সাম্প্ৰতিক সময়ত অসমত চলি থকা চৰকাৰৰ স্বেচ্ছাচাৰিতা, অসুস্থ, অস্থিৰ ৰাজনৈতিক পৰিৱেশক লৈ নাৰাজ অসমৰ সচেতন নাগৰিক। বিশেষকৈ শেহতীয়াকৈ অসমৰ বিভিন্ন ঠাইত উচ্ছেদৰ নামত সাধাৰণ ৰাইজক হাৰাশাস্তি কৰি চলে-বলে-কৌশলেৰে বহিৰাগত বণিকগোষ্ঠীক অসমৰ মাটি গতাই দিবলৈ খোজাক লৈ চিন্তিত হৈ নিজ নিজৰ স্বাক্ষৰসহ এক বিবৃতি প্ৰকাশ কৰিছে অসমৰ একাংশ বুদ্ধিজীৱি তথা বিশিষ্ট ব্যক্তিয়ে। তলত উক্ত বিবৃতিটো হুবহু প্ৰকাশ কৰা হ’ল –
আমি চিন্তিত আৰু ব্যথিত
”অতি কৌশলেৰে অসমত এক সাম্প্ৰদায়িক উত্তেজনাৰ পৰিবেশ সৃষ্টি কৰিবলৈ এটা মহল উঠি পৰি লাগিছে। বণিয়াক মাটি দিয়াৰ স্বাৰ্থত, দুৰ্লভ খনিজ খননৰ স্বাৰ্থত ৰাজ্য প্ৰশাসনে জনজাতীয় আৰু পমুৱা অধ্যুষিত অঞ্চলত সমানে উচ্ছেদ চলাইছে। বৰং এতিয়ালৈকে জনজাতীয় লোকেই বেছিকৈ উচ্ছেদৰ বলি হৈছে। কিন্তু বণিয়াৰ স্বাৰ্থত উচ্ছেদৰ যোগেদি ভূমি অধিগ্ৰহণৰ কথাটো তল পেলাবলৈ শাসকীয় পক্ষই আকৌ সন্দেহযুক্ত বাংলাদেশীৰ আখ্যান আৰম্ভ কৰিছে।
উৰিয়ামঘাটৰ উচ্ছেদৰ জাননী লাভ কৰাৰ পিছত উচ্ছেদিত লোকসকল আশ্ৰয় বিচাৰি চাৰিওফালে চেদেলি ভেদেলি হৈ পৰিছে। অথচ, চৰকাৰে তেওঁলোকৰ জীৱন-জীৱিকাৰ নিৰাপত্তা সুনিশ্চিত কৰাৰ সলনি তেওঁলোকৰ বিৰুদ্ধে সন্দেহযুক্ত বাংলাদেশী নাগৰিকৰ অভিযোগ আনি অপপ্ৰচাৰ চলোৱা বাবে তেওঁলোক য’লৈকে গৈছে তাতেই হাৰাশাস্তিৰ সন্মুখীন হৈছে। আনকি কোনো কোনো ঠাইত তেওঁলোকক মাৰপিট পৰ্যন্ত কৰা হৈছে।কিন্তু তেওঁলোক বাংলাদেশী নাগৰিক বুলি কোনেও প্ৰমাণ কৰিব পৰা নাই।
পুনৰ সংস্থাপনকে আদি কৰি উচ্ছেদৰ সময়ত মানি চলিবলগীয়া যাৱতীয় নীতি-নিয়ম সম্পৰ্কে উচ্চতম ন্যায়ালয়ৰ স্পষ্ট নীতি-নিৰ্দেশনা আছে। সেইবোৰ উলংঘা কৰি উচ্ছেদিত লোকসকলক নানা ধৰণে লঘু-লাঞ্চনা কৰা হৈছে। উৰিয়াম ঘাটৰ উচ্ছেদৰ বলিসকলকলৈ সম্পূৰ্ণ ৰাজনৈতিক স্বাৰ্থত উজনি অসমৰ ঠায়ে ঠায়ে হিংসাত্মক পৰিস্থিতি সৃষ্টি কৰিবলৈ এটা মহল সক্ৰিয় হৈ পৰিছে৷ কিন্তু উচ্ছেদিত ভাৰতীয় নাগৰিকসকলৰ নিৰাপত্তা আৰু পুনৰ সংস্থাপনৰ দায়িত্ব চৰকাৰৰ।
চৰকাৰে সেই দায়িত্ব পালন কৰক। আৰু কোনো পৰিস্থিতিতেই যাতে অৱস্থাৰ অৱনতি নঘটে তাৰ প্ৰতি চৰকাৰে সতৰ্ক দৃষ্টি ৰাখক৷ জনসাধাৰণৰ সকলো অংশলৈ আমাৰ বিনম্ৰ অনুৰোধ, আপোনালোকে কেতিয়াও যেন জনৰৱ আৰু অপপ্ৰচাৰৰ দ্বাৰা প্ৰৰোচিত নহয় আৰু আইন হাতত তুলি লৈ পৰিস্থিতিৰ অধিক অৱনতি নঘটায়।”
স্বাক্ষৰকাৰীসকল:
ড০ হীৰেন গোহাঁই
ড° অপূৰ্ব কুমাৰ বৰুৱা
অজিত কুমাৰ ভূঞা
আব্দুল মান্নান
হাফিজ ৰছিদ আহমেদ চৌধুৰী
পৰেশ মালাকাৰ
ড° মনোৰমা শৰ্ম্মা
ৰবীন দত্ত
ড° ইন্দ্ৰানী দত্ত
আব্দুল চালাম
জ্যোতিৰ্ময় জানামছদ্দৰ হুছেইন
