পদাৰ্থ প্ৰস্তুত কৰা হৈছিল।
এই বিস্ফোৰণৰ ফলত সমগ্ৰ অঞ্চলটো ৰাসায়নিক ধোঁৱাই আৱৰি ধৰে। বহু লোকৰ উশাহ-নিশাহ ল’বলৈ অসুবিধা হ’বলৈ আৰম্ভ কৰে। সেয়ে আৰক্ষী-প্ৰশাসনে ক্ষীপ্ৰতাৰে ওচৰ-চুবুৰীয়া অঞ্চলৰ লোকসকলক নিৰাপদ দূৰত্বলৈ আঁতৰাই নিয়ে।
