উপযুক্ত প্ৰাৰ্থী থকাৰ পিছতো অৱসৰ প্ৰাপ্ত শিক্ষক নিযুক্তিৰে খালি হৈ থকা পদসমূহ পূৰণ কৰাৰ প্ৰতিযোগিতাত নামি পৰিছে বিজেপি নেতৃত্বাধীন চৰকাৰ। অসম চৰকাৰে ৰাজ্যখনত খালি হৈ থকা শিক্ষকৰ অৱসৰ প্ৰাপ্ত অধ্যাপকৰ জড়িয়তে পূৰণ কৰাৰ সিদ্ধান্ত গ্ৰহণ কৰিছে আৰু এই সিদ্ধান্ত কোনো প্ৰকাৰে সলনি নহয় বুলি সংবাদ মাধ্যমৰ জড়িয়তে সদৰী কৰিছে।
শেহতীয়া খবৰ অনুসৰি জ্ঞজৰাটৰ চৰকাৰী মাধ্যমিক আৰু উচ্চতৰ মাধ্যমিক বিদ্যালয়সমূহতো অৱসৰপ্ৰাপ্ত শিক্ষক নিযুক্তিৰ সিদ্ধান্ত গ্ৰহণ কৰিছিল এই সিদ্ধান্তৰ বাবে তীব্ৰ প্ৰতিবাদ, সমালোচনাৰ পিছত গুজৰাটৰ ভাৰতীয় জনতা পাৰ্টি চৰকাৰে এই সিদ্ধান্ত প্ৰত্যাহাৰ কৰা বুলি জানিব পৰা গৈছে।
প্ৰকাশিত তথ্য অনুসৰি নিয়মীয়া শিক্ষক আৰু টিউটৰ নিযুক্তি সম্পূৰ্ণ হোৱাৰ পিছতো খালী পদ বাকী থকাৰ বাবে চৰকাৰে অৱসৰপ্ৰাপ্ত শিক্ষক নিযুক্তিৰ প্ৰস্তাৱ দিছিল। সেই মৰ্মে গুজৰাট শিক্ষা বিভাগে ২০২৫ চনৰ ২৫ জুলাইত এখন চক্ৰান্তমূলক জাৰি কৰি ১১ মাহৰ চুক্তিৰ অধীনত অৱসৰপ্ৰাপ্ত শিক্ষক নিযুক্তিৰ অনুমতি প্ৰদান কৰে।
সহস্ৰাধিক যোগ্য প্ৰাৰ্থীয়ে স্থায়ী চাকৰিৰ বাবে অপেক্ষা কৰি থকাৰ পিছতো ৰাজ্য চৰকাৰে এই সিদ্ধান্ত গ্ৰহণ কৰিছিল যদিও সফল নহ’ল চৰকাৰ খনৰ এই পদক্ষেপ। প্ৰতিবাদৰ মাজতে বিৰোধী কংগ্ৰেছেও সমগ্ৰ খণ্ডটোক “লেতেৰা খেল” বুলি অভিহিত কৰি চৰকাৰক আক্ৰমণ কৰে।
চৰকাৰৰ এনে কাৰ্যক সমালোচনা কৰি কংগ্ৰেছৰ মুখপাত্ৰ হীৰেন বেংকাৰে কয় যে, ‘৫০ হাজাৰতকৈ অধিক টেট উত্তীৰ্ণ যুৱকে চাকৰিৰ বাবে অপেক্ষা কৰি আছে, আৰু ৩০ হাজাৰৰো অধিক পদ খালী হৈ আছে, তথাপিও চৰকাৰে অৱসৰপ্ৰাপ্ত শিক্ষকক অস্থায়ী ঠিকা দিবলৈ লৈছিল।
ইণ্ডিয়ান এক্সপ্ৰেছে প্ৰকাশ কৰা প্ৰতিবেদন অনুসৰি কোৱা এই প্ৰতিবাদৰ ফলস্বৰূপে চৰকাৰে ৪৮ ঘণ্টাৰ ভিতৰতে এই সিদ্ধান্ত প্ৰত্যাহাৰ কৰে। এটা নতুন চৰকাৰী বিজ্ঞপ্তিযোগে চৰকাৰখনে এই সিদ্ধান্ত প্ৰত্যাহাৰ কৰা কথা সদৰী কৰিছে।
