অসমৰ অৰ্থনীতিত কৃষিয়ে বৃহৎ অৰিহণা যোগোৱাৰ পাছতো এই বছৰ শালি খেতিৰ ভৰপক সময়ত অল্পবৃষ্টিৰ বাবে পথাৰত ছিঁৰাল ফাট দিছে যদিও হিমন্ত বিশ্ব শৰ্মা চৰকাৰে কৃষকক সকাহ দিবৰ বাবে এই পৰ্যন্ত কোনো পদক্ষেপেই লোৱা নাই। চৰকাৰৰ এই উদাসীনতাক আম আদমি পাৰ্টী অসমৰ সাংগঠনিক সম্পাদক জয়ন্ত শইকীয়াই উদ্বিগ্নতা প্ৰকাশ কৰাৰ লগতে হাল এৰি শিয়াল খেদাত ব্যস্ত হিমন্ত বিশ্ব শৰ্মা চৰকাৰক ধিক্কাৰ দিয়ে।
অসমৰ অধিকাংশ জিলাতে পানীৰ অভাৱৰ বাবে কৃষকে মূৰে-কপালে হাত দিবলগীয়া পৰিস্থিতিৰ সৃষ্টি হৈছে যদিও জলসিঞ্চন বিভাগ এতিয়াও কুম্ভকৰ্ণ নিদ্ৰাত আছে। চলিত বিত্তীয় বৰ্ষত জলসিঞ্চন বিভাগক ৯৬৪ কোটি টকা আবণ্টন দিয়া হৈছে যদিও সেই ধন ক’ত-কেনেকৈ ব্যৱহাৰ হৈছে বিভাগীয় মন্ত্ৰী অশোক সিংহলে ৰাইজক জনাব লাগে। দেশত পঞ্চবাৰ্ষিক পৰিকল্পনাৰ আৰম্ভণিতে পঞ্জাব, হাৰিয়ানাৰ দৰে ৰাজ্যই ইয়াৰ সুফল লাভ কৰিবলৈ সক্ষম হোৱাৰ বিপৰীতে অসমৰ দৰে ৰাজ্যই কৃষি অনগ্ৰসৰতাৰ মাজতে থাকি গ’ল।
অসমৰ ৪০ লাখ হেক্টৰ কৃষি ভূমিৰ মাত্ৰ ৫.৪ শতাংশতহে জলসিঞ্চন বিভাগে ঢুকি পাইছে। বিভাগে জন্মলগ্নৰে পৰা আৰম্ভ কৰা আঁচনিসমূহল ভিতৰত ১,৫৮০টা আঁচনিয়েই এতিয়া বিকল হৈ বিভাগটো বগাহাতীত পৰিণত হৈছে।আজি আপ অসমৰ ৰাজ্যিক কাৰ্যালয়ত অনুষ্ঠিত হোৱা এক সংবাদমেল সম্বোধন কৰি জয়ন্ত শইকীয়াই উল্লেখ কৰে যে যি সময়ত কৃষিক গুৰুত্ব দি চৰকাৰে ৰাজ্যৰ অৰ্থনীতিৰ বুনিয়াদ সুদৃঢ় কৰিব লাগিছিল, খিলঞ্জীয়াৰ ভৱিষ্যত সুৰক্ষিত কৰিব লাগিছিল, সেই সময়ত চৰকাৰে ২০২৬ৰ নিৰ্বাচনৰ বাবে ভোটৰ অংকত ৰাজ্যত হিন্দু-মুছলমানৰ ৰাজনীতি কৰি চৰম অকৰ্মণ্যতাৰ পৰিচয় দিছে।
