ক্ৰিকেট অনুৰাগীৰ মাজত ভাৰতৰ এছিয়া কাপৰ দলক লৈ চৰ্চা চলি আছে। তাৰ মাজতে খবৰৰ শিৰোনামত অজিংক্য ৰাহানে। নতুন ঘৰুৱা ক্ৰিকেট ছিজন আৰম্ভ হোৱাৰ পূৰ্বে তেওঁ অধিনায়ক পদৰ পৰা পদত্যাগ কৰে। পৰৱৰ্তী ছিজনত তেওঁক পুনৰ মুম্বাইত নেতৃত্ব দিয়া দেখা নাযাব।
২০১৮-১৯ বৰ্ষত মুম্বাইৰ অধিনায়ক হৈছিল ৰাহানে। তেওঁৰ নেতৃত্বত এই ৭ বছৰত মুম্বাইয়ে কেইবাখনো গুৰুত্বপূৰ্ণ প্ৰতিযোগিতাত জয়লাভ কৰিছে। বৃহস্পতিবাৰে ছ’চিয়েল মিডিয়াত এটা পোষ্ট যোগে ৰাহানেই অধিনায়ক পদৰ পৰা পদত্যাগ কৰাৰ বাৰ্তা প্ৰদান কৰে। কিন্তু তেওঁ কিয় এনে সিদ্ধান্ত ল’লে?
নিজৰ এক্স হেণ্ডেলত এটা পোষ্টত ৰাহানে কয় যে নতুন কোনোবা এজনক অধিনায়ক হিচাপে গঢ়ি তোলাৰ এইটো সঠিক সময়। তেওঁ লিখিছে, ‘মুম্বাইক নেতৃত্ব দি এই দলৰ বাবে ট্ৰফী লাভ কৰাটো এক গৌৰৱৰ কথা। ঘৰুৱা ক্ৰিকেটৰ নতুন ছিজন আৰম্ভ হ’ব। মই ভাবো নতুন কোনোবা এজনক অধিনায়ক হিচাপে গঢ়ি তোলাৰ এইটোৱে উপযুক্ত সময়। গতিকে মই এই পদৰ পৰা আঁতৰিছো। অহা ছিজনত মুম্বাইক ট্ৰফী জয় কৰাত সহায় কৰিবলৈ ক্ৰিকেটাৰ হিচাপে মোৰ শ্ৰেষ্ঠখিনি দিবলৈ সাজু।’
৭ বছৰীয়া শূন্যতাৰ অন্তত ২০২২-২৩ চনত ৰাহানে মুম্বাইক ৰঞ্জী ট্ৰফী জয়ত নেতৃত্ব দিছিল। তদুপৰি ২০২২-২৩ ছিজনত মুম্বাইয়ে চৈয়দ মুস্তাক আলী ট্ৰফী আৰু দুলীপ ট্ৰফীতো জয় লাভ কৰে। ২০২৪ চনত তেওঁৰ নেতৃত্বত মুম্বাইয়ে ইৰানী কাপতো জয়লাভ কৰিছিল।
অৱশ্যে শেহতীয়াকৈ ৰাহানেৰ ফৰ্ম ভাল হৈ থকা নাই। আই পি এলত কলকাতা নাইট ৰাইডাৰ্ছৰ অধিনায়ক হিচাপেও তেওঁ ব্যৰ্থ হৈছে। তেওঁৰ দল নিৰ্বাচন আৰু বিভিন্ন মেচ কৌশল সন্দৰ্ভত প্ৰশ্ন উত্থাপন হৈছে। বেটিঙত ১৩খন মেচত ৩৯০ ৰান সংগ্ৰহ কৰিছে। এইবাৰ মুম্বাই নেতৃত্ব ত্যাগ কৰাৰ পিছত বিশেষজ্ঞসকলৰ মতে কেকেআৰে ৰাহানেকো অধিনায়কৰ পদৰ পৰা আঁতৰাব পাৰে।
আগন্তুক দুলীপ ট্ৰফীৰ বাবেও ৰাহানেক পশ্চিম মণ্ডলৰ দলৰ পৰা আঁতৰাই ৰখা হৈছে। শাৰ্দুল ঠাকুৰক অধিনায়কত্ব দিয়া হৈছে। ১৭ বছৰীয়া আয়ুষ মাত্ৰেক বুচি বাবু টুৰ্ণামেন্টত মুম্বাইৰ অধিনায়ক হিচাপে নিযুক্তি দিয়া হৈছে। অৱশ্যে ঘৰুৱা ক্ৰিকেটত মুম্বাইক নেতৃত্ব দিয়াৰ দৌৰত আছে শ্ৰেয়াছ আয়াৰ আৰু সূৰ্যকুমাৰ যাদৱ। আলোচনাত শ্বাৰ্দুলৰ নামো আহি আছে।
