তামিলনাডুৰ এটা ফটকা কাৰখানাত বিস্ফোৰণত এজন লোকৰ মৃত্যু। এই দুৰ্ঘটনাত আৰু পাঁচজন লোক আহত হয়। দেওবাৰে পুৱা তামিলনাডুৰ বিৰুধনগৰ জিলাৰ সত্তুৰ সমীপৰ এখন গাঁৱত সংঘটিত হয় এই বিস্ফোৰণ। এই দুৰ্ঘটনা কেনেকৈ সংঘটিত হ’ল সেয়া এতিয়াও স্পষ্ট হোৱা নাই। প্ৰথমতে জানিব পৰা মতে বিস্ফোৰণৰ পিছত আৰক্ষীয়ে কাৰখানাটোৰ সৈতে জড়িত এজন ব্যক্তিক গ্ৰেপ্তাৰ কৰিছে। অৱশ্যে কাৰখানাটোৰ মালিকজন সন্ধানহীন হৈ আছে বুলি জানিব পৰা গৈছে।
স্থানীয় সংবাদ মাধ্যমৰ মতে, কাৰখানাটোত ৫০টাতকৈও অধিক কোঠা আছিল। দেওবাৰে পুৱা যেতিয়া শ্ৰমিকসকলে কাৰখানাটোত কাম আৰম্ভ কৰাৰ কিছু সময়ৰ পিছতে এটা কোঠাত অগ্নিকাণ্ড সংঘটিত হয়। জ্বলনশীল সামগ্ৰী থকা বাবে জুই ক্ষীপ্ৰতাৰে চাৰিওফালৰ ঘৰবোৰলৈ বিয়পি পৰে।
স্থানীয় সূত্ৰৰ মতে, অতি কম সময়ৰ ভিতৰতে কমেও ১০টা ঘৰত অগ্নিকাণ্ড সংঘটিত হয়। ফটকা কাৰখানাটোত বিস্ফোৰণৰ খবৰ বিয়পি পৰাৰ লগে লগে স্থানীয় ৰাইজে জুই নিৰ্বাপন কৰিবলৈ আৰম্ভ কৰে আৰু অগ্নিনিৰ্বাপক বাহিনীকো খবৰ দিয়ে। পিছত অগ্নিনিৰ্বাপক বাহিনীৰ লোকে সেই স্থানত উপস্থিত হৈ জুই নিয়ন্ত্ৰণ কৰিবলৈ সক্ষম হয়।
ফটকা কাৰখানাত সংঘটিত হোৱা বিস্ফোৰণত থিতাতে মৃত্যু হয় এজন লোকৰ। আহতসকলৰ ভিতৰত আছে ঝাৰখণ্ডৰ দুজন যুৱক। আহতসকলক উদ্ধাৰ কৰি শিৱকাশিৰ চিকিৎসালয়ত ভৰ্তি কৰোৱা হৈছে বুলি জানিবলৈ দিছে। স্থানীয় আৰক্ষী থানা আৰু ৰাজহ বিভাগৰ বিষয়াসকলে এই দুৰ্ঘটনা কেনেকৈ সংঘটিত হয় তাৰ তদন্ত আৰম্ভ কৰিছে। ফটকা কাৰখানাটোত জুই নিৰ্বাপনৰ পৰ্যাপ্ত ব্যৱস্থা হৈছিল নে নাই, নথি-পত্ৰ শুদ্ধ আছিল নে নাই, সেইবোৰৰো তদন্ত চলি আছে।
উল্লেখ্য যে কিছুদিন পূৰ্বে বিৰুধুনগৰৰ শিৱকাশীৰ সমীপৰ চিনকমনপট্টিত ফটকা কাৰখানাত সংঘটিত বিস্ফোৰণত কমেও চাৰিজন লোক নিহত হৈছিল। সেই ঘটনাৰ পিছত বিৰুধুনগৰৰ ফটকা কাৰখানাত বিস্ফোৰণত আন এজন ব্যক্তিৰ মৃত্যু হয়। দৰাচলতে যোৱা বছৰো শিৱকাশিত সংঘটিত বিস্ফোৰণত ১০ জন লোকৰ মৃত্যু হৈছিল। ইয়াৰ পিছত কেন্দ্ৰীয় প্ৰদূষণ নিয়ন্ত্ৰণ ব’ৰ্ড আৰু ৰাষ্ট্ৰীয় সেউজ ন্যায়াধিকৰণৰ তদন্তকাৰী দল শিৱকাশীলৈ যায়। সেই সময়ত তদন্তকাৰী দলটোৱে বহু অনিয়মৰ সন্ধান পাইছিল।
