অপাৰেচন সিন্দূৰকলৈ লোকসভাত গৰজি উঠিল লোকসভাৰ বিৰোধী দলপতি গৌৰৱ গগৈ। লোকসভাত দিয়া উদাত্ত ভাষণত কংগ্ৰেছৰ নেতাগৰাকীয়ে কয় দেশবাসীয়ে জানিব বিচাৰে পহলগাম আক্ৰমণৰ ১০০ দিন পাৰ হৈ গ’ল, তথাপিও চৰকাৰে সন্ত্ৰাসবাদীক ধৰিব পৰা নাই কিয়।
যদি তেওঁলোকক পলাবলৈ কোনেও সহায় কৰা নাছিল, তেন্তে তাৰ কোনো উত্তৰ চৰকাৰৰ হাতত কিয় নাই? লোকসভাত পহলগাম সন্ত্ৰাসবাদী আক্ৰমণ আৰু অপাৰেচন সিন্দুৰ সন্দৰ্ভত আলোচনা আৰম্ভ কৰাৰ সময়ত প্ৰতিৰক্ষা মন্ত্ৰী ৰাজনাথ সিঙে বিৰোধীক লক্ষ্য কৰি লোৱাৰ সময়তে কংগ্ৰেছৰ সাংসদ গৌৰৱ গগৈয়ে বিৰোধীৰ ফালৰ পৰা বিতৰ্ক আৰম্ভ কৰে।
তেওঁ বিতৰ্ক আৰম্ভ কৰি প্ৰতিৰক্ষা মন্ত্ৰী ৰাজনাথ সিঙক প্ৰত্যুত্তৰ দি প্ৰশ্ন কৰে যে কিয় সন্মানীয় প্ৰতিৰক্ষা মন্ত্ৰীগৰাকীয়ে সদনক কোৱা নাছিল যে কেনেকৈ পহলগামলৈ সন্ত্ৰাসবাদী আহিল? সাংসদ গগৈয়ে লগতে প্ৰশ্ন কৰে যে সেই সন্ত্ৰাসবাদীৰ উদ্দেশ্য কি আছিল সেই কথা প্ৰতিৰক্ষা মন্ত্ৰীয়ে কোৱা নাছিল। গৌৰৱ গগৈয়ে কয়, সন্ত্ৰাসবাদীৰ উদ্দেশ্য আছিল জম্মু-কাশ্মীৰৰ অৰ্থনীতি ধ্বংস কৰা আৰু দেশৰ সাম্প্ৰদায়িক তন্ত্ৰক বিভাজিত কৰা। বিৰোধীৰ উপ দলপতি গৌৰৱ গগৈয়ে আৰু কয় যে এই সত্য সদনত পৰিষ্কাৰ আহিব লাগে। পহলগাম আক্ৰমণ, অপাৰেচন সিন্দুৰ আৰু বৈদেশিক নীতিৰ সত্য ওলাই আহিব লাগে।
প্ৰতিৰক্ষা মন্ত্ৰী ৰাজনাথ সিঙে বহু তথ্য দিছিল, কিন্তু পহলগামৰ বৈসাৰণলৈ সন্ত্ৰাসবাদী কেনেকৈ আহিছিল সেই কথা কোৱা নাই। প্ৰতিৰক্ষা মন্ত্ৰীয়ে কোৱা নাই যে কেনেকৈ পাঁচজন মানুহে বৈসাৰণত প্ৰৱেশ কৰি ২৬ জন লোকক গুলীয়াই হত্যা কৰিলে। প্ৰশ্ন কৰাটো বিৰোধী হিচাপে আমাৰ কৰ্তব্য, আমি দেশৰ স্বাৰ্থত প্ৰশ্ন কৰিম। দেশে জানিব বিচাৰে পাঁচজন সন্ত্ৰাসবাদী কেনেকৈ প্ৰৱেশ কৰিলে? তেওঁ লগতে প্ৰশ্ন কৰে যে পহলগাম আক্ৰমণৰ ১০০ দিন পাৰ হৈ গ’ল, কিন্তু এই চৰকাৰে সন্ত্ৰাসবাদীক কিয় ধৰিব পৰা নাই? গৌৰৱ গগৈয়ে লগতে প্ৰশ্ন কৰে ভাৰতীয় সেনাই কিয় পাকিস্তানৰ দখলত থকা কাশ্মীৰ দখল কৰা নাছিল? সাংসদ গগৈয়ে আৰু কয়, ৰাজনাথ সিঙে কৈছিল যে আমাৰ উদ্দেশ্য যুদ্ধ নহয়। গগৈয়ে কয় আজি যদি আমি পাক অধিকৃত কাশ্মীৰ দখল কৰি নলওঁ, তেন্তে আমি কেতিয়া লম?
