শৌচাগাৰত বহি ভাৰ্চুৱেল শুনানিত অংশগ্ৰহণ কৰাৰ অভিযোগত এজন যুৱকৰ বিৰুদ্ধে আদালতে ছুও মোটু ব্যৱস্থা গ্ৰহণ কৰে। শেহতীয়াকৈ গুজৰাট উচ্চ ন্যায়ালয়ত এক গোচৰৰ ভাৰ্চুৱেল শুনানিৰ সময়ত সংঘটিত হৈছিল এই ঘটনা। বিষয়টো পোহৰলৈ অহাৰ লগে লগে আদালতৰ বিভাগীয় বিচাৰপীঠে যুৱকজনৰ বিৰুদ্ধে আদালত অৱমাননাৰ গোচৰ ৰুজু কৰাৰ নিৰ্দেশ দিয়ে।
যোৱা ২০ জুনত সংঘটিত হোৱা এই ঘটনাৰ শুনানি গ্ৰহণ কৰিছিল ন্যায়াধীশ নিৰ্ঝাৰ এছ দেশাইৰ বিচাৰপীঠত। সেই সময়ত ‘সমাদ বেটাৰী’ নামৰ এজন ব্যৱহাৰকাৰীয়ে শৌচাগাৰত বহি ভাৰ্চুৱেল আদালতৰ শুনানিত যোগদান কৰিছিল। পিছত জানিব পৰা মতে যুৱকজনৰ নাম আব্দুল ছামাদ। আদালতৰ শুনানিৰ লাইভ সম্প্ৰচাৰৰ সময়ত দেখা এই খণ্ডটো ছ’চিয়েল মিডিয়াত ভাইৰেল হৈ পৰে।
পিছত ৩০ জুনত উচ্চ ন্যায়ালয়ৰ ন্যায়াধীশ এ এছ ছুপেহিয়া আৰু আৰ টি বচ্চনৰ বিভাগীয় বিচাৰপীঠে এই কাণ্ডত suo motu ব্যৱস্থা গ্ৰহণৰ নিৰ্দেশ দিয়ে। ভিডিঅ’টোত দেখা পোৱা যুৱকজনৰ বিৰুদ্ধে আদালত অৱমাননাৰ গোচৰ ৰুজু কৰিবলৈ নিৰ্দেশ দিয়া হৈছিল উচ্চ ন্যায়ালয়ৰ পঞ্জীয়কক। যোৱা বৃহস্পতিবাৰে আদালতৰ মৌখিক নিৰ্দেশ আপলোড কৰা হৈছিল।
পিটিআইৰ মতে, উচ্চ ন্যায়ালয়ে নিজৰ নিৰ্দেশনাত কয় যে লাইভ সম্প্ৰচাৰৰ সময়ত শুনানিৰ সময়ত অংশগ্ৰহণকাৰীসকলৰ ‘বিশৃংখল’ আৰু ‘অনিয়ন্ত্ৰিত’ আচৰণৰ সঘনাই দেখা গৈছে। শৌচাগাৰত বহি শুনানিত উপস্থিত থকাটো কিয় আদালত অৱমাননা বুলি গণ্য কৰা নহ’ব, তাৰ ব্যাখ্যা বিচাৰি যুৱকজনক জাননী প্ৰেৰণ কৰিবলৈ কোৱা হৈছে। দুসপ্তাহৰ পাছত এই বিষয়ৰ শুনানি গ্ৰহণ কৰা হ’ব বুলি আদালতে জানিবলৈ দিয়ে। বিচাৰপীঠে লগতে কয় যে ছ’চিয়েল মিডিয়াত প্ৰচাৰিত ভিডিঅ’ তৎকালীনভাৱে নিষিদ্ধ কৰি ডিলিট কৰাৰ প্ৰয়োজন আছে।
দৰাচলতে ক’ৰোনাৰ সময়ৰে পৰা গুজৰাট উচ্চ ন্যায়ালয়ে অধিবক্তা আৰু বিবাদীক ভাৰ্চুৱেলি আদালতত হাজিৰ হ’বলৈ অনুমতি দিছে। উচ্চ ন্যায়ালয়ৰ ইউটিউব চেনেলতো লাইভ সম্প্ৰচাৰ কৰা হয় আদালতৰ শুনানিৰ কাৰ্য্যবিধি। সেই ঘটনাৰ সামাদৰ অংশ ছ’চিয়েল মিডিয়াতো বিয়পি পৰিল। শেহতীয়াকৈ সংবাদ মাধ্যম ‘বাৰ এণ্ড বেঞ্চ’ৰ এক প্ৰতিবেদন অনুসৰি ছামাদ এফআইআৰ বাতিল কৰাৰ গোচৰত প্ৰতিবাদী হিচাপে উপস্থিত আছিল। গোচৰটোৰ মূল অভিযোগকাৰী তেওঁ আছিল। দুয়োপক্ষৰ মাজত সৌহাৰ্দ্যপূৰ্ণ নিষ্পত্তিৰ পিছত আদালতে এই এফআইআৰ বাতিল কৰে। অৱশ্যে শৌচাগাৰৰ পৰা ভাৰ্চুৱেলি আদালতত হাজিৰ হোৱা ছামাদৰ বিৰুদ্ধে আদালতে ব্যৱস্থা গ্ৰহণ কৰে।
