১১ জুলাই শুকুৰবাৰে মুক্তি পাবলগীয়া ‘উদয়পুৰ ফাইলছ’ ছবিখনৰ মুক্তিত বাধা দিবলৈ উচ্চতম ন্যায়ালয়ত গোচৰ ৰুজু কৰা হৈছিল।
বুধবাৰে ন্যায়াধীশ সুধাংশু ঢুলীয়া আৰু ন্যায়াধীশ জয়মলীয়া বাগচিৰ সংমণ্ডল বিচাৰপীঠে আবেদনকাৰীৰ আবেদন খাৰিজ কৰে। অহা ১৪ জুলাইত এই গোচৰৰ পৰৱৰ্তী শুনানিত এই গোচৰটো সাংবিধানিক বিচাৰপীঠলৈ প্ৰেৰণ কৰা হ’ব নে নহয় সেই বিষয়ে সিদ্ধান্ত লোৱা হ’ব। অৱশ্যে চিনেমাখন মুক্তিৰ ক্ষেত্ৰত কোনো বাধা নাই। ইতিমধ্যে প্ৰডাকচন কোম্পানীয়ে ঘোষণা কৰিছে যে অহা ১১ জুলাইত মুক্তি পাব ছবিখন।
উদয়পুৰ ফাইলছৰ মূল কাহিনীটো হৈছে উদয়পুৰ ৰাজস্থানত কানৈয়া লাল তেলী হত্যাকাণ্ডৰ কাহিনী। তেওঁ ৰাজস্থানৰ উদয়পুৰ চহৰৰ দৰ্জী আছিল। ২০২২ চনৰ ১৮ জুনত দুস্কৃতিকাৰীয়ে দোকানত প্ৰৱেশ কৰি মূৰ কাটি পেলায়। ছচিয়েল মিডিয়াত এই হত্যাকাণ্ডৰ ছবি বিয়পাই দিয়ে। হত্যাকাৰী আছিল ইছলামিক উগ্ৰপন্থী।
কানাইলালক টাৰ্গেট কৰাৰ কাৰণ আছিল বিজেপিৰ তেতিয়াৰ ৰাষ্ট্ৰীয় মুখপাত্ৰ নুপুৰ শৰ্মাৰ ফেচবুক পোষ্ট এটা শ্বেয়াৰ কৰা। সেই সময়ত নুপুৰক লৈ দেশজোৰা বিতৰ্ক চলিছিল। তেওঁ ইছলামৰ হজৰত মহম্মদক টেলিভিছনৰ এটা অনুষ্ঠানত আপত্তিজনক মন্তব্য কৰিছিল। বিতৰ্কৰ সন্মুখীন হৈ বিজেপিয়ে তেওঁক বহিষ্কাৰ কৰে।
কানায়ালালৰ হত্যাকাণ্ডৰ তদন্ত আৰম্ভ কৰিছে ৰাষ্ট্ৰীয় তদন্ত সংস্থাই। আঠজন অভিযুক্তৰ ভিতৰত অন্যতম মহম্মদ জাভেদে ছবিখন মুক্তিৰ অনুমতি নিদিবলৈ উচ্চতম ন্যায়ালয়ত আবেদন জনায়।
ইয়াৰ পূৰ্বেও ছবিখনৰ মুক্তি বন্ধ কৰিবলৈ দিল্লী উচ্চ ন্যায়ালয়তো গোচৰ ৰুজু হৈছিল। তাত গোচৰটো দাখিল কৰিছিল জামাত-উলেমা-ই-হিন্দ আৰু সাংবাদিক প্ৰশান্ত টণ্ডনে। তেওঁলোকৰ বক্তব্য আছিল যে ছবিখনে একপক্ষীয় দৃষ্টিভংগী উপস্থাপন কৰিছে। এটা ধৰ্মীয় গোটক লক্ষ্য কৰি লোৱা হৈছে। একেটা ভিত্তিতে উচ্চতম ন্যায়ালয়তো গোচৰ ৰুজু কৰা হৈছিল। দুয়োখন আদালতে আবেদন খাৰিজ কৰে।
