ইউক্ৰেইনৰ ৰাষ্ট্ৰপতি ভ’ল’ডিমাইৰ জেলেনস্কিয়ে বৃহস্পতিবাৰে ইউৰোপৰ কেইবাজনো নেতাক কয় যে ৰাছিয়াৰ সৈতে শান্তি স্থাপনৰ পৰিকল্পনাৰ অংশ হিচাপে তেওঁৰ দেশৰ কি কি নিৰাপত্তাৰ নিশ্চয়তা থাকিব সেয়া এতিয়া অতি গুৰুত্বপূৰ্ণ, কিয়নো যুদ্ধখন চাৰে তিনি বছৰ ধৰি চলি আছে।
পোলেণ্ডত ইউৰোপীয় নেতাসকলৰ ভাৰ্চুৱেল বৈঠকত জেলেনস্কিয়ে এই আহ্বান জনায়। ইয়াত পোলেণ্ডৰ ৰাষ্ট্ৰপতি কেৰল নাভ্ৰটস্কি আৰু ইষ্ট’নিয়া, লাটভিয়া, লিথুৱেনিয়া আৰু ডেনমাৰ্কৰ নেতাসকলে অংশগ্ৰহণ কৰে। স্থানীয় বিষয়াসকলে জনোৱা মতে, বৈঠকৰ ঠিক পূৰ্বে বুধবাৰে নিশা ইউক্ৰেইনৰ ৰাজধানী কিয়েভত ৰাছিয়াৰ আক্ৰমণত কমেও ২২ জন লোক নিহত হয়।
জেলেনস্কিয়ে কয় যে বৈঠকত অংশগ্ৰহণ কৰা নেতাসকলে ৰাছিয়াৰ ওপৰত হেঁচা বৃদ্ধিৰ ক্ষেত্ৰত এক উমৈহতীয়া স্থিতিত উপনীত হৈছে। ইউক্ৰেইন-ৰাছিয়াৰ সংঘাত নিৰাময়ৰ বাবে কূটনৈতিক আলোচনা চলি থকাৰ পূৰ্বে এইটো এক গুৰুত্বপূৰ্ণ সমন্বয়। প্ৰসংগক্ৰমে ২০২২ চনৰ ফেব্ৰুৱাৰী মাহত ৰাছিয়াই ইউক্ৰেইনত যুদ্ধ আৰম্ভ কৰিছিল।
বৈঠকত জেলেনস্কিৰ মন্তব্য তেওঁৰ ৰাষ্ট্ৰপতিৰ ৱেবছাইটত প্ৰকাশ পাইছে। জেলেনস্কিয়ে কয় যে ইউক্ৰেইনৰ মতে ক্ৰেমলিনৰ নেতা ভ্লাদিমিৰ পুটিনে এতিয়াও যুদ্ধ অব্যাহত ৰখাৰ বাহিৰে আন একোৰে প্ৰতি আগ্ৰহী নহয়।
ইউক্ৰেইনৰ ৰাষ্ট্ৰপতিগৰাকীয়ে কয় যে ইউক্ৰেইনক নিৰাপত্তাৰ নিশ্চয়তাৰ বাবে এক সুদৃঢ় ভেটিৰ প্ৰয়োজন। আমেৰিকাৰ ৰাষ্ট্ৰপতি ড’নাল্ড ট্ৰাম্পে এই কথাত একমত আৰু বিষয়টো এসপ্তাহ ধৰি চৰ্চা চলি আছে। একে সময়তে পুটিনৰ ওপৰত অধিক হেঁচা প্ৰয়োগ কৰাটো প্ৰয়োজন – যিটো কথাত ইউক্ৰেইন আৰু ইউৰোপৰ নেতাসকলো একমত।
জেলেনস্কিয়ে কয়, “যেতিয়া আমি নিৰাপত্তাৰ নিশ্চয়তাৰ কথা কওঁ, তেতিয়া আমাক স্পষ্ট উত্তৰৰ প্ৰয়োজন – যদি ৰাছিয়াই পুনৰ আক্ৰমণ কৰে তেন্তে স্থল, আকাশ আৰু সাগৰত আমাক ৰক্ষা কৰিবলৈ কোন আগবাঢ়ি আহিব, আৰু কেনেকৈ? অনুগ্ৰহ কৰি আপোনালোকৰ ভূমিকা স্পষ্ট কৰক।”
জেলেনস্কিয়ে কয় যে এতিয়া গুৰুত্বপূৰ্ণ হ’ল ৰাষ্ট্ৰপতি ট্ৰাম্পৰ যাতে দেখা পায় যে বাবে আমি ইউৰোপীয়সকলে যুদ্ধৰ অন্ত পেলাবলৈ একেলগে কাম কৰিছো।
ট্ৰাম্পে পুটিন আৰু জেলেনস্কিৰ মাজত বৈঠকৰ ব্যৱস্থা কৰিবলৈ চেষ্টা কৰিছে। তেওঁ কয় যে যদিহে সংঘাত সমাধানৰ ক্ষেত্ৰত কোনো অগ্ৰগতি নহয় তেন্তে মস্কোৰ ওপৰত নতুন নিষেধাজ্ঞা আৰোপ কৰা হ’ব পাৰে। শেহতীয়াকৈ কিয়েভত ৰাছিয়াই কৰা আক্ৰমণত ৰাষ্ট্ৰপতিগৰাকী “সন্তুষ্ট নহয়” বুলি হোৱাইট হাউছে জনাইছে।
জেলেনস্কিয়ে দীৰ্ঘদিন ধৰি ট্ৰাম্পৰ প্ৰস্তাৱিত বৈঠক (জেলেনস্কি-পুটিন)ক সমৰ্থন কৰি আহিছে আৰু ইউৰোপীয় নেতাসকলে যুদ্ধবিৰতিৰ আহ্বানকো সমৰ্থন কৰি আহিছে যাতে ৰাছিয়াৰ সৈতে আলোচনা আৰম্ভ হ’ব পাৰে।
শুকুৰবাৰে নিউয়ৰ্কত ট্ৰাম্প প্ৰশাসনৰ প্ৰতিনিধিৰ সৈতে ইউক্ৰেইনৰ জ্যেষ্ঠ বিষয়াসকলে বৈঠকত মিলিত হোৱাৰ কথা আছে।
