এখন ক্লিনিকে চেৰ’গেচিৰ (ভাড়াতীয়া মাতৃ) নামত আনৰ কেঁচুৱা বিক্ৰী কৰি টকা উপাৰ্জন কৰিছিল। দেওবাৰে আৰক্ষীয়ে ক্লিনিকত অভিযান চলাই এগৰাকী চিকিৎসককে ধৰি ৮জন লোকক গ্ৰেপ্তাৰ কৰে।
এই ঘটনাই হায়দৰাবাদৰ উত্তৰ মণ্ডলৰ গোপালপুৰম থানা এলেকাত আলোড়নৰ সৃষ্টি কৰিছে। এহাল দম্পতীৰ অভিযোগৰ ভিত্তিত তদন্ত আৰম্ভ কৰা হয়। আৰু তাৰ পিছত আৰক্ষীয়ে এই ক্লিনিকখন উৎখাত কৰি পেলায়।
জানিব পৰা মতে, এগৰাকী প্ৰজনন চিকিৎসকে চেৰ’গেচিৰ জৰিয়তে এহাল দম্পতীক সন্তানৰ প্ৰতিশ্ৰুতি দিছিল। অভিযোগ অনুসৰি, শেহতীয়াকৈ ডাঃ নম্ৰতাই তেওঁলোকৰ সন্তান দম্পতীহালৰ হাতত গতাই দিয়ে। তেতিয়াই আচল সত্যটো ওলাই পৰিল।
দম্পতীহালে শিশুটিৰ ডি এন এ তেওঁলোকৰ ডি এন এৰ সৈতে মিল নথকা বুলি ধৰা পেলায়। ২০২৪ চনৰ আগষ্ট মাহত সন্তান জন্ম দিয়াৰ আশাত এই দম্পতীহালে গোপালাপুৰমৰ ‘ইউনিভাৰ্চেল সুস্থী ফাৰ্টিলিটি চেণ্টাৰ’ত ডাঃ নম্ৰতাৰ ওচৰলৈ যায়।
অভিযোগ অনুসৰি চিকিৎসকে দম্পতীহালক আইভিএফৰ সলনি চেৰ’গেচি কৰিবলৈ পৰামৰ্শ দিয়ে। লগতে তেওঁ কয় যে ক্লিনিকখনে তেওঁলোকৰ বাবে এগৰাকী চেৰ’গেট (ভাড়াতীয়া) মাতৃৰ ব্যৱস্থা কৰিব।
কিছুদিন পিছত ক্লিনিকে তেওঁলোকক জনাইছিল যে তেওঁলোকে চেৰ’গেট মাতৃ বিচাৰি পাইছে আৰু ভ্ৰূণটো তেওঁৰ শৰীৰত ট্ৰান্সপ্লাণ্ট কৰা হৈছে। তাৰ ঠিক ৯ মাহৰ পাছত চলিত বৰ্ষৰ জুন মাহত ক্লিনিকখনে দম্পতীহালৰ হাতত এটা সন্তান গতাই দিয়ে।
প্ৰথমতে সন্দেহ কৰা নাছিল যদিও শেহতীয়াকৈ এই দম্পতীহালে শিশুটিক লৈ সন্দেহ প্ৰকাশ কৰিছে। শেহতীয়াকৈ দম্পতীহালে এঠাইৰ পৰা শিশুটিৰ ডি এন এ পৰীক্ষা কৰাইছিল। তেতিয়াই গোটেই সত্যটো পোহৰলৈ আহিল। পৰীক্ষাত দেখা গ’ল যে তেওঁলোকৰ কোনো এটা ডি এন এ শিশুটিৰ সৈতে মিল নাছিল।
ইয়াৰ পিছত তেওঁলোকে ক্লিনিকলৈ গৈ প্ৰতিবাদ সাব্যস্ত কৰে। অৱশ্যে তেওঁলোকক তাৰ পৰা বাহিৰলৈ উলিয়াই দিয়াত দম্পতীহালে আৰক্ষীক এজাহাৰ দাখিল কৰে। আৰক্ষীয়ে তদন্ত আৰম্ভ কৰাৰ লগে লগে চাঞ্চল্যকৰ তথ্য পোহৰলৈ আহিল।
ঘটনাৰ তদন্তৰ সময়তে আৰক্ষীয়ে গম পালে যে নম্ৰতা নামৰ চিকিৎসকজনে ভুৱা প্ৰমাণ পত্ৰ দেখুৱাই অবৈধভাৱে ক্লিনিকখন চলাই আছে। ইয়াৰ পূৰ্বে চিকিৎসাৰ ভুলৰ বাবে বহুবাৰ তেওঁৰ অনুজ্ঞাপত্ৰ বাতিল কৰা হৈছিল। ইয়াৰ পিছতো তেওঁ অবৈধভাৱে হায়দৰাবাদ, বিজয়াৱাদা আৰু বিশাখাপট্টনমত ক্লিনিক চলাই আছিল।
আৰক্ষীৰ তথ্য অনুসৰি নম্ৰতাই দম্পতীহালৰ পৰা চেৰ’গেচিৰ বাবে ৩৫ লাখ টকা লৈছিল। অৱশ্যে তেওঁ শিশুটিৰ প্ৰকৃত পিতৃ-মাতৃক মাত্ৰ ৯০ হাজাৰ টকাহে দিছিল।
আৰক্ষীৰ মতে এই প্ৰজনন কেন্দ্ৰটোত এজেণ্ট আছিল। এই এজেণ্টসকলে আগতে সেই মহিলাসকলক বিচাৰি উলিয়ায় যিসকলে টকাৰ বিনিময়ত নিজৰ সন্তানক বিক্ৰী কৰিব বিচাৰে।
জানিব পৰা মতে, শিশুটিৰ প্ৰকৃত পিতৃ-মাতৃ আছিল অসমৰ বাসিন্দা। তেওঁলোকে হায়দৰাবাদত থাকে। সেই দম্পতীৰ পৰাই কেঁচুৱাটো কিনিছিল। ইয়াৰ মাজতে হায়দৰাবাদ আৰক্ষীয়ে নম্ৰতাকে ধৰি মুঠ ৮জন লোকক গ্ৰেপ্তাৰ কৰিছে। ইয়াৰ ভিতৰত এজন এনাস্থেচিয়া বিশেষজ্ঞ আৰু শিশুটিৰ জৈৱিক পিতৃ-মাতৃও আছে।
ডাঃ নম্ৰতা আৰু অন্যান্য অভিযুক্তৰ বিৰুদ্ধে বিভিন্ন ধাৰাত গোচৰ ৰুজু কৰি আৰক্ষীয়ে তদন্ত আৰম্ভ কৰিছে।
