সোমবাৰে নামনি ছিয়াং জিলাৰ গেংগী, ছিবাৰিট, টাংগো, ডিটেন, ওছুমপুৰী আৰু দুৰ্পাই গাঁৱৰ বাসিন্দাসকলে ৰাষ্ট্ৰীয় জলবিদ্যুৎ নিগম লিমিটেড (এন এইচ পি চি)ৰ বিৰুদ্ধে প্ৰতিবাদ সাব্যস্ত কৰে। এন এইচ পি চিয়ে গেৰোকামুখত সুবনশিৰি নিম্ন জলবিদ্যুৎ প্ৰকল্পৰ তিনিটা ইউনিট (২৫০ মেগাৱাটকৈ) স্থাপনৰ বাবে ৰাষ্ট্ৰীয় বান্ধ সুৰক্ষা প্ৰাধিকৰণৰ পৰা অনুমতি বিচৰাত ক্ষুব্ধ হৈ পৰিছে স্থানীয় ৰাইজ।
গাঁওবাসীয়ে অৰুণাচল প্ৰদেশ পুনৰ্বাসন আৰু পুনৰ সংস্থাপন নীতি, ২০০৮ৰ অধীনত ভূমি অধিগ্ৰহণ আৰু ন্যায্য ক্ষতিপূৰণ সম্পৰ্কীয় বিষয়সমূহ কোনো ধৰণৰ নিষ্কাশনৰ পূৰ্বে সমাধান কৰিবলৈ দাবী জনায়। ২০০১ চনত অৰুণাচল প্ৰদেশ চৰকাৰৰ সৈতে স্বাক্ষৰিত চুক্তি উলংঘা কৰা বুলিও অভিযোগ উত্থাপন কৰে প্ৰতিবাদকাৰী সকলে।
প্ৰতিবাদকাৰীৰ মতে, নামানি ছিয়াং জিলাৰ ১২২৫ হেক্টৰ ওপৰৰ নদী এলেকা ডুব গৈছে যদিও কাঠবিহীন বনজ উৎপাদন, ঔষধি উদ্ভিদ, কৃষি, উদ্যান শস্য, বনৌষধি আৰু ফলমূলৰ গছৰ ক্ষতিৰ ক্ষতিপূৰণ এন এইচ পি চিয়ে প্ৰদান কৰা নাই। লগতে এন এইচ পি চিয়ে চুক্তি উলংঘা কৰি, আইনী অধিগ্ৰহণ অবিহনে ২০৪১ হেক্টৰ মাটি দখল কৰাৰ অভিযোগ উত্থাপন কৰে।
এন এইচ পি চিয়ে ক্ষতিগ্ৰস্ত জনগোষ্ঠীৰ স্বাৰ্থক আওকাণ কৰাৰ অভিযোগ উত্থাপন কৰি গাঁওবাসীয়ে অৰুণাচল প্ৰদেশ চৰকাৰক হস্তক্ষেপ কৰিবলৈ আহ্বান জনাইছে। ভূমি অধিগ্ৰহণৰ ক্ষেত্ৰত ন্যায্য ক্ষতিপূৰণ আৰু স্বচ্ছতাৰ অধিকাৰ ভূমি অধিগ্ৰহণ, পুনৰ্বাসন আৰু পুনৰ সংস্থাপন আইন অনুসৰি ভূমি অধিগ্ৰহণৰ বিষয়সমূহ নিষ্পত্তি নোহোৱালৈকে ৰাষ্ট্ৰীয় বান্ধ সুৰক্ষা কৰ্তৃপক্ষক অনুমোদন নিদিবলৈ আহ্বান জনাইছে।
