বিহাৰৰ নাটকীয় ঘটনা। খুড়াকেই পত্নীৰ লগত ভতিজাকক পাতি দিলে বিয়া! দৰাচলতে ভতিজাৰ সৈতে পত্নীৰ সৈতে অবৈধ সম্পৰ্ক থকাৰ সন্দেহ কৰি ভতিজাকক নিজৰ ঘৰলৈ মাতি আনি মাৰপিট কৰি পত্নীৰ লগত বলপূৰ্বক বিয়া কৰাই দিয়ে এজন ব্যক্তিয়ে। এই ঘটনাত যুৱকজনক প্ৰহাৰ কৰা সকলৰ বিৰুদ্ধে আৰক্ষীয়ে এফআইআৰ দাখিল কৰি তদন্ত আৰম্ভ কৰিছে।
আৰক্ষীৰ সূত্ৰ অনুসৰি বিহাৰৰ সুপাল জিলাৰ জিবছাপুৰত সংঘটিত হৈছে এই ঘটনা। ২ জুলাইত গাঁওবাসীয়ে ২৪ বছৰীয়া মিথিলেশ কুমাৰ মুখীয়াক ৰীতা দেৱী নামৰ এগৰাকী মহিলাৰ সৈতে বলপূৰ্বকভাৱে বিয়া কৰাই দিয়ে। এই বিয়াৰ পাতি দিয়াৰ অন্যতম ব্যক্তি আছিল ৰীতাৰ স্বামী শিৱচন্দ্ৰ মুখীয়া। তেওঁৱেই গাঁৱৰ মানুহক কৈ ভতিজাকক মাৰপিট কৰাইছিল। ইয়াৰ পিছত তেওঁ পত্নীক বলপূৰ্বকভাৱে মিথিলেশ কুমাৰৰ লগত বিয়া কৰাইছিল। ছচিয়েল মিডিয়াত ভাইৰেল হৈ পৰিছে এই ভিডিঅ’।
ইফালে মিথিলেশৰ পিতৃ ৰামচন্দ্ৰ মুখীয়াই অভিযোগ কৰে যে তেওঁ আৰু তেওঁৰ পত্নীকো তেওঁৰ ভাতৃ আৰু গাঁৱৰ মানুহে মাৰপিট কৰে। ভাতৃ শিৱচন্দ্ৰৰ বিৰুদ্ধে ভীমপুৰ থানাত এজাহাৰ দাখিল কৰিছে ৰামচন্দ্ৰই। অভিযোগনামাত উল্লেখ আছে যে মিথিলেশক অপহৰণ কৰি তীব্ৰ প্ৰহাৰ কৰা হৈছিল। বৰ্তমান তেওঁ চিকিৎসালয়ত চিকিৎসাধীন হৈ আছে।
এই ঘটনাত ৫জন লোকৰ বিৰুদ্ধে স্থানীয় থানাত এজাহাৰ দাখিল কৰা হৈছে। ঘটনা সন্দৰ্ভত আৰক্ষীয়ে তদন্ত আৰম্ভ কৰিছে। অৱশ্যে এতিয়ালৈকে কোনো লোকক গ্ৰেপ্তাৰ কৰা হোৱা নাই। জানিব পৰা মতে শিৱচন্দ্ৰ আৰু ৰীতাৰ এটা চাৰি বছৰীয়া সন্তান আছে।
