ভাৰতৰ প্ৰধানমন্ত্ৰী নৰেন্দ্ৰ মোদীয়ে শুকুৰবাৰে সন্ধিয়া আৰ্জেন্টিনাৰ বুয়েনছ আইৰেছত অৱতৰণ কৰে। দুদিনীয়া ভ্ৰমণ সূচীৰে আৰ্জেন্টিনাত উপস্থিত হৈছে প্ৰধানমন্ত্ৰী মোদী। ৫৭ বছৰৰ পিছত এইটোৱেই হৈছে ভাৰতৰ কোনো প্ৰধানমন্ত্ৰীৰ আৰ্জেন্টিনালৈ প্ৰথম দ্বিপাক্ষিক ভ্ৰমণ।
প্ৰধানমন্ত্ৰী মোদীয়ে আৰ্জেন্টিনাৰ সৈতে ভাৰতৰ সম্পৰ্ক শক্তিশালী কৰাৰ উদ্দেশ্যে বুয়েনছ আইৰেছত অৱতৰণ কৰিছো বুলি সমাজিক মাধ্যমৰ জড়িয়তে প্ৰকাশ কৰে। আৰ্জেন্টিনাৰ ৰাষ্ট্ৰপতি জেভিয়াৰ মিলেইৰ সৈতে সাক্ষাৎ কৰি বিশদ আলোচনাৰ বাবে আগ্ৰহী বুলি মত প্ৰকাশ কৰি কয়। দেশখনৰ শীৰ্ষ নেতৃত্বৰ সৈতে চলি থকা দ্বিপাক্ষিক সহযোগিতাৰো পৰ্যালোচনা কৰা হ’ব।
বৈদেশিক পৰিক্ৰমা মন্ত্ৰালয়ৰ মুখপাত্ৰ জয়ছোৱালে জনোৱা মতে, এই ভ্ৰমণে ভাৰত আৰু আৰ্জেন্টিনাৰ বহুমুখী কৌশলগত অংশীদাৰিত্বক আৰু শক্তিশালী কৰিব। ২০২৪ চনত দুয়োখন দেশে কূটনৈতিক সম্পৰ্কৰ ৭৫ বছৰ উদযাপন কৰিছিল। প্ৰতিৰক্ষা, কৃষি, খনন, তেল আৰু গেছ, নবীকৰণযোগ্য শক্তি, বাণিজ্য আৰু বিনিয়োগৰ দৰে ক্ষেত্ৰত সহযোগিতা গঢ়ি তোলাৰ প্ৰচেষ্টা চলি আছে বুলি সদৰী কৰে। ২০২৪ চনত ভাৰত আৰ্জেন্টিনাৰ পঞ্চম বৃহত্তম বাণিজ্যিক অংশীদাৰ আছিল।
আৰ্জেন্টিনাৰ লিথিয়ামৰ ভঁৰাল যি ভাৰতৰ সেউজ শক্তি পৰিৱৰ্তনৰ বাবে গুৰুত্বপূৰ্ণ, আৰু খনিজ সম্পদ খণ্ডৰ বাণিজ্য উল্লেখযোগ্য। সেয়ে এই ভ্ৰমণৰ জৰিয়তে ভাৰত আৰু আৰ্জেন্টিনাৰ সম্পৰ্কত নতুন অধ্যায়ৰ সূচনা হ’ব বুলি আশা প্ৰকাশ কৰিছে।
