ষ্টেচনত শান্তিৰে জিৰণি লোৱাৰ সুযোগ! বিশাখাপট্টনম ৰেল ষ্টেচন চৌহদত যাত্ৰীসকলৰ বাবে এই সুবিধা আনিছে। ইষ্ট ক’ষ্ট ৰে’লৱেৰ ৱালটেয়াৰ বিভাগে আধুনিক শোৱা পড প্ৰৱৰ্তন কৰিছে, যিটো দেশৰ ৰে’ল আন্তঃগাঁথনিত প্ৰথম এনে প্ৰচেষ্টা।
এই ‘কেপচুল হোটেল’খন ৰে’লৱেৰ নন-ফেয়াৰ ৰেভিনিউ মডেল অনুসৰি নিৰ্মাণ কৰা হৈছে, অৰ্থাৎ ই ৰে’লৰ ভাড়াৰ বাহিৰেও অতিৰিক্ত আয়ৰ নতুন উৎস হিচাপেও কাম কৰিব। উল্লেখযোগ্য যে এই পড ব্যৱহাৰ কৰিবলৈ কোনো ৰেলৰ টিকট বা প্লেটফৰ্মৰ টিকটৰ প্ৰয়োজন নহয়। সাধাৰণ ৰাইজেও ইয়াৰ সুবিধা ল’ব পাৰে।
এই বিশেষ কোঠাটো বিশাখাপট্টনম ষ্টেচনৰ ১ নং প্লেটফৰ্মৰ ৩ নং গেটত নিৰ্মাণ কৰা হৈছে। এই কমপ্লেক্সত মুঠ ৮৮খন বিচনা আছে, ইয়াৰে ৭৩খন একক বিচনা আৰু ১৫খন ডাবল বিচনা। কেৱল মহিলাৰ বাবে ১৮খন বিচনা আবণ্টন দিয়া হৈছে। য’ত থাকিব সুকীয়া বাথৰুম আৰু ড্ৰেছিং ৰুম। এই কেপচুল হোটেলখনে মহিলা যাত্ৰীৰ সুৰক্ষা, গোপনীয়তা, আৰু আৰামক বিশেষ অগ্ৰাধিকাৰ দিছে।
কি কি সুবিধা পাব?
২৪ ঘণ্টীয়া গৰম পানী যোগান
বিনামূলীয়া ৱাই-ফাই সংযোগ
আধুনিক আৰু ডাঙৰ বাথৰুম
স্নেকছ কাউণ্টাৰ
পৰ্যটকৰ বাবে পৃথক ভ্ৰমণ হেল্প ডেস্ক
ভাড়া কিমান?
একক বিচনাৰ ভাড়া ৩ ঘণ্টাৰ বাবে ২০০ টকা আৰু ২৪ ঘণ্টাৰ বাবে ৪০০ টকা। ডাবল বেডত ৩ ঘণ্টাৰ বাবে খৰচ হ’ব ৩০০ টকা। ২৪ ঘণ্টাৰ বাবে ডাবল বেড ভাড়াত ল’লে ৬০০ টকা দিব লাগিব।
ৰে’ল বিভাগে জনোৱা মতে, যাত্ৰীৰ চাহিদাৰ ওপৰত নিৰ্ভৰ কৰি পাছত অনলাইন বুকিঙৰ সুবিধাও আৰম্ভ হ’ব পাৰে।
ৰে’ল বিভাগৰ বিষয়াসকলৰ মতে এই সেৱাই ভৱিষ্যতে কেৱল বিশাখাপট্টনমতে নহয়, দেশৰ অন্যান্য ব্যস্ত ষ্টেচনসমূহতো যাত্ৰী সেৱাত এক নতুন মাত্ৰা সংযোজন কৰিব পাৰে।
