পশ্চিমবংগৰ বস্তোলা ৰে’লৱে ষ্টেচনৰ সমীপত সংঘটিত হৈছে এক হৃদয়বিদাৰক ঘটনা। ৰে’লৰ খুন্দাত নিহত তিনিটাককৈ হাতী। খৰগপুৰ-টাটানগৰ পথত চলি থকা এখন ৰে’লে খুন্দা মাৰে ৰে’লপথ পাৰ হৈ যোৱা সাতজনীয়া হাতীৰ জাকত। দুৰ্ঘটনাত থিতাতে মৃত্যু হয় দুটা হাতী পোৱালি আৰু এটা প্ৰাপ্তবয়স্ক হাতী।
দুৰ্ঘটনাটোৰ পিছতে জাকৰ আন চাৰিটা হাতী সেই স্থানতে আবদ্ধ হৈ পৰে। অঞ্চলটো পৰিষ্কাৰ কৰাৰ পিছত ৰে’লৱেৰ বিষয়াসকলে ক্ৰেনৰ সহায়ত হাতীৰ মৃতদেহবোৰ আঁতৰাই পেলায়। অস্বাভাৱিকভাবে দেশ জুৰি বাঢ়িবলৈ ধৰিছে হাতীমানুহৰ সংঘাত। ভাৰতৰ বিভিন্ন ৰাজ্যত ৰে’লপথ পাৰ হোৱাৰ সময়তে হাতী আৰু অন্যান্য বন্যপ্ৰাণীক খুন্দা মৰাৰ কেইবাটাও খবৰ আহিছে। এই বন্যপ্ৰাণীসমূহৰ বাবে নিৰাপদ পথৰ প্ৰয়োজনীয়তাৰ ওপৰত প্ৰশ্ন উত্থাপন হৈছে। বিশেষকৈ ঋতু পৰিৱৰ্তনৰ সময়ত, যেতিয়া বণ্যপ্ৰাণীবোৰে খাদ্য আৰু উন্নত বাসস্থানৰ সন্ধানত যাত্ৰা কৰে।
জানিব পৰা মতে এই সমস্যাৰ সমাধানৰ বাবে হাতীৰ সুৰক্ষা ব্যৱস্থা উন্নত কৰৰ লক্ষ্যৰে কেইবাটাও পদক্ষেপ গ্ৰহণ কৰা হৈছে। তামিলনাডু, ওড়িশা, অসম আৰু উত্তৰাখণ্ডৰ দৰে ৰাজ্যত ৰে’লৰ চালকক ট্ৰেকৰ সমীপত হাতী ধৰা পেলোৱাত সহায়ক হোৱাকৈ প্ৰযুক্তিৰ ব্যৱহাৰ কৰা হৈছে। এই ব্যৱস্থাই চেন্সৰ আৰু কেমেৰা ব্যৱহাৰ কৰি হাতী ধৰা পেলায় আৰু ৰে’ল পৰিচালকসকললৈ সতৰ্কবাণী প্ৰেৰণ কৰে, যাৰ ফলত প্ৰয়োজন হ’লে ৰে’লৰ গতি লেহেমীয়া বা ৰখাব পৰা যায়।
এই প্ৰযুক্তি এতিয়াও বিকশিত হৈ আছে আৰু সমগ্ৰ দেশতে ইয়াৰ ব্যাপক ব্যৱহাৰ প্ৰয়োজনীয়। শেহতীয়াকৈ ৰে’ল সেৱা দুঘণ্টাৰ বাবে বন্ধ কৰি দিয়া হৈছিল যাতে ৰে’লপথত হাতী নিৰাপদে প্ৰসৱ কৰিব পাৰে।ভাৰত চৰকাৰে ৰে’লপথত বন্যপ্ৰাণী সুৰক্ষাৰ ব্যৱস্থাৰ ওপৰত সক্ৰিয়ভাৱে কাম কৰি আছে। বন্যপ্ৰাণীৰ পাৰস্পৰিক ক্ৰিয়া-কলাপ হোৱা এশৰো অধিক স্পৰ্শকাতৰ অঞ্চল চিনাক্ত কৰি হাতীক ট্ৰেকৰ কাষ চাপিব নোৱাৰাকৈ শব্দ উৎপন্ন কৰা যন্ত্ৰ স্থাপন কৰিছে। ইয়াৰ উপৰিও ৰাতি থাৰ্মেল কেমেৰা ব্যৱহাৰ কৰি ৰে’ল পৰিচালকসকলক কম দৃশ্যমানতাৰ পৰিস্থিতিত জীৱ-জন্তু দেখা পোৱাত সহায় কৰা হৈছে।
