ব্ৰিটিছ অভিনেতা টেৰেন্স ষ্টেম্পৰ দেহাৱসান ঘটিছে। দেওবাৰে পুৱা তেওঁৰ মৃত্যু হয়। তেওঁৰ বয়স আছিল ৮৭ বছৰ। ‘ছুপাৰমেন’ ছিৰিজত তেওঁ কিংবদন্তি খলনায়ক জেনেৰেল জোডৰ চৰিত্ৰত অভিনয় কৰিছিল। এই চৰিত্ৰৰে তেওঁ বিশ্বৰ দৰ্শকৰ হৃদয়ত স্থান লাভ কৰিছিল।
ষ্টেম্পৰ অভিনয় কেৰিয়াৰ ছয় দশকজুৰি চলিছিল। অস্কাৰৰ বাবে মনোনীত অভিনেতাগৰাকীয়ে ‘দ্য এডভেঞ্চাৰছ অৱ প্ৰিচিলা’, ‘কুইন অৱ দ্য ডেজাৰ্ট’, ‘ফাৰ ফ্ৰম দ্য মেডিং ক্ৰাউড’, ‘ভেলকাইৰী’ আদি অসংখ্য ছবিত অভিনয় কৰিছিল।
ষ্টেম্পৰ পৰিয়ালে এক বিবৃতিত কয় যে, “টেৰেন্স ষ্টেম্পে অভিনেতা আৰু লেখক হিচাপে এৰি থৈ যোৱা অসাধাৰণ উত্তৰাধিকাৰীয়ে বহু বছৰ ধৰি মানুহক স্পৰ্শ কৰিব।”
বাফটাই কয় যে ষ্টেম্পৰ মৃত্যুত তেওঁলোক গভীৰভাৱে ব্যথিত। “ছুপাৰমেন”ৰ সহ অভিনেত্ৰী চাৰা ডগলাছে তেওঁক স্মৰণ কৰি লিখিছে, “টেৰেন্স আছিল এজন অসাধাৰণ সুদৰ্শন আৰু প্ৰতিভাৱান ব্যক্তি। তেওঁৰ পৰা মই ইমানখিনি শিকিলোঁ। মোৰ কেৰিয়াৰৰ আৰম্ভণিতে কেইবামাহো ধৰি তেওঁৰ সংগ পোৱাটো এটা বিৰল সৌভাগ্য আছিল। আজি মোৰ অন্তৰ গভীৰ দুখেৰে ভৰি পৰিছে।”
১৯৩৮ চনৰ ২২ জুলাইত লণ্ডনৰ ইষ্ট এণ্ডৰ ষ্টেপনীত জন্মগ্ৰহণ কৰিছিল টেৰেন্স ষ্টেম্পে। তেওঁ আছিল এটা সাধাৰণ শ্ৰমিক পৰিয়ালৰ সন্তান। গ্ৰামাৰ স্কুলত পঢ়া-শুনা কৰাৰ পিছত প্ৰথমে বিজ্ঞাপন সংস্থাত কাম কৰিছিল। পিছলৈ নাট্য বিদ্যালয়লৈ বৃত্তি লাভ কৰি অভিনয় জগতত যোগদান কৰে।
১৯৬২ চনত “বিলি বাড” ছবিখনত মুখ্য চৰিত্ৰত অভিনয় কৰি তেওঁ নিশাটোৰ ভিতৰতে তাৰকা হৈ পৰে। ছবিখনে শ্ৰেষ্ঠ সহযোগী অভিনেতাৰ বাবে অস্কাৰৰ মনোনয়ন আৰু শ্ৰেষ্ঠ নৱাগত অভিনেতাৰ বাবে গোল্ডেন গ্ল’ব লাভ কৰে।
