নেৰানেপেৰা ধাৰাসাৰ বৰষুণে বিপদ বৃদ্ধি কৰিছে। এদিনতে হোৱা ধাৰাসাৰ বৰষুণৰ ফলত ভূমিস্খলন হোৱাৰ বিপৰীতে টাৱাই আৰু চন্দ্ৰভাগাৰ পানীও বিপদসীমাৰ ওপৰেৰে বৈ আছে। বুধবাৰে ধাৰাসাৰ বৰষুণৰ বাবে জম্মু-কাশ্মীৰৰ কাটৰাৰ অৰ্ধাকুমাৰীৰ সমীপৰ মাতা বৈষ্ণো দেৱীৰ পথত ভয়ংকৰ ভূমিস্খলন সংঘটিত হয়। বৈষ্ণো দেৱী যাত্ৰা স্থগিত ৰখা হৈছে।
ভূমিস্খলনত ৩১ জন লোকৰ মৃত্যু হোৱাৰ লগতে ২৩ জন আহত হোৱাৰ খবৰ পোৱা গৈছে। বহু লোক ধ্বংসাৱশেষত আবদ্ধ হৈ পৰাৰ আশংকা কৰা হৈছে। ভূমিস্খলনৰ খবৰ পোৱাৰ লগে লগে উদ্ধাৰকাৰী দলে সেই স্থানত উপস্থিত হয়। উদ্ধাৰৰ কাম চলি আছে। কাটৰা ঘাইপথ সম্পূৰ্ণৰূপে বন্ধ।
উল্লেখযোগ্য যে মঙলবাৰে বিয়লি মন্দিৰলৈ যোৱাৰ পথত পুনৰ ভূমিস্খলনত ৯ জন লোকৰ মৃত্যু হোৱাৰ লগতে ২১ জন লোক আহত হোৱাৰ খবৰ পোৱা গৈছিল।
অবিৰত বৰষুণৰ ফলত সমগ্ৰ জম্মু-কাশ্মীৰ বিধ্বস্ত হৈ পৰিছে। জম্মুত এখন দলং ভাঙি পৰিঠে। বিদ্যুৎ পৰিবাহী তাঁৰ আৰু ভ্ৰাম্যমাণ টাৱাৰৰো যথেষ্ট ক্ষতিসাধন হৈছে। ফলত যোগাযোগ ব্যৱস্থাও ব্যাহত হৈছে। মুখ্যমন্ত্ৰী ওমৰ আব্দুল্লাইও নিজৰ এক্স হেণ্ডেলত এই বিষয়ে অভিযোগ জনাই পোষ্ট কৰে।
মঙলবাৰে পুৱা ১১:৩০ বজাৰ পৰা বিয়লি ৫:৩০ বজালৈ ৬ ঘণ্টাত ২২ চে:মি: বৰষুণ হয় জম্মুত। মাজনিশাৰ পিছত বৰষুণ কমি আহে। জম্মু চহৰত এদিন নৌহওঁতেই ২৫০ মিলিমিটাৰতকৈ অধিক বৰষুণ হৈছে। বতৰ বিজ্ঞান বিভাগে জনাইছে যে আগন্তুক ৪০ ঘণ্টাত জম্মুত আৰু অধিক ধাৰাসাৰ বৰষুণৰ সম্ভাৱনা আছে।
মঙলবাৰলৈকে ধাৰাবাহিকভাৱে হোৱা বৰষুণৰ বাবে কেইবাটাও অঞ্চলত নদীৰ পানী উফন্দি উঠাৰ ফলত বান পৰিস্থিতিৰ সৃষ্টি হয়। প্ৰশাসনিক সূত্ৰ অনুসৰি ৩৫০০ৰো অধিক লোকক নিৰাপদ স্থানলৈ স্থানান্তৰ কৰা হৈছে। জম্মু-কাশ্মীৰ আৰক্ষী, এন ডি আৰ এফ, এছ ডি আৰ এফ, ভাৰতীয় সেনা, জিলা প্ৰশাসন আৰু স্থানীয় স্বেচ্ছাসেৱকৰ যৌথ বাহিনীয়ে উদ্ধাৰ অভিযান চলাই আছে।
ধাৰাসাৰ বৰষুণৰ ফলত ৰে’ল সেৱা ব্যাহত হৈ পৰিছে। জম্মু-কাটৰা ৰে’ল লাইনত বাতিল কৰা হৈছে ২২খন ৰে’ল। এনে দুৰ্যোগৰ বাবে ওমৰ আব্দুল্লা চৰকাৰে সকলো বিদ্যালয়-মহাবিদ্যালয় বন্ধ কৰাৰ সিদ্ধান্ত লৈছে।
আজিও জম্মু আৰু ইয়াৰ আশে-পাশে থকা অঞ্চলত প্ৰবল বৰষুণ আৰু শিলাবৃষ্টি হোৱাৰ সম্ভাৱনা আছে। আটাইতকৈ ক্ষতিগ্ৰস্ত অঞ্চলসমূহ হৈছে জম্মু চহৰ, আৰ এছ পুৰা, চাম্বা, আখনূৰ, নগ্ৰোটা, কোট ভালৱাল, বিষনাহ, বিজয়পুৰ, পুৰমণ্ডল আৰু কথুৱা আৰু উধামপুৰৰ কিছু অংশ।
ৰিয়াছি, ৰামবন, ডোডা, বিলাৱাৰ, কাটৰা, ৰামনগৰ, হিৰানগৰ, গুল, বনিহাল আৰু সাম্বা আৰু কঠুৱা জিলাৰ নিকটৱৰ্তী অঞ্চলতো মধ্যমীয়া বৰষুণ হৈছে। দক্ষিণ কাশ্মীৰৰ ঝিলুম নদীৰ জলপৃষ্ঠ ২২ ফুটলৈ বৃদ্ধি। পানীৰ জলপৃষ্ঠই বিপদৰ চিন অতিক্ৰম কৰাৰ লগে লগে জাৰি কৰা হৈছে বানপানীৰ সতৰ্কতা।
