কবি, চিন্তাবিদ আৰু ভাৰতৰ নক্সাল বিদ্ৰোহৰ অন্যতম শীৰ্ষ নেতা আজিজুল হকৰ শেষ নিশ্বাস ত্যাগ। সোমবাৰে কলিকতাৰ এখন চিকিৎসালয়ত শেষ নিশ্বাস ত্যাগ কৰে বিপ্লৱী নেতাগৰাকীয়ে।
১৯৬০ আৰু ৭০ৰ দশকত মাওবাদী-সাম্যবাদী আন্দোলনেৰে দেশ কঁপাই তুলিছিল এই নেতাগৰাকীয়ে।
১৯৪২ চনত হাওৰাত জন্মগ্ৰহণ কৰা আজিজুল হক আছিল নক্সাল নেতাসকলৰ অন্যতম। যি বন্দুকৰ নলীৰ পৰাই ৰাজনৈতিক শক্তি গজি উঠে বুলি বিশ্বাস কৰিছিল। চাৰু মজুমদাৰৰ পিছত তেৱেই আছিল আটাইতকৈ শক্তিশালী নক্সাল নেতা। মাও জে ডঙৰ ৰাজনৈতিক আদৰ্শক ভাৰতত জনপ্ৰিয় কৰি তোলাত বিশেষ ভূমিকা আছিল এই নেতাগৰাকীৰ।
এজন কবি, ৰাজনৈতিক চিন্তাবিদ আৰু এসময়ত চিপিআই(এমএল)ৰ দ্বিতীয়খন কেন্দ্ৰীয় সমিতিৰ মুৰব্বী আজিজুল হকে দীৰ্ঘদিন ধৰি অসুস্থতাৰ সৈতে যুঁজি আহিছিল। শেহতীয়াকৈ ঘৰতে পৰি হাতত আঘাত পোৱাৰ বাবে তেওঁক আইচিইউত ভৰ্তি কৰোৱা হৈছিল।
সূত্ৰই জনোৱা মতে, সোমবাৰে পুৱা ২:২৮ বজাত তেওঁ শেষ উশাহ লৈছিল।
পশ্চিম বংগৰ মুখ্যমন্ত্ৰী মমতা বেনাৰ্জীয়ে এক্সত পোষ্ট কৰি কয় যে, “প্ৰবীণ ৰাজনীতিবিদ আজিজুল হকৰ মৃত্যুত মই শোক প্ৰকাশ কৰিছো। আজিজুল হক আছিল এজন সংগ্ৰামী, এজন সংকল্পবদ্ধ নেতা। দীৰ্ঘদিনীয়া ৰাজনৈতিক জীৱনত তেওঁ কেতিয়াও শিৰ নত কৰা নাছিল। তেওঁৰ শোকসন্তপ্ত পৰিয়াল আৰু সহযোগীসকললৈ মোৰ আন্তৰিক সমবেদনা জ্ঞাপন কৰিছো।”
চাৰু মজুমদাৰৰ ৰেডিকেল লাইনক সমৰ্থন কৰাৰ বাবে তেওঁক চি পি আই (এম)ৰ পৰা বহিষ্কাৰ কৰা হৈছিল, পিছলৈ নিশিথ ভট্টাচাৰ্যৰ মৃত্যুৰ পিছত তেওঁ চি পি আই (এম এল)ৰ দ্বিতীয় কেন্দ্ৰীয় সমিতিৰ সহ-প্ৰতিষ্ঠাপক হৈছিল।
তেওঁলোকৰ নেতৃত্বত পশ্চিম বংগ চৰকাৰৰ সৈতে যুদ্ধবিৰতি চুক্তিৰ পিছত ১৯৭০ চনৰ শেষৰ ফালে বংগ আৰু বিহাৰৰ গ্ৰাম্য অঞ্চলত সমান্তৰাল বিপ্লৱী চৰকাৰ গঠনৰ চেষ্টা চলাইছিল।
তেওঁ কংগ্ৰেছ আৰু বাওঁপন্থী চৰকাৰ দিনত মুঠ ১৮ বছৰ সময় কাৰাবাস খাটিছিল।
আজিজুল হকৰ মৃত্যু কেৱল এজন ৰাজনৈতিক প্ৰবীণ সৈনিকৰ মৃত্যু নহয়, ই হৈছে বংগৰ বিপ্লৱী জগতৰ এটা যুগৰ অন্ত।
মৃত্যুৰ সময়ত তেখেতৰ বয়স আছিল ৮৩ বছৰ।
