অসমত অবৈধ প্ৰব্ৰজনকাৰীৰ সৈতে মোকাবিলা কৰিবলৈ অসম কেবিনেটে ৯ ছেপ্টেম্বৰ, ২০২৫ তাৰিখে ‘ষ্টেণ্ডাৰ্ড অপাৰেটিং প্ৰচিডিউৰ’ (এছ অ’ পি) ত অনুমোদন জনাইছে। ১৯৫০ চনৰ অনুপ্ৰৱেশকাৰী (অসমৰ পৰা বহিষ্কাৰ) আইনৰ ওপৰত ভিত্তি কৰি এই আঁচনিখনে জিলা উপায়ুক্ত (ডি চি) আৰু জ্যেষ্ঠ আৰক্ষী অধীক্ষক (এছ এছ পি)ৰ দৰে বিষয়াসকলক অসমত আইনগতভাৱে থাকিবলৈ অনুমতি নথকা লোকসকলক চিনাক্ত কৰৰি বহিষ্কাৰ কৰাত পথ প্ৰদৰ্শন কৰিব।
যদি কোনো ব্যক্তিক অবৈধ প্ৰব্ৰজনকাৰী বুলি সন্দেহ কৰা হয়, তেন্তে জিলা উপায়ুক্তই তেওঁক ১০ দিনৰ ভিতৰত ভাৰতীয় নাগৰিকত্বৰ প্ৰমাণ দেখুৱাবলৈ নিৰ্দেশ দিব। যদি প্ৰমাণ যথেষ্ট নহয়, তেন্তে ডি চিয়ে লিখিতভাৱে সেই ব্যক্তিক অবৈধ প্ৰব্ৰজনকাৰী বুলি ঘোষণা কৰি, ২৪ ঘণ্টাৰ ভিতৰত নিৰ্দিষ্ট পথেৰে অসমৰ পৰা ওলাই যাবলৈ বহিষ্কাৰৰ আদেশ জাৰি কৰিব। যিসকলক বিদেশী ন্যায়াধিকৰণে ইতিমধ্যে বিদেশী বুলি চিনাক্ত কৰিছে, তেওঁলোকৰ ক্ষেত্ৰত আৰু কোনো পৰীক্ষা নকৰাকৈ ডি চিয়ে পোনপটীয়াকৈ বহিষ্কাৰৰ আদেশ জাৰি কৰিব।
যদি অবৈধ প্ৰব্ৰজনকাৰীয়ে বহিষ্কাৰৰ আদেশৰ পিছতো অসমৰ পৰা ওলাই নাযায়, তেন্তে জিলা উপায়ুক্তই এছ এছ পিৰ সহায়ত তেওঁক হ’ল্ডিং চেণ্টাৰত ৰাখিব পাৰে বা সীমান্তৰক্ষী বাহিনীৰ হাতত গতাই দিব পাৰে। এছ অ’ পিত এইটোও উল্লেখ আছে যে যদি কোনো অবৈধ প্ৰব্ৰজনকাৰীক সীমান্তৰ ওচৰত বা অসমত প্ৰৱেশৰ ১২ ঘণ্টাৰ ভিতৰত ধৰা পৰে, তেন্তে তেওঁক কোনো প্ৰক্ৰিয়াৰ অপেক্ষা নকৰি তৎক্ষণাত বিতাড়িত কৰা হ’ব।
