শেহতীয়া কৈ ৰাজ্যত বাঢ়িছে খৰাংৰ প্ৰকোপ! প্ৰাথমিক মূল্যায়নৰ তথ্য অনুসৰি, অসমৰ ১৪খন জিলাত উচ্চ হাৰত বৰষুণ হ্ৰাস পৰিলক্ষিত হৈছে, আনহাতে বাকী ১৩খন জিলাত বৰষুণৰ ঘাটি দেখিবলৈ পোৱা গৈছে। মুঠ ২৭খন জিলাক বৰষুণৰ ঘাটিৰ সন্মুখীন হোৱা অঞ্চল হিচাপে শ্ৰেণীভুক্ত কৰা হৈছে।
শনিবাৰে মুখ্য সচিব ড০ ৰবি কোটাৰ অধ্যক্ষতাত অনুষ্ঠিত এখন মাহেকীয়া পৰ্যালোচনা বৈঠকত জিলা উপায়ুক্ত আৰু জ্যেষ্ঠ সম্পাদকসকলে অংশগ্ৰহণ কৰি নিৰ্ধাৰিত তিনিটা সূচকৰ ভিত্তিত প্ৰভাৱিত অঞ্চলসমূহ চিনাক্ত কৰি সীমা নিৰ্ধাৰণৰ নিৰ্দেশ জাৰি কৰা হৈছে। ইয়াৰ লগতে খৰাং ঘোষণাৰ প্ৰক্ৰিয়াও আৰম্ভ কৰাৰ নিৰ্দেশ দিয়া হৈছে।
এই প্ৰক্ৰিয়াত সহায়ৰ বাবে কৃষি বিভাগক গ্ৰাম পঞ্চায়ত ভিত্তিক তথ্য ভাগ-বতৰা কৰিবলৈ কোৱা হৈছে। জলসিঞ্চন বিভাগক পঞ্চায়ত আৰু গ্ৰামোন্নয়ন বিভাগ তথা কৃষি বিভাগৰ সহযোগিতাত ক্ষতিগ্ৰস্ত অঞ্চলত পাম্প ব্যৱহাৰ কৰি তাৎক্ষণিক সকাহ প্ৰদানৰ ব্যৱস্থা কৰিবলৈ নিৰ্দেশ দিয়া হৈছে। জানিব পৰামতে ইতিমধ্যে উপলব্ধ সকলো পাম্পৰ জিলাভিত্তিক মেপিং সম্পূৰ্ণ কৰা হৈছে। লগতে, জলসিঞ্চনৰ চাহিদা পূৰণৰ বাবে প্ৰয়োজনীয় ঠাইত অকাৰ্যকৰী নলী পুনৰ কাৰ্যক্ষম কৰা হ’ব।
মুখ্য সচিবে কয়, কৃষকসকলৰ মাজত ফলপ্ৰসূ প্ৰচাৰৰ বাবে পি এণ্ড আৰ ডি আই এম ডিৰ পূৰ্বাভাস প্ৰচাৰৰ দায়িত্ব চিঅ’, বিডিঅ’ আৰু পঞ্চায়ত পৰ্যায়ৰ বিষয়াসকলক দিয়া হৈছে। ইয়াৰ জৰিয়তে বীজ সিঁচাৰ পৰামৰ্শ প্ৰদান কৰা হ’ব, যাতে কৃষকসকলে এই জটিল সময়ত সঠিক সিদ্ধান্ত ল’ব পাৰে।
ৰাজ্যিক দুৰ্যোগ সঁহাৰি পুঁজিৰ অধীনত ক্ষতিপূৰণৰ ব্যৱস্থা পৰ্যালোচনা কৰি ক্ষতিগ্ৰস্ত কৃষকসকলৰ বাবে সময়মতে সমৰ্থন নিশ্চিত কৰিবলৈ শস্যৰ ক্ষতিৰ সঠিক মূল্যায়নৰ নিৰ্দেশ প্ৰদান কৰিছে জিলা উপায়ুক্তসকলক। আগন্তুক ১২ আগষ্টত দহটা নতুন সহ-জিলা কেন্দ্ৰ (চিডিচি) আনুষ্ঠানিকভাৱে উদ্বোধন কৰা হ’ব, আৰু ১৫ আগষ্টৰ পৰা গোৱালপাৰা জিলাত কাৰ্যক্ষম হ’ব।
ইয়াৰ উপৰিও, আগন্তুক বিটিচি নিৰ্বাচন, স্বাধীনতা দিৱস উদযাপন, এডভান্টেজ আছাম ২.০ৰ সময়ত স্বাক্ষৰিত বুজাবুজি চুক্তিৰ স্থিতি পুনৰীক্ষণ, আৰু সকলো জিলাত ক্ৰেডিট ডিপ’জিট (চিডি) অনুপাতৰ বিষয়েও বৈঠকত আলোচনা হয়।
