সমগ্ৰ অসমতে চৰকাৰে চলাই থকা উচ্ছেদ অভিযানৰ বিষয়টোত চি পি আই(এম)ৰ অসম ৰাজ্যিক কমিটীয়ে গভীৰ উদ্বেগ প্ৰকাশ কৰি, এয়া অসমৰ মাটি বৃহৎ পুঁজিপতি গোষ্ঠীৰ বাবে উন্মুক্ত কৰাৰ এক অংশ বুলি অভিহিত কৰিছে। কালি আদানিৰ তাপ বিদ্যুৎ প্ৰকল্পৰ বাবে ১৩০০ পৰিয়াল আৰু ১২ হাজাৰ মানুহক ধুবুৰী জিলাৰ চাপৰ ৰাজহ চক্ৰত কৰা এই সৰ্ববৃহৎ উচ্ছেদ অভিযানক দলটোৱে নিন্দা কৰিছে আৰু বিকল্প অবিহনে চলাই থকা এই উচ্ছেদ বন্ধ কৰাৰ দাবী জনাইছে। এনে অমানৱীয় উচ্ছেদ অভিযানত আৰক্ষী প্ৰশাসনে কৰা বৰ্বৰ লাঠিচালনাক চিপিআই(এম)-এ কঠোৰ ভাষাৰে ধিক্কাৰ দিছে।
বিজেপি চৰকাৰে অসমৰ প্ৰতিটো ঘৰ আৰু মাটি প্ৰদান কৰাৰ প্ৰতিশ্ৰুতি দিছিল যদিও এতিয়া উচ্ছেদ অভিযানৰ মাজেৰে ঘৰ আৰু মাটিৰ পৰা হাজাৰ হাজাৰ মানুহক বিতাৰিত কৰিছে। আমাৰ স্পষ্ট মত বিকল্প সংস্থাপন অবিহনে উচ্ছেদ চলালে কোনো সমস্যাৰ সমাধান নহয়, নতুন সমস্যাৰহে সৃষ্টি কৰিব। দৰিদ্ৰ উচ্ছেদিত পৰিয়ালে কেৱল ঘৰ বা মাটি হেৰুৱা নাই, বৰঞ্চ তেওঁলোকৰ জীৱিকাও এইখন চৰকাৰে ধ্বংস কৰিছে। এতিয়া ধুবুৰীৰ উচ্ছেদিত পৰিয়ালক ব্ৰহ্মপুত্ৰৰ যি নতুন চৰলৈ যাবলৈ দিয়া হৈছে, তাৰ ফলত তেওঁলোকৰ জীৱিকালৈও প্ৰত্যাহ্বান আহিব। চৰকাৰৰ এনে নীতিয়ে শ্ৰমজীৱী লোকসকলৰ বাবে ভয়ংকৰ দিন মাতি অনাৰ লগতে অসমৰ অৰ্থনীতিকো বেয়াকৈ ক্ষতিগ্ৰস্ত কৰিব।
চৰকাৰে উচ্ছেদৰ ৰাজনীতিৰ মাজেৰে সাম্প্ৰদায়িক বিভাজনৰ ৰাজনীতিৰ পথো প্ৰস্তুত কৰিছে। অসমৰ চৰকাৰী মাটিত কেৱল “মিঞা” মানুহ আছে আৰু তেওঁলোকক বেদখল কৰাৰ মাজেৰে অসমৰ “খিলঞ্জীয়া”ৰ স্বাৰ্থত চৰকাৰে উচ্ছেদ কৰিছে বুলি এটা বাগধাৰা চলাবলৈ চেষ্টা কৰিছে। মন কৰিব লগীয়া যে অসমৰ চৰকাৰী মাটিত অসমৰ – “খিলঞ্জীয়া”, “মিঞা” সকলো সম্প্ৰদায়ৰ লোক বসবাস কৰি আছে। আৰু এই সকলো লোক দৰিদ্ৰ আৰু আৰ্থিকভাৱে পিছপৰা। চৰকাৰী মাটিৰ কথা কৈ চৰকাৰে উচ্ছেদক ন্যায্যতা প্ৰদান কৰিছে কিন্তু চৰকাৰে অসমৰ ভূমিহীন মানুহক মাটিৰ পট্টা দিয়াৰ বাবে নীতি গ্ৰহণ কৰা নাই। চিপিআই(এম)ৰ স্পষ্ট মত যে, চৰকাৰে উচ্ছেদ নহয়, মাটিৰ জৰীপ কৰি ভূমিহীন মানুহক মাটিৰ অধিকাৰ প্ৰদান কৰা উচিত।
চৰকাৰে এফালে বৃহৎ উন্নয়নৰ নাম লৈ আৰু আনফালে “খিলঞ্জীয়া”ৰ স্বাৰ্থ ৰক্ষাৰ বাবে বিভাজনৰ ৰাজনীতিৰ মাজেৰে এনেবোৰ উচ্ছেদৰ পক্ষত জনমত সৃষ্টি কৰাৰ বাবে চেষ্টা চলাইছে। আচলতে চৰকাৰে বৃহৎ পুঁজিপতি গোষ্ঠীৰ স্বাৰ্থতহে এনে উচ্ছেদ অভিযান গ্ৰহণ কৰিছে। বিগত ৬০টা বছৰে নোহোৱা ৰাজ্যজুৰি ভূমি জৰীপ সম্পন্ন কৰি আৰু যোগ্য পৰিয়ালবোৰক মাটিৰ অধিকাৰ প্ৰদান কৰিহে চৰকাৰে ভূমি অধিগ্ৰহণ সম্পৰ্কে যুক্তিসংগত নীতি গ্ৰহণ কৰা উচিত। এনে উচ্ছেদ অভিযানৰ বিৰুদ্ধে সকলোকে ঐক্যবদ্ধ প্ৰতিবাদ সাব্যস্ত কৰিবলৈ আহ্বান জনাইছে বাওঁ দলটোৱে।
