২০০৮ চনৰ মালেগাঁও বিস্ফোৰণৰ তদন্তৰ সময়ত ৰাষ্ট্ৰীয় স্বয়ংসেৱক সংঘৰ মুৰব্বী মোহন ভাগৱতক গ্ৰেপ্তাৰ কৰিবলৈ নিৰ্দেশ দিয়া হৈছিল। এই গোচৰৰ NIA আদালতে ৭জন লোকক দোষমুক্ত কৰাৰ পিছত মহাৰাষ্ট্ৰ এণ্টি টেৰৰিজম স্কোয়াডৰ প্ৰাক্তন বিষয়া মেহবুব মুজাৱাৰে এই চাঞ্চল্যকৰ অভিযোগ উত্থাপন কৰিছে।
তেওঁ দাবী কৰে যে তদন্তক ভুল দিশলৈ লৈ যোৱাৰ চেষ্টা কৰা হৈছিল। মুজাৱাৰে কয়, ‘মালেগাওঁ বিস্ফোৰণৰ তেতিয়াৰ মুখ্য তদন্তকাৰী বিষয়া পৰবীৰ সিঙে মোক আৰ এছ এছৰ মুৰব্বী মোহন ভাগৱতক গ্ৰেপ্তাৰ কৰিবলৈ নিৰ্দেশ দিছিল।’ তেওঁ লগতে কয় যে ‘মালেগাওঁ বোমা বিস্ফোৰণৰ ভুৱা তদন্তৰ চেষ্টা চলাইছিল যদিও মই তাৰ বাবে সাজু নাছিলোঁ।এই গোচৰত মোৰ বিৰুদ্ধে ভুৱা গোচৰ ৰুজু হৈছিল যদিও পিছত মোক দোষমুক্ত কৰা হৈছিল।’ মুজাৱাৰে কয়, ‘সেই তদন্ত ভুৱা আছিল। মোক মৃত লোককেইজনক জীৱিত বুলি দেখুৱাই চাৰ্জশ্বীট জমা দিবলৈ কোৱা হৈছিল।মই নাকচ কৰাৰ সময়ত মোৰ বিৰুদ্ধে মিছা গোচৰ ৰুজু হৈছিল। পাছত সেই গোচৰবোৰত মোক দোষমুক্ত কৰা হৈছিল।’
উল্লেখ্য যে, ২০০৮ চনৰ ২৯ ছেপ্টেম্বৰৰ নিশা মহাৰাষ্ট্ৰৰ নাছিক জিলাৰ মালেগাঁও চহৰত ভয়ংকৰ বিস্ফোৰণ সংঘটিত হয়। ছয়জন লোকৰ মৃত্যু হয়। শতাধিক লোক আহত হয়। তদন্তত প্ৰকাশ পাইছিল যে মালেগাঁও চহৰৰ এটা মছজিদৰ সমীপৰ এটা কবৰস্থানত দুটা বোমা কঢ়িয়াই অনা মটৰবাইক স্থাপন কৰা হৈছে। সেইটোৱেই বিস্ফোৰণৰ কাৰণ। মহাৰাষ্ট্ৰৰ সন্ত্ৰাসবাদ বিৰোধী দলে প্ৰথমে কয় যে, এই বিস্ফোৰণৰ আঁৰত এটা হিন্দুত্ববাদী সংগঠন আছে। যিখন মটৰবাইকত বোমাটো স্থাপন কৰা হৈছিল সেই মটৰবাইকখন বিজেপিৰ প্ৰাক্তন সাংসদ প্ৰজ্ঞা ঠাকুৰৰ নামত পঞ্জীয়ন কৰা হৈছিল। ইয়াৰ পাছত এজন এজনকৈ ৭জন অভিযুক্তক গ্ৰেপ্তাৰ কৰা হয়।
