আমেৰিকাৰ ৰাষ্ট্ৰপতি ড’নাল্ড ট্ৰাম্পে গুগল, এপল, মাইক্ৰ’ছফ্ট আদি কোম্পানীসমূহৰ শীৰ্ষ কাৰ্যবাহীসকলক নৈশ আহাৰ গ্ৰহণ কৰিবলৈ আমন্ত্ৰণ জনাইছিল। মেটাৰ প্ৰতিষ্ঠাপক মাৰ্ক জুকাৰবাৰ্গকো আনসকলৰ সৈতে হোৱাইট হাউছত অনুষ্ঠিত হোৱা নৈশ আহাৰ গ্ৰহণলৈ আমন্ত্ৰণ জনোৱা হৈছিল।
তাতেই ট্ৰাম্পে জুকাৰবাৰ্গক ৰাজনৈতিক কেৰিয়াৰ আৰম্ভ কৰাৰ প্ৰস্তাৱ দিয়ে। আৰু আমেৰিকাৰ ৰাষ্ট্ৰপতিয়ে প্ৰশ্নটো সোধাৰ লগে লগে তেওঁৰ উত্তৰ পালে। মাৰ্ক জুকাৰবাৰ্গে মুখৰ ওপৰতে ‘না’ বুলি কৈ দিলে।
বৃহস্পতিবাৰে নিশা ড’নাল্ড ট্ৰাম্প আৰু দেশখনৰ ফাৰ্ষ্ট লেডী মেলানিয়া ট্ৰাম্পে আমেৰিকাৰ শীৰ্ষ টেক মেগনেটসকলক হোৱাইট হাউছত নৈশ আহাৰ গ্ৰহণ কৰিবলৈ আমন্ত্ৰণ জনাইছিল।
আমেৰিকাৰ ৰাষ্ট্ৰপতিৰ কাষত বহি আছিল মেটাৰ চিইঅ’ মাৰ্ক জুকাৰবাৰ্গ। ট্ৰাম্পে তেওঁৰ ৰাজনৈতিক কেৰিয়াৰক লৈ কটাক্ষ কৰে। তেওঁ কেতিয়া ৰাজনীতিত যোগদান কৰিব সেয়াও জানিব বিচাৰে। লগে লগে জুকাৰবাৰ্গে দৃঢ়তাৰে কয় যে তেওঁৰ ৰাজনীতিলৈ অহাৰ বা ৰাজনীতিত যোগদান কৰাৰ কোনো উদ্দেশ্য নাই।
এজন সাংবাদিকে মেটা প্ৰতিষ্ঠাপকগৰাকীক ব্ৰিটেইনৰ বাক স্বাধীনতাৰ অৱস্থাক লৈ চিন্তিত নেকি বুলিও প্ৰশ্ন কৰে। তেওঁ সেই প্ৰশ্নৰ উত্তৰ দিবলৈ সাজু নহয় বুলিও কয়। ইয়াৰ পিছতে ট্ৰাম্পে জুকাৰবাৰ্গক লক্ষ্য কৰি কয় যে এইটোৱেই তেওঁৰ ৰাজনৈতিক কেৰিয়াৰ আৰম্ভ কৰাৰ প্ৰথম পদক্ষেপ। লগে লগে তেওঁক ‘না’ বুলি কৈ দিলে তেওঁ।
উল্লেখ্য যে সেই নৈশ আহাৰত এপলৰ টিম কুক, মাইক্ৰ’ছফ্টৰ বিল গেটছ আৰু সত্য নাডেলা, গুগলৰ সুন্দৰ পিচাই, ওপেন এআইৰ ছেম অল্টমেনো উপস্থিত আছিল। তাত মাৰ্কে কয় যে মেটাই অহা কেইবছৰমানৰ ভিতৰত ৬০০ বিলিয়ন মাৰ্কিন ডলাৰ বিনিয়োগ কৰিবলৈ ওলাইছে। টিম কুকেও একেই কথা কৈছিল। অৱশ্যে গুগলৰ ফালৰ পৰা বিনিয়োগ ২৫০ বিলিয়ন আৰু মাইক্ৰ’ছফ্টৰ বিনিয়োগ বছৰি ৮০ বিলিয়ন ডলাৰ বুলি জানিব দিয়া হয়। অৱশ্যে তাত ইলন মাস্ক নাছিল।
