প্ৰসিদ্ধ তেলেগু অভিনেতা কোটা শ্ৰীনিবাস ৰাওৰ দেহাৱসান ঘটিছে। মৃত্যুৰ সময়ত তেওঁৰ বয়স আছিল ৮৩ বছৰ। দেওবাৰে হায়দৰাবাদৰ জুবিলী হিলছৰ নিজৰ বাসগৃহত তেওঁ শেষ নিশ্বাস ত্যাগ কৰে। দীৰ্ঘদিন ধৰি বাৰ্ধক্যজনিত ৰোগত আক্ৰান্ত হৈ আছিল ৰাও।
২০১৫ চনত পদ্মশ্ৰী বঁটা লাভ কৰা কোটা শ্ৰীনিবাস ৰাও অভিনেতা হোৱাৰ উপৰিও বিজেপিৰ প্ৰাক্তন বিধায়ক আছিল। এইজন তেলেগু অভিনেতাই মৃত্যুৰ দুদিন পূৰ্বে ৮৩ সংখ্যক জন্মদিন পালন কৰিছিল। দেওবাৰে পুৱাই আহিল এই বেয়া খবৰটো।
প্ৰায় চাৰি দশক ধৰি অভিনয় জগতত কাম কৰি আহিছে শ্ৰীনিবাসে। তেওঁ তেলেগু, তামিল, কানাড়া, হিন্দীকে ধৰি বিভিন্ন ভাষাৰ ৭৫০ খনতকৈও অধিক ছবিত অভিনয় কৰিছে। অন্ধ্ৰ প্ৰদেশৰ মুখ্যমন্ত্ৰী এন চন্দ্ৰবাবু নাইডুৱে অভিনেতাজনৰ মৃত্যুত শোক প্ৰকাশ কৰিছে।
১৯৭৮ চনত ‘প্ৰণাম খাৰিদু’ ছবিৰ জৰিয়তে শ্ৰীনিবাসৰ অভিনয় জীৱন আৰম্ভ হয়। ইয়াৰ পিছত তেওঁ আৰু পিছলৈ ঘূৰি চাব লগা নাছিল। খলনায়কৰ চৰিত্ৰত তেওঁ অতি জনপ্ৰিয় হৈ পৰিছিল। অৱশ্যে খলনায়কৰ চৰিত্ৰৰ লগতে কমেডী আৰু আৱেগিক চৰিত্ৰতো তেওঁ সমানে জনপ্ৰিয়তা লাভ কৰিছিল।
‘আহা না পেলান্ত’, ‘প্ৰতিগতানা’, ‘কয়েদি নং ৭৮৬’, ‘শিৱা’, ‘জমলীলা’ ছবিত তেওঁৰ অভিনয় অতিশয় প্ৰশংসিত হৈছিল। অসাধাৰণ অভিনয়ৰ বাবে শ্ৰীনিবাসে বহু বঁটা লাভ কৰিছে। তেওঁৰ লাভ কৰিছে পদ্মশ্ৰী বঁটা। ভাৰতীয় চিনেমালৈ তেওঁৰ অৱদানৰ বাবে ২০১৫ চনত এই বঁটা প্ৰদান কৰা হৈছিল। ৯ টাকৈ নন্দী বঁটাও লাভ কৰিছে।
বলীউডৰ বিখ্যাত ছবি ‘চৰকাৰ’ত খলনায়কৰ চৰিত্ৰত দেখা গৈছিল শ্ৰীনিবাসক। এই ছবিখনত অমিতাভ বচ্চনে মুখ্য চৰিত্ৰত অভিনয় কৰিছিল।
১৯৯৯ চনত ৰাজনীতিত প্ৰৱেশ কৰা শ্ৰীনিবাসে। ১৯৯৯ চনৰ পৰা ২০০৪ চনলৈ বিজয়াৱাড়া পূৱ বিধানসভা সমষ্টিৰ পৰা বিজেপি বিধায়ক হিচাপে কাৰ্যনিৰ্বাহ কৰিছিল। এই কিংবদন্তিৰ মৃত্যুত শোকস্তব্ধ হৈ পৰিছে তেলেগু চলচ্চিত্ৰ উদ্যোগ।
