দেশত নিৰ্মিত পিষ্টল লৈ খেলি থকা অৱস্থাত অসাৱধানতাৰ বাবে মৃত্যু হয় এটি পাঁচ বছৰীয়া শিশুৰ। দেওবাৰে নিশা ৰাজস্থানৰ কোটপুতলী-বেৰুৰ জিলাৰ চিতোলি গাঁৱত সংঘটিত হয় এই ঘটনা।
আৰক্ষীৰ সূত্ৰ অনুসৰি দেবাংশু নামৰ পাঁচ বছৰীয়া ল’ৰাটোৰ ঘৰৰ এটা কোঠাত এটা বাকচত এটা দেশত নিৰ্মিত পিষ্টল ৰখা হৈছিল। দেওবাৰে নিশা ল’ৰাটোৱে পিষ্টলটো বিচাৰি পায়। পিষ্টলটো গুলী ভৰ্তি হৈ আছিল। সেইটো লৈ খেলি থকা অৱস্থাত ভুলবশতঃ ট্ৰিগাৰত হেঁচা পৰি দুৰ্ঘটনাটো সংঘটিত হয়। পিষ্টলৰ পৰা এটা গুলী ওলাই আহি দেবাংশুৰ মূৰত ফুটি ওলাই যায়।
পিষ্টলৰ গুলীৰ শব্দ শুনি পৰিয়ালৰ লোকে ততাতৈয়াকৈ সেই স্থানত উপস্থিত হয়। তেওঁলোকে গৈ শিশুটিক ৰক্তাক্ত অৱস্থাত লুটুৰি পৰি থকা দেখা পায়। লগে লগে স্থানীয় ব্যক্তিগত চিকিৎসালয়লৈ লৈ যোৱা হয় যদিও চিকিৎসকে শিশুটিক মৃত ঘোষণা কৰে।
চিকিৎসালয়ৰ সূত্ৰৰ পৰা তথ্য লাভ কৰাৰ পিছতে বৰাটনগৰ আৰক্ষী থানাৰ আৰক্ষীয়ে শিশুটিৰ ঘৰত উপস্থিত হয়। আৰক্ষীৰ সূত্ৰ অনুসৰি দেবাংশুৰ পিতৃ মুকেশে আগতে এটা প্ৰতিৰক্ষা প্ৰশিক্ষণ শিবিৰ চলাইছিল। সেই শিবিৰটো কেইবছৰমান আগতে বন্ধ হৈ গৈছিল। তেতিয়াৰ পৰাই তেওঁ পত্নীৰ সৈতে বিভিন্ন অনুষ্ঠানত পেছা হিচাপে লোকগীত গাইছিল।
দেবাংশুৰ পিতৃ মুকেশক ঘৰত অবৈধ অস্ত্ৰ ৰখাৰ অভিযোগত গ্ৰেপ্তাৰ কৰা হৈছে বুলি বিৰাটনগৰ থানাৰ আৰক্ষীয়ে জানিবলৈ দিয়ে। মুকেশে ক’ৰ পৰা পিষ্টলটো আনিছিল আৰু কেনেদৰে ঘটনা সংঘটিত হৈছিল সেই বিষয়ে তদন্ত অব্যাহত ৰাখিছে আৰক্ষীয়ে। মৃতদেহটো মৰণোত্তৰ পৰীক্ষাৰ বাবে প্ৰেৰণ কৰা হৈছে।
