দেশজুৰি হিন্দী ভাষা আৰু মোদী চৰকাৰৰ নতুন শিক্ষা নীতিক লৈ অবিৰত বিতৰ্ক চলি থকাৰ মাজতে উচ্চতম ন্যায়ালয়ৰ মুখ্য ন্যায়াধীশ বি আৰ গাভাই মাতৃভাষাৰ ওপৰত ডাঙৰ মন্তব্য কৰে। দেওবাৰে শৈশৱত অধ্যয়ন কৰা বিদ্যালয়লৈ যোৱাৰ পিছত তেওঁ আৱেগিক হৈ কয়, “মাতৃভাষাই জীৱনত মূল্যবোধৰ সৃষ্টি কৰাত সহায় কৰে।”
শেহতীয়াকৈ দেশত বাৰে বাৰে হিন্দী আগ্ৰাসনৰ অভিযোগ উত্থাপন হৈছে। বিশেষকৈ দক্ষিণৰ ৰাজ্যসমূহে ইয়াৰ বিৰুদ্ধে মাত মাতি আহিছে। এই পৰিস্থিতিত সচেতন মহলে মুখ্য ন্যায়াধীশৰ এনে মন্তব্য যথেষ্ট তাৎপৰ্যপূৰ্ণ বুলি মন্তব্য কৰে।
গাভাই সৰুতে মুম্বাইৰ এখন মাৰাঠী মাধ্যমৰ বিদ্যালয়ত অধ্যয়ন কৰিছিল। দেওবাৰে তাত এক অনুষ্ঠানত অংশগ্ৰহণ কৰি আৱেগিক হৈ গাভাই কয়, “আজি মই যি স্থানত আছো, তাৰ আঁৰত মোৰ শিক্ষক আৰু এই বিদ্যালয়ৰ অৱদান অনস্বীকাৰ্য। বিদ্যালয়ৰ পৰা লাভ কৰা শিক্ষা আৰু মূল্যবোধে মোৰ জীৱনক সমৃদ্ধ কৰিছে। মোৰ জীৱনৰ যাত্ৰা আৰম্ভ হৈছিল এই স্কুলৰ পৰা।” একে সময়তে তেওঁ কয় যে বিদ্যালয়ৰ প্ৰতিযোগিতা আৰু সাংস্কৃতিক অনুষ্ঠানত অংশগ্ৰহণ কৰি মই আত্মবিশ্বাস লাভ কৰিলোঁ।
মাৰাঠী ভাষাত অধ্যয়নৰ অভিজ্ঞতাৰ কথা মনত পেলাই তেওঁ মাতৃভাষাৰ গুৰুত্বৰ বিষয়ে বুজাই দিয়ে। তেওঁৰ ভাষাত “মাতৃভাষাত অধ্যয়নে কেৱল ধাৰণাগত স্পষ্টতা বৃদ্ধি কৰাই নহয়, জীৱনত মূল্যবোধৰ বীজ সিঁচিবলৈও সহায় কৰে।
