মণিপুৰত পুনৰ হিংসাত্মক ঘটনাৰ সূত্ৰপাত হৈছে। ৰাজ্যখনৰ নোনি জিলাত মঙলবাৰে কুকি সম্প্ৰদায়ৰ দুটা গোটৰ মাজত হোৱা সংঘৰ্ষত ৫জন বিচ্ছিন্নতাবাদী নিহত হয়। মৃত্যু হোৱা পাঁচজন যুৱকক চীন কুকি মিজো সেনাবাহিনীৰ সদস্য বুলি চিনাক্ত কৰা হৈছিল। এই সংগঠনটো দুবছৰ পূৰ্বে কুকি ৰাষ্ট্ৰীয় সেনাবাহিনী (UKNA)ৰ পৰা বিচ্ছিন্ন হৈ গঠন হৈছিল।
আৰক্ষী সূত্ৰৰ পৰা জানিব পৰা মতে, জিলা সদৰ নুংবাৰ পৰা ৫০ কিলোমিটাৰ দক্ষিণে অৱস্থিত ডেইৱেংজাং গাঁৱৰ অৰণ্যত এই গুলীচালনা সংঘটিত হয়। এজন জ্যেষ্ঠ আৰক্ষী বিষয়াই কয় যে এই অঞ্চলটো মূল এলেকাৰ পৰা প্ৰায় বিচ্ছিন্ন। ইয়ালৈ যাবলৈ কোনো পথ নাই আাৰু মোবাইল নেটৱৰ্কো নাই, গতিকে আৰক্ষীয়ে সংঘৰ্ষৰ খবৰ অতি পলমকৈ পায়। খবৰ পোৱাৰ পিছত নিৰাপত্তাৰক্ষীৰ এটা দল অঞ্চলটোলৈ প্ৰেৰণ কৰে। সম্প্ৰতি ঘটনা সন্দৰ্ভত তদন্ত চলি আছে।” সূত্ৰ অনুসৰি নিহত ৫ জনেই ইউকেএনএ গোটৰ সদস্য।
মন কৰিবলগীয়া যে মণিপুৰৰ কুকী জনগোষ্ঠীৰ ৰাজনৈতিক সমাধানৰ বাবে কেন্দ্ৰীয় চৰকাৰে তাত থকা সংগঠনসমূহৰ সৈতে ‘চচপেনচন অৱ অপাৰেচন’ (এছ অ’ অ’) চুক্তিত স্বাক্ষৰ কৰিছিল। এই চুক্তি গৃহ পৰিক্ৰমা মন্ত্ৰালয়ৰ হৈ মধ্যস্থতাকাৰীৰ জৰিয়তে কৰা হৈছিল। অৱশ্যে ইউনাইটেড কুকি ৰাষ্ট্ৰীয় সেনা বা চীন কুকি মিজো সেনা এই চুক্তিৰ পক্ষ নহয়। প্ৰথম অৱস্থাত ভাৰত-ম্যানমাৰ সীমান্তত ভূখণ্ড নিয়ন্ত্ৰণক লৈ এই দুটা গোটৰ মাজত হোৱা বিবাদৰ বাবেই এই সংঘৰ্ষৰ সৃষ্টি হোৱা বুলি ধাৰণা কৰা হৈছে।
প্ৰসংগক্ৰমে ৰাজ্য খনত মেইটেই আৰু কুকি-জো জনগোষ্ঠীৰ সদস্যৰ মাজত জাতিগত হিংসা ২০২৩ চনৰ মে’ মাহৰ পৰা চলি আহিছে। য’ত ২৫০ জনতকৈ অধিক লোকৰ মৃত্যু হৈছে আৰু ৬০ হাজাৰৰো অধিক লোক স্থানচ্যুত হৈছে। যদিও সেনা নিয়োগৰ ফলত অঞ্চলটোৰ পৰিস্থিতি কিছু পৰিমাণে নিয়ন্ত্ৰণলৈ আহিছে, তথাপিও অঞ্চলটো স্বাভাৱিক অৱস্থালৈ অহা নাই। ইফালে নতুন সংঘৰ্ষই এতিয়া উদ্বেগৰ সৃষ্টি কৰিছে। সংশ্লিষ্ট এলেকাত নিৰাপত্তা বাহিনীয়ে সতৰ্কবাণী জাৰি কৰিছে।
