পশ্চিম কাৰ্বি আংলং জিলাৰ চিংথং পৰিষদ সমষ্টিৰ অন্তৰ্গত লাংছাংপি হান্সে গাঁৱত চিকিৎসা সেৱাৰ অভাৱ আৰু যোগাযোগ ব্যৱস্থাৰ দুৰৱস্থাই গাঁওবাসীক চৰম যন্ত্ৰণাত পেলাইছে। গাঁওখনৰ বাসিন্দাসকলে ৰোগীসকলক কাপোৰ আৰু বাঁহৰ সহায়ত নিৰ্মিত অস্থায়ী ভাৰত কান্ধত তুলি চিকিৎসালয়লৈ নিবলগীয়া হয়, যিটো গাঁওখনৰ পৰা ১৫ কিলোমিটাৰতকৈও অধিক দূৰত অৱস্থিত।
ৰাজ্য চৰকাৰে সকলো ফালে উন্নয়নৰ দাবী কৰিলেও এই গাঁওখনত উন্নয়নৰ পোহৰ এতিয়াও নপৰা বুলি অভিযোগ উত্থাপন কৰিছে স্থানীয় লোকে। মুখ্যমন্ত্ৰীয়ে অসমক দেশৰ পাঁচখন উন্নত ৰাজ্যৰ তালিকাত অন্তৰ্ভুক্ত কৰাৰ সপোন দেখিলেও সাধাৰণ ৰাইজে চিকিৎসা সেৱাৰ বাবে হাহাকাৰ কৰিবলগীয়া হৈছে। এনে পৰিস্থিতিত গাঁওবাসীয়ে যমৰ যাতনা ভোগ কৰিবলগীয়া হৈছে বুলি জানিবলৈ দিছে স্থানীয়সকলে।
গাঁওখনৰ যোগাযোগ ব্যৱস্থা অতি দুৰ্বল। আছে মাত্ৰ এটা হাবিতলীয়া লংলুঙীয়া বাট, আৰু গাঁওখনক সংযোগ কৰা কোনো সুৰক্ষিত পথ নাই। উন্নয়নৰ দিশত গাঁওখন সম্পূৰ্ণ পিছপৰি থকা বুলি অভিযোগ কৰিছে বাসিন্দাসকলে। স্বাস্থ্য সেৱাকে ধৰি অন্যান্য উন্নয়নমূলক কাম-কাজ এতিয়াও গাঁওখনত আৰম্ভ হোৱা নাই, যাৰ ফলত এনে দুৰ্দশাৰ সন্মুখীন হ’বলগীয়া হৈছে গাঁওবাসীয়ে।
এই পৰিপ্ৰেক্ষিতত লাংছাংপি হান্সে গাঁৱৰ বাসিন্দাসকলে কাৰ্বি আংলং স্বায়ত্তশাসিত পৰিষদ (কেএএচিচি)ৰ মুখ্য কাৰ্যবাহী সদস্য তুলীৰাম ৰংহাং আৰু উপ-সভাপতি অভিজিৎ ক্ৰ’কক উন্নত যোগাযোগ ব্যৱস্থা আৰু অন্যান্য উন্নয়নৰ কাম-কাজ কৰিবলৈ দাবী জনাইছে। গাঁওখনৰ স্বাস্থ্য সেৱা, ৰাস্তা-ঘাট আদি সমস্যাসমূহ অতি সোনকালে সমাধান কৰাৰ বাবে দাবী কৰিছে গাঁওবাসীয়ে। পূৰ্বেও এই বিষয়ত জনপ্ৰতিনিধিসকলক অৱগত কৰা হৈছিল বুলি জানিবলৈ দিছে তেওঁলোকে।
গাঁওবাসীৰ মূল দাবীসমূহ হৈছে যোগাযোগ ব্যৱস্থাৰ উন্নতি, চিকিৎসা সেৱাৰ উন্নয়ন আৰু গাঁওবাসীৰ জীৱন উন্নত কৰিবলৈ প্ৰয়োজনীয় সকলো পদক্ষেপ গ্ৰহণ কৰা। এনে সমস্যাসমূহৰ সমাধান নোহোৱালৈ গাঁওবাসীৰ দুৰ্দশা অব্যাহত থাকিব বুলি আশংকা প্ৰকাশ কৰিছে স্থানীয় লোকে।
