আৰম্ভণিটো কৰিছিল আকাশ দীপে। শেষ কৰিলে মহম্মদ ছিৰাজে। মাজতে হেৰী ব্ৰুক আৰু জেমী স্মিথে ৩০৩ ৰানৰ পাৰ্টনাৰশ্বিপ গঢ়ি তুলিছিল। এটা সময়ত এনে লাগিছিল যে ইংলেণ্ডে হয়তো ভাৰতৰ ৰান সংখ্যা অতিক্ৰম কৰিব। কিন্তু যেতিয়া আকাশ দীপৰ ডেলিভাৰীয়ে হেৰী ব্ৰুক’ৰ উইকেট ভাঙি পেলালে, তেতিয়া পুনৰ নিয়ন্ত্ৰণ ভাৰতৰ হাতলৈ আহিল।
শেষ সময়ত উজলি উছিল ছিৰাজ। তেওঁ ৬ টা উইকেট দখল কৰে। অৱশেষত ইংলেণ্ডৰ ইনিংছ ৪০৭ ৰানতে স্তব্ধ হৈ পৰে। তৃতীয় দিনটোৰ শেষত ভাৰতে ১ উইকেটত ৬৪ ৰান সংগ্ৰহ কৰে।যশস্বী জয়ছৱাল ২৮ ৰানত আউট হয়। ২৪৪ ৰানত আগবাঢ়ি আছে ভাৰত।
তৃতীয় দিনটোত টিম ইণ্ডিয়াই ভাল আৰম্ভণি কৰিছিল যদিও সুবিধা ল’ব নোৱাৰিলে। ভাৰতৰ ৫৮৭ ৰানৰ প্ৰত্যুত্তৰত দ্বিতীয় দিনৰ শেষত ইংলেণ্ডে ৩ উইকেটত ৭৭ ৰান কৰে। শুকুৰবাৰে পুৱাই মহম্মদ ছিৰাজে ইংলেণ্ডক আঘাত হানে। ২২ নং অভাৰত তেওঁ জো ৰুট (২২) আৰু বেন ষ্ট’কছ (০)ক আউট কৰে।
কিন্তু তাৰপিছতে মেচখনৰ গতি সলনি হৈ গ’ল। এটা সময়ত ইংলেণ্ডে ৮৪ ৰানত ৫টা উইকেট হেৰুৱাইছিল। তাৰ পৰাই স্মিথ আৰু ব্ৰুকে ৩০৩ ৰানৰ পাৰ্টনাৰশ্বিপ গঢ়ি তোলে। বাজবলৰ ছন্দৰে দুয়োজনে ভাৰতীয় বলাৰৰ ওপৰত তাণ্ডৱ চলালে। বুমৰাহৰ অভাৱ মিডল অভাৰত স্পষ্ট হৈ পৰিছিল। পিটছ একেবাৰে নিৰ্জীৱ আছিল। বলটো পুৰণি হ’লেও পিটছৰ পৰা কোনো সহায় নাছিল।
কিন্তু তাতোকৈ গুৰুত্বপূৰ্ণ আছিল স্মিথৰ প্ৰত্যাক্ৰমণৰ পৰিকল্পনা। টি-২০ৰ দৰে খেলি ৮০টা বলতে শতক অৰ্জন কৰে। ইংলেণ্ডে কাউণ্টাৰ আক্ৰমণ কৰাৰ সময়ত ভাৰতীয় বলাৰৰ পুৰণি বেমাৰটো বাৰে বাৰে ওলাই পৰিছিল। অধিনায়ক শুভমন গীলে পুনৰ ৰক্ষণাত্মক ফিল্ডিং সজাই বিপদ বৃদ্ধি কৰে।
প্ৰসিদ্ধ কৃষ্ণ, নীতিশ কুমাৰ ৰেড্ডী বা ৰবীন্দ্ৰ জাদেজাই যিটো কৰিব নোৱাৰিলে, সেয়া পুনৰ কৰিলে আকাশ দীপে। তেওঁ নতুন বলত যি ইনছুইংটো এৰিছিল সেয়া হেৰী ব্ৰুকে (১৫৮) অলপ দেৰিকৈ বুজি পালে। ইতিমধ্যে বলটোৱে উইকেট ভাঙি পেলাইছিল। তাতেই ইংলেণ্ডৰ প্ৰতিৰোধ ক্ষমতা যেন ভাঙি পৰিল। সকলো সমালোচনাৰ উত্তৰ দি মহম্মদ চিৰাজে (৭০/৬) অকলেই টিম ইণ্ডিয়াৰ বলিঙৰ দায়িত্ব ল’লে।
আকাশ দীপৰ বলত ক্ৰীছ ৱ’কছে শ্লিপত কেচ দি আউট হয়। তেওঁ ৮৮ ৰানত ৪টা উইকেট দখল কৰে। তাৰ পাছত কাৰ্ছ, টং, বছিৰ তিনিওজনে ছিৰাজৰ বলত শূন্য ৰাণত উভতি যায়। ইংলেণ্ডৰ প্ৰথম পাঁচটা উইকেট ৮৪ ৰানত পৰিছিল। শেষৰ পাঁচটা উইকেট মাত্ৰ ২০ ৰানতে পৰে। জেমী স্মিথে ১৮৪ ৰানত অপৰাজিত হৈ থাকে।
দ্বিতীয় ইনিংছত বেটিং কৰি ভাৰতে ১ উইকেট হেৰুৱাই ৬৪ ৰান সংগ্ৰহ কৰে। ২৪৪ ৰানত আগবাঢ়ি আছে গীল বাহিনী। কে এল ৰাহুল (২৮) আৰু কৰুণ নায়াৰ (৭) এতিয়াও ক্ৰীজত আছে। দুদিনতকৈ অধিক সময় বাকী আছে। এজবাষ্টনত জয়ৰ গোন্ধ পাইছে টিম ইণ্ডিয়াই।
সংক্ষিপ্ত স্কোৰঃ
প্ৰথম ইনিংছ
ভাৰতঃ ৫৮৭ (শুভমন গিল ২৬৯, জাদেজা ৮৯, যশস্বী ৮৭, বছিৰ ১৬৭/৩)
ইংলেণ্ডঃ ৪০৭ (জেমী স্মিথ ১৮৪, হেৰী ব্ৰুক ১৫৮, ছিৰাজ ৭০/৬ আকাশ দীপ ৮৮/৪)
দ্বিতীয় ইনিংছ
ভাৰত ৬৪/১ (ৰাহুল* ২৮, যশস্বী ২৮, টং ১২/১)
ভাৰত ২৪৪ ৰানত আগবাঢ়ি আছে।
