বিতৰ্কিত বেটিং এপ প্ৰচাৰ গোচৰত ইডিয়ে চমন কৰাৰ পিছত বুধবাৰে হায়দৰাবাদৰ ইডিৰ কাৰ্যালয়ত হাজিৰ হয় দক্ষিণৰ প্ৰবীণ অভিনেতা প্ৰকাশ ৰাজ।
ইডিৰ সূত্ৰই জনোৱা মতে, তেওঁক তদন্তত সহযোগ কৰিবলৈ মাতি অনা হৈছে।
ইতিমধ্যে কেন্দ্ৰীয় তদন্তকাৰী সংস্থাই এই গোচৰত দক্ষিণৰ কেইবাজনো অভিনেতাক চমন কৰিছে।
অবৈধ বেটিং এপ প্ৰচাৰ কৰি কোটি কোটি টকা লোৱাৰ অভিযোগ উত্থাপন হৈছে বহু তাৰকাৰ বিৰুদ্ধে।
ইতিমধ্যে ইডিয়ে জনাইছে যে এই গোচৰত প্ৰকাশ ৰাজৰ উপৰিও বিজয় দেৱেৰাকোণ্ডা, ৰাণা ডাগ্গুবাটি আৰু লক্ষ্মী মাঞ্চুক সোধা-পোছাৰ বাবে মাতি অনা হৈছে। ২৩ জুলাইত ৰাণা ডাগ্গুবাটীক চমন কৰা হৈছিল। প্ৰকাশ ৰাজক ৩০ জুলাইত (আজি) চমন কৰা হৈছিল। ৬ আগষ্টত বিজয় দেৱেৰাকোণ্ডা আৰু ১৩ আগষ্টত লক্ষ্মী মাঞ্চুক চমন দিয়া হৈছিল।
এই তালিকাত আছে দক্ষিণৰ আন বহু তাৰকাৰ নাম। সেই সকল হৈছে – প্ৰনিতা সুভাষ, নিধি আগৰৱাল, অন্নয় নাগল্লা, শ্ৰীমুখী, সাই পল্লৱী, ঋতু চৌধুৰী, ‘টেষ্টি তেজা’, শ্যামলা, হৰ্ষ সাই, ভাইয়া ছানী যাদৱ, বিষ্ণু প্ৰিয়া, ইমৰাণ খান আদি।
এই সকলো চেলিব্ৰিটিৰ বিৰুদ্ধে ধন সৰবৰাহৰ প্ৰতিৰোধ আইন (পিএমএলএ)ৰ অধীনত গোচৰ ৰুজু কৰা হৈছে বুলি ইডিয়ে জানিবলৈ দিয়ে।
অভিযোগ কৰা হৈছে যে তেওঁলোকে ছ’চিয়েল মিডিয়াত বেটিং এপ প্ৰচাৰ কৰি সাধাৰণ মানুহক প্ৰলোভিত কৰিছে।
এফআইআৰত উল্লেখ কৰা হৈছে যে এই এপসমূহে বিপুল পৰিমাণৰ ধনৰ লেনদেন কৰে আৰু চেলিব্ৰিটিসকলে ছ’চিয়েল মিডিয়াত প্ৰচাৰ কৰাৰ বাবে বহু লোক এই ফান্দত পৰিছে।
ইডিৰ সূত্ৰৰ মতে, তদন্তৰ পৰা দেখা গৈছে যে এই তাৰকাসকলক ছ’চিয়েল মিডিয়াত প্ৰচাৰমূলক বিষয়বস্তু পোষ্ট কৰিবলৈ এপটোৱে বৃহৎ পৰিমাণৰ ধন দিছিল।