পিছলৈ ‘ছুপাৰমেন’ আৰু ‘ছুপাৰমেন ২’ত জেনেৰেল জোড, ‘দ্য কলেক্টৰ’ত অপহৰণকাৰী ফ্ৰেডী ক্লেগ, ‘ফাৰ ফ্ৰম দ্য মেডিং ক্ৰাউড’ত চাৰ্জেণ্ট ট্ৰয়কে ধৰি পৰ্দাত খলনায়ক চৰিত্ৰত অভিনয় কৰি খ্যাতি অৰ্জন কৰে।
১৯৬০ চনত কেৱল অভিনয়ৰ বাবেই নহয়, সুদৰ্শন ৰূপ, ফেশ্বন চেন্স আৰু তাৰকাৰে ভৰা প্ৰেম কাহিনীৰ বাবেও তেওঁ বাতৰিৰ শিৰোনাম দখল কৰিছিল। অভিনেত্ৰী জুলি ক্ৰীষ্টিৰ সৈতে তেওঁৰ প্ৰেমৰ সম্পৰ্ক ‘ৱাটাৰলু ছানচেট’ গীতটোত অমৰ হৈ পৰিছে—‘টেৰী মিটছ জুলি’ শাৰীটো তেওঁলোকৰ বাবে লিখা বুলি কোৱা হৈছিল। ছুপাৰ মডেল জিন শ্ৰিম্পটনৰ সৈতে তেওঁৰ সম্পৰ্কও শিৰোনামত আছিল।
শ্বেন কনেৰীৰ পিছত তেওঁক জেমছ বণ্ডৰ চৰিত্ৰৰ বাবে বিবেচনা কৰা হৈছিল। ষ্টেম্পে নিজেই কৈছিল, “মই আৰু দ্বিতীয়বাৰৰ বাবে ফোন পোৱা নাছিলো।”
১৯৬০ চনৰ শেষৰ ফালে যেতিয়া তেওঁৰ জনপ্ৰিয়তা কমি আহিল, তেতিয়া তেওঁ ইটালীত পিয়ৰ পাওলো পাছলিনি আৰু ফেডেৰিকো ফেলিনিৰ দৰে পৰিচালকৰ সৈতে কাম কৰে। তেওঁ অভিনয়ৰ পৰা আঁতৰি ভাৰতলৈ গুচি আহি যোগাসন শিকি আধ্যাত্মিক আশ্ৰমত সময় কটায়।
কিন্তু ১৯৭৬ চনত ‘ছুপাৰমেন’ত জেনেৰেল জোডৰ ভূমিকাই তেওঁক পুনৰ মূলসুঁতিৰ চিনেমালৈ আনে। ইয়াৰ পিছত তেওঁক ‘ষ্টাৰ ৱাৰ্ছ: দ্য ফেণ্টম মেনেচ’, ‘ৱাল ষ্ট্ৰীট’, ‘দ্য এডজাষ্টমেণ্ট ব্যুৰো’, ‘লাষ্ট নাইট ইন ছ’হো’কে ধৰি বহুকেইখন ছবিত দেখা গৈছিল।
১৯৯৪ চনত অষ্ট্ৰেলিয়াৰ ‘দ্য এডভেঞ্চাৰছ অৱ প্ৰিচিলা’, ‘কুইন অৱ দ্য ডেজাৰ্ট’ ছবিখনত হিজড়া মহিলা হিচাপে অভিনয় কৰা অভিনয়ে ব্যাপক প্ৰশংসা লাভ কৰে। ছবিখনে তেওঁক বাফটা আৰু গোল্ডেন গ্ল’বৰ মনোনয়ন আনি দিয়ে।
যোৱা বছৰ ছবিখনৰ পৰিচালক ষ্টিফেন ইলিয়টে কৈছিল যে তেওঁ ৮৫ বছৰ বয়সতো “আটাইতকৈ ফিট মানুহ” আছিল। ষ্টেম্পে হেনো কৈছিল “কাহিনীটো এতিয়াও শেষ হোৱা নাই।”
