ইয়াৰ পূৰ্বে ষ্টেট বেংক আৰু বেংক অৱ ইণ্ডিয়াই ঋণগ্ৰস্ত ৰিলায়েন্স কমিউনিকেশ্যনৰ প্ৰাক্তন অধ্যক্ষ অনিল আম্বানীক ‘প্ৰৱঞ্চক’ বুলি অভিহিত কৰিছিল। এতিয়া বেংক অৱ বৰোদাইও সেই পথ অনুসৰণ কৰিছে।
দেশখনৰ অন্যতম সৰ্ববৃহৎ ৰাষ্ট্ৰীয়কৃত বেংকটোৱে এতিয়া একেলগে ৰিলায়েন্স কমিউনিকেশ্যন আৰু অনিল আম্বানীৰ সকলো ঋণ একাউণ্টক ফ্ৰড বা ‘প্ৰৱঞ্চক’ হিচাপে চিহ্নিত কৰিছে। এই বিষয়ে বৃহস্পতিবাৰে বেংক অৱ বৰোডাই শ্বেয়াৰ বজাৰকো অৱগত কৰে।
ষ্টেট বেংকে পূৰ্বে প্ৰকাশ কৰিছিল যে ৰিলায়েন্স কমিউনিকেশ্যন আৰু ইয়াৰ সহযোগী কোম্পানীসমূহে বিভিন্ন বেংকৰ পৰা ৩১,৫৮০ কোটি টকাৰ ঋণ লৈছিল। এই ধন ঋণৰ চৰ্ত উলংঘা কৰি ‘জটিল’ পদ্ধতিৰে গ্ৰপটোৰ বিভিন্ন কোম্পানীলৈ প্ৰেৰণ কৰা হৈছিল। পিছত বেংক অৱ ইণ্ডিয়াই ৰিলায়েন্সৰ অধ্যক্ষৰ পৰা ৭২৪.৭৮ কোটি টকা লাভ কৰা বুলি জানিবলৈ দিয়ে।
কিন্তু বেংক অৱ বৰোদাৰ ঋণৰ পৰিমাণ ৰাজহুৱা কৰা হোৱা নাই। ইটোৰ পিছত সিটো বেংকে প্ৰৱঞ্চক ঘোষণা কৰাৰ লগে লগে ৰিলায়েন্স কমিউনিকেশ্যন আৰু আম্বানীৰ ওপৰত চাপ বাঢ়িছে। অৱশ্যে ৰিলায়েন্স কমিউনিকেশ্যন আৰু অনিল আম্বানিৰ মালিকানাধীন নহয়। এতিয়া ইয়াৰ সম্পত্তি জব্দ কৰি ঋণৰ ধন আদায়ৰ প্ৰচেষ্টা চলোৱা হৈছে।
ইতিমধ্যে অনিল আম্বানীৰ কোম্পানীয়ে নিজকে দেউলীয়া ঘোষণা কৰিছে। মুঠ ১৭ হাজাৰ কোটি টকা আত্মসাৎ কৰাৰ অভিযোগ অনিলৰ বিৰুদ্ধে। ৰিলায়েন্স কমিউনিকেশ্যনৰ প্ৰাক্তন মুৰব্বীগৰাকী কাৰ্যতঃ ডিঙিলৈকে ঋণত পোত গৈছে। তেওঁ নিজৰ সম্পত্তি বিক্ৰী কৰি পাওনাদাৰৰ ঋণ পৰিশোধ কৰিবলৈও চেষ্টা কৰিছে। কিন্তু তাৰ পিছতো অনিলৰ সমস্যা কমা নাই।
চিবিআইৰ সূত্ৰ অনুসৰি বেংকসমূহে অনুভৱ কৰে যে তেওঁলোকে দিয়া ঋণৰ সঠিক ব্যৱহাৰ কৰা নাছিল ৰিলায়েন্সে। টকা অপচয় হৈছে। সেইবাবেই ৰিলায়েন্স কমিউনিকেশ্যন দেউলীয়া হৈছে। প্ৰকৃততে কোনো ধৰণৰ আত্মসাৎ হৈছে নে নাই সেয়া নিশ্চিত কৰিবলৈ চিবিআইয়ে প্ৰমাণ সংগ্ৰহৰ চেষ্টা চলাইছে।
ইয়াৰ পূৰ্বে ২০২৩ চনত ইডিয়ে অনিলক তলব কৰিছিল। তেওঁ দীঘলীয়া জেৰাৰ সন্মুখীন হ’বলগীয়া হৈছিল। তাৰো পূৰ্বে ইডিয়ে ২০২০ চনত এবাৰ অনিল আম্বানীক চমন কৰিছিল। য়েছ বেংকৰ ঋণৰ গোচৰত তেওঁৰ নাম জড়িত আছিল।
