উত্তৰাখণ্ডত হোৱা ধাৰাসাৰ বৰষুণৰ বাবে ৰুদ্ৰপ্ৰয়াগ আৰু চামোলী জিলাত ভূমিস্খলনৰ ঘটনা সংঘটিত হৈছে। প্ৰশাসনে কয় যে ক্ষতিগ্ৰস্ত অঞ্চলসমূহত যুদ্ধকালীন উদ্ধাৰ অভিযান চলি আছে।
ৰুদ্ৰপ্ৰয়াগ জিলা প্ৰশাসনৰ তথ্য অনুসৰি নিশাৰ মুষলধাৰ বৰষুণৰ ফলত জিলাখনৰ বাসুকেদাৰ অঞ্চলৰ বহু ঠাই ক্ষতিগ্ৰস্ত হৈছে। তালজামান অঞ্চলত ৪ৰ পৰা ৫টা ঘৰৰ আংশিক ক্ষতি হোৱাটো নিশ্চিত। ক্ষতিগ্ৰস্ত পৰিয়ালক নিকটৱৰ্তী প্ৰাথমিক বিদ্যালয়লৈ স্থানান্তৰ কৰা হৈছে।
একে সময়তে চেনাগাধ অঞ্চলত ৮ জন লোক ধ্বংসাৱশেষৰ তলত পোত যোৱাৰ আশংকা কৰা হৈছে। SDRF, DDRF আৰু স্থানীয় প্ৰশাসনৰ দল উপস্থিত হৈ উদ্ধাৰ অভিযান চলাই আছে। আনহাতে জাখোলি অঞ্চলত এগৰাকী মহিলাৰ মৃত্যু হৈছে।
চামোলী জিলাৰ দেৱাল ব্লকত বৃহস্পতিবাৰে নিশা ভূমিস্খলনৰ ফলত এটা আৱাসগৃহ ভাঙি পৰে। উপ-জিলা দণ্ডাধীশ পংকজ কুমাৰ ভাটে কয়, “দুজন লোক নিৰুদ্দেশ, দুজন আহত আৰু ১৫ৰ পৰা ২০টা গৰু ধ্বংসাৱশেষৰ তলত আবদ্ধ হোৱাৰ আশংকা কৰা হৈছে।”
উত্তৰাখণ্ডৰ মুখ্যমন্ত্ৰী পুষ্কৰ সিং ধামীয়ে টুইটাৰত লিখিছে যে তেওঁ দুৰ্যোগ ব্যৱস্থাপনা সন্দৰ্ভত এখন জৰুৰী বৈঠক অনুষ্ঠিত কৰিছে য‘ত “চামোলি জিলাৰ ৰুদ্ৰপ্ৰয়াগৰ তহচিল বাছুকেদাৰ অঞ্চলৰ বাদেথ ডুংগাৰ টক আৰু তেহৰিৰ বাগেশ্বৰ নৈনিতালত হোৱা প্ৰচণ্ড বৰষুণৰ ফলত উদ্ভৱ হোৱা পৰিস্থিতিৰ পৰ্যালোচনা কৰা হৈছে।”তেওঁ লিখিছে যে বিষয়াসকলক যুদ্ধকালীন সাহায্য আৰু উদ্ধাৰৰ কাম কৰিবলৈ নিৰ্দেশ দিয়া হৈছে।
