অসমৰ প্ৰথিতযশা ইংৰাজী বাতৰিকাকত তথা উঃপূঃৰ সৰ্বপ্ৰচলিত বাতৰিকাকত, ৮৬ বৰ্ষ গৰকা, সিংহ পুৰুষ ৰাধাগোবিন্দ বৰুৱাৰ স্থাপিত “The Assam Tribune” বাতৰিকাকত খন অসমৰ পূৰ্বৰ মুখ্যমন্ত্ৰী, বৰ্তমানৰ কেন্দ্ৰীয় মন্ত্ৰী সৰ্বানন্দ সোণোৱালে ক্ৰয় কৰিবলৈ আগবঢ়া খবৰে সচেতন মহলত জোকাৰণিৰ সৃষ্টি কৰিছে৷ সংবাদমহললৈ প্ৰেৰণ কৰা এক প্ৰেছ বিজ্ঞপ্তিৰ জৰিয়তে আম আদমি পাৰ্টীৰ ৰাষ্ট্ৰীয় যুটীয়া সম্পাদক, অসমৰ ভাৰপ্ৰাপ্ত সভাপতি ডা° ভবেন চৌধুৰীয়ে উদ্বেগ প্ৰকাশ কৰি কয় যে ১৯৩৯ চনৰ ৪ আগষ্টত প্ৰতিস্থিত জনপ্ৰিয় বাতৰিকাকত দ্যা আসাম ট্ৰিবিউন বিজেপিৰ মন্ত্ৰী সৰ্বানন্দ সোণোৱালৰ হাতত বিক্ৰী যোৱাটো গণতন্ত্ৰৰ বাবে অশনি সংকেত৷ বিজেপিয়ে বৰ্তমান সময়ত গণতন্ত্ৰৰ চতুৰ্থ স্তম্ভ ৰ ওপৰত কৰা নিৰবিচিন্ন আঘাতে তথ্যৰ প্ৰবাহত ব্যাঘাত জন্মাই বিজেপিৰ প্ৰপগেণ্ডা আৰু নেৰেটিভ সৃষ্টিৰ মাথোঁ এক আহিলা হিচাপে ব্যৱহাৰ কৰাৰ ষড়যন্ত্ৰ কৰিছে৷
আনকি সিংহ পুৰুষ ৰাধাগোবিন্দ বৰুৱাৰ নেতৃত্বত স্থাপন হোৱা প্ৰখ্যাত নেহৰু ষ্টেডিয়ামৰ আৰ জি বৰুৱা ভৱনক পৰবৰ্তী সময়ত লেণ্ডমাৰ্ক হোটেললৈ পৰ্যবসিত কৰাৰ পিছত এতিয়া সেই স্থান ও বিক্ৰী কৰিবলৈ আগবাঢ়িছে অসম চৰকাৰ৷ ডা° চৌধুৰীয়ে কয় যে সিংহ পুৰুষ ৰাধাগোবিন্দ বৰুৱাৰ লিগেছিৰ ওপৰত যেন পৰিকল্পিত আক্ৰমণৰ লক্ষ্য কৰিছে ভাৰতীয় জনতা পাৰ্টীয়ে৷ বৰ্তমানৰ স্বতাধিকাৰীলৈ The Assam Tribune খনি ৰাজনৈতিক ষড়যন্ত্ৰৰ বলি নকৰিবলৈ আহ্বান জনাইছে আপ অসমে৷ আনহাতে হোটেল লেণ্ডমাৰ্ক বিক্ৰী কৰাৰ ষড়যন্ত্ৰৰ তীব্ৰ বিৰোধিতা কৰিছে ডা° ভবেন চৌধুৰীয়ে৷
