এগৰাকী গৃহ পৰিচাৰিকাক ধৰ্ষণ কৰাৰ গোচৰত কৰ্ণাটকৰ জে ডি এছৰ প্ৰাক্তন সাংসদ প্ৰজ্জ্বল ৰেভান্নাক দোষী সাব্যস্ত কৰা হৈছে। প্ৰজ্জ্বল ভাৰতৰ প্ৰাক্তন প্ৰধানমন্ত্ৰী এইচ ডি দেৱগৌড়াৰ নাতি।
শুকুৰবাৰে বেংগালুৰুৰ এখন বিশেষ আদালতে ৰেভান্নাক দোষী সাব্যস্ত কৰে। হাছান জিলাৰ এখন থানাত প্ৰজ্জ্বল ৰেভান্নাৰ বিৰুদ্ধে ধৰ্ষণৰ গোচৰ ৰুজু কৰা হৈছিল।
যোৱা বছৰ ৰেভান্নাৰ বিৰুদ্ধে ৪টা গোচৰ ৰুজু হৈছিল। তদন্তৰ সময়ত উদ্ধাৰ হৈছিল হাজাৰ হাজাৰ আপত্তিজনক ভিডিঅ’ ক্লিপ। প্ৰজ্জ্বল ৰেভান্নাৰ বিৰুদ্ধে কেইবাগৰাকীও মহিলাক যৌন নিৰ্যাতন চলোৱা আৰু তাৰ পিছত ব্লেকমেইলিঙৰ অভিযোগ উত্থাপন কৰিছিল।
উল্লেখ্য যে যোৱা বছৰ আগষ্ট মাহত বিশেষ তদন্তকাৰী দলে কৰ্ণাটকৰ জে ডি এছৰ প্ৰাক্তন সাংসদ প্ৰজ্বল ৰেভান্না আৰু তেওঁৰ পিতৃ তথা প্ৰাক্তন বিধায়ক এইচ ডি ৰেভান্নাৰ বিৰুদ্ধে অভিযোগনামা দাখিল কৰিছিল।
এই দীঘলীয়া অভিযোগনামাত প্ৰজ্জ্বলৰ বিৰুদ্ধে সৰ্বোচ্চ অভিযোগ হৈছে ৪৭ বছৰীয়া এগৰাকী প্ৰাক্তন গৃহ পৰিচাৰিকাক ধৰ্ষণ কৰা। লগতে সেই গৃহ পৰিচাৰিকা গৰাকীৰ কন্যাকো যৌন নিৰ্যাতন চলাইছিল প্ৰজ্জ্বল ৰেভান্নাই।
কেৱল এয়াই নহয়, যৌন কাৰ্যকলাপৰ ভিডিঅ’ ৰেকৰ্ডিং কৰি পিছত প্ৰমাণ নষ্ট কৰাৰ উদ্দেশ্যেৰে সেই ভিডিঅ’ ডিলিট কৰিছিল ৰেভান্নাই।
জিডিএছৰ প্ৰাক্তন বিধায়ক তথা প্ৰাক্তন মুখ্যমন্ত্ৰী এইচডি কুমাৰস্বামীৰ ভাতৃ তথা প্ৰজ্জ্বলৰ পিতৃ এইচডি ৰেভান্নাৰ বিৰুদ্ধেও এছআইটিয়ে অভিযোগনামা দাখিল কৰিছিল। লগতে কেইবাবাৰো গৃহকৰ্মীক যৌন নিৰ্যাতনৰ অভিযোগ উত্থাপন হৈছিল।
যোৱা বছৰৰ এপ্ৰিল মাহত লোকসভা নিৰ্বাচনৰ প্ৰাকমুহূৰ্তত এই যৌন কেলেংকাৰীয়ে সমগ্ৰ দেশত এক হুলস্থূলীয়া পৰিস্থিতিৰ সৃষ্টি কৰিছিল। সমগ্ৰ দেশতেই ইয়াৰ প্ৰতিবাদ হৈছিল।
আদালতে প্ৰজ্জ্বলৰ বিৰুদ্ধে ধৰ্ষণ, যৌন নিৰ্যাতন, অসংখ্য মহিলাক নিৰ্যাতন আৰু শাৰীৰিক আক্ৰমণৰ অভিযোগ উত্থাপন কৰিছে। অৱশ্যে তেওঁৰ বিৰুদ্ধে মাত্ৰ চাৰিখন এজাহাৰহে দাখিল কৰা হয়।
এই ঘটনা পোহৰলৈ অহাৰ পাছত যোৱা বছৰ ২৬ এপ্ৰিলত জাৰ্মানীলৈ পলায়ন কৰিছিল প্ৰজ্জ্বলে।
তাৰপিছতে ৩১ মে’ত ভাৰতলৈ উভতি অহাৰ লগে লগে আৰক্ষীয়ে বিমানবন্দৰৰ পৰাই তেওঁক গ্ৰেপ্তাৰ কৰে। বৰ্তমান প্ৰজ্জ্বল বেংগালুৰুৰ এখন কাৰাগাৰত বন্দী হৈ আছে।
আদালতত বিশেষ তদন্ত কমিটিয়ে ২১৪৪ পৃষ্ঠাৰ চাৰ্জশ্বীট দাখিল কৰিছিল। য’ত প্ৰায় ১৫০ জন লোকৰ সাক্ষ্য লিপিবদ্ধ কৰা হৈছিল। এছ আই টিৰ চাৰ্জশ্বীটত প্ৰজ্জ্বলে চাৰিগৰাকী মহিলাক ধৰ্ষণ কৰা বুলি উল্লেখ আছে। লগতে ৭০ গৰাকী মহিলাৰ সৈতে যৌন কাৰ্যকলাপৰ ভিডিঅ’ ৰেকৰ্ডিং কৰিছে। তেওঁ প্ৰায় ২০০০টা এনে ভিডিঅ’ ক্লিপ নিৰ্মাণ কৰিছিল।
