প্ৰযোজক, পৰিচালক আৰু চিনেমাট’গ্ৰাফাৰ প্ৰেম সাগৰৰ দেওবাৰে পুৱা মুম্বাইৰ জুহুৰ নিজ গৃহত মৃত্যু হয়।
মৃত্যুৰ সময়ত তেওঁৰ বয়স আছিল ৮১ বছৰ। দীৰ্ঘদিন ধৰি তেওঁ বয়সৰ লগত জড়িত ৰোগত আক্ৰান্ত হৈ আছিল।
ৰামানন্দ সাগৰৰ পুত্ৰ প্ৰেম সাগৰৰ এগৰাকী ঘনিষ্ঠ সহযোগীয়ে সংবাদ মাধ্যমক জনাইছে যে তেওঁৰ স্বাস্থ্য দীৰ্ঘদিন ধৰি বেয়া হৈ আছিল আৰু যোৱা এমাহ ধৰি তেওঁক দক্ষিণ মুম্বাইৰ ব্ৰিচ কেণ্ডি হাস্পতালত চিকিত্ত্সাধীন হৈ আছিল।
শেহতীয়াকৈ তেওঁৰ পেটৰ অস্ত্ৰোপচাৰ কৰা হৈছিল আৰু শনিবাৰে চিকিৎসালয়ৰ পৰা যাবলৈ দিয়াৰ পিছত তেওঁক ঘৰলৈ অনা হৈছিল।
১৯৬৮ চনত এফ টি আই আইৰ পৰা উত্তীৰ্ণ হোৱাৰ পিছত প্ৰেম সাগৰে ১৯৭০ চনত পিতৃৰ ছবি লালকাৰৰ জৰিয়তে চিনেমাট’গ্ৰাফাৰ হিচাপে নিজৰ কেৰিয়াৰ আৰম্ভ কৰে। পিছলৈ তেওঁ সাগৰ আৰ্টছ নামৰ পাৰিবাৰিক বেনাৰত বহু ছবি আৰু টিভি ধাৰাবাহিকত নিজৰ ভূমিকা পালন কৰে।
ইয়াৰ ভিতৰত ১৯৮৭ চনৰ বিখ্যাত ধাৰাবাহিক ৰামায়ণ। তেওঁ আলিফ লাইলা, কাকভুশুন্দি ৰামায়ণ, জয় জয় শিৱ শংকৰ, আৰ্জু হায় তু আৰু জয় গংগা মাইয়া আদি ধাৰাবাহিক নিৰ্মাণ কৰিছিল।
৮০ৰ দশকত দূৰদৰ্শনত প্ৰচাৰিত জনপ্ৰিয় ধাৰাবাহিক ‘বিক্ৰম ঔৰ বেটাল’ৰ প্ৰযোজনা আৰু পৰিচালনাও তেৱেই কৰিছিল।
চিনেমাট’গ্ৰাফী আৰু চলচ্চিত্ৰৰ লগতে তেওঁ এজন উৎকৃষ্ট স্থিৰ ফটোগ্ৰাফাৰ আছিল আৰু গ্ৰেট ব্রিটেইনৰ ৰয়েল ফটোগ্রাফিক ছ’চাইটিয়ে তেওঁক সন্মান জনাইছিল৷
এটা যুগৰ অন্ত! ৰামানন্দ সাগৰৰ পুত্ৰ তথা প্ৰযোজক-পৰিচালক প্ৰেম সাগৰৰ মৃত্যু
