আখৰ কিয় বেয়া হ’ব! এগৰাকী শিক্ষকে তৃতীয় শ্ৰেণীৰ ছাত্ৰৰ হাতৰ আখৰ বেয়া হোৱাৰ বাবে হাত জ্বলাই দিয়াৰ অভিযোগ উত্থাপন হৈছে। এতিয়া ছাত্ৰ জনৰ অভিভাৱকে শিক্ষক জনৰ বিৰুদ্ধে এজাহাৰ দাখিল কৰিছে।
ঘটনা অনুসৰি, মুম্বাইৰ মালাদ অঞ্চলৰ অভিযুক্ত ৰাজশ্ৰী ৰাথোৰ নামৰ শিক্ষক জনে ২৮ জুলাইৰ নিশা প্ৰায় ৯ বজাত ছাত্ৰজনৰ পিতৃক ফোন কৰি জনায় যে তেওঁৰ পুত্ৰই বহুত কান্দিছে আৰু তাক খৰধৰকৈ ঘৰলৈ লৈ যাবলৈ কয়। ছাত্ৰজনৰ দেউতাক ততালিকে শিক্ষকৰ ঘৰত উপস্থিত হৈ পুত্ৰক ঘৰলৈ লৈ যায়। ঘৰ পোৱাৰ পিছত শিশুটিয়ে দেউতাকক জনায় যে তেওঁৰ হাতৰ আখৰ বেয়া হোৱাৰ কাৰণে শিক্ষকে শাস্তি হিচাপে জ্বলি থকা চাকিৰ ওপৰত তেওঁৰ সোঁহাতখন ৰখাইছিল, যাৰ ফলত হাতত আঘাত প্ৰাপ্ত হয়।
ছাত্ৰজনৰ পিতৃয়ে ততালিকে তেওঁক চিকিৎসালয়লৈ লৈ যায়। ইয়াৰ পিছত তেওঁ থানাত উপস্থিত হৈ শিক্ষক ৰাথোৰৰ বিৰুদ্ধে এজাহাৰ দাখিল কৰে। আৰক্ষীৰ সূত্ৰ অনুসৰি, ছাত্ৰজনে প্ৰতিদিনে সন্ধিয়া ৭ বজাৰ পৰা নিশা ৯ বজালৈ ৰাথোৰৰ ঘৰত টিউশ্যনৰ বাবে পঢ়িবলৈ যায়। সাধাৰণতে তেওঁৰ ভনীয়েকেও তাৰ লগত পঢ়িবলৈ যায়, কিন্তু ঘটনাৰ দিনা ভনীয়েক উপস্থিত নাছিল।
এই ঘটনাই অঞ্চলটোত তীব্ৰ প্ৰতিক্ৰিয়াৰ সৃষ্টি কৰিছে। জানিব পৰা মতে আৰক্ষীয়ে গোচৰটোৰ তদন্ত আৰম্ভ কৰিছে আৰু অভিযুক্ত শিক্ষকৰ বিৰুদ্ধে আইনী ব্যৱস্থা গ্ৰহণৰ প্ৰক্ৰিয়া চলি আছে।
