উত্তৰ-পশ্চিম কংগোত চলিত সপ্তাহত সংঘটিত দুটা পৃথক নাও দুৰ্ঘটনাত কমেও ১৯৩ জন লোকৰ মৃত্যু হোৱাৰ লগতে বহু লোক নিৰুদ্দেশ হোৱা বুলি খবৰ প্ৰকাশ পাইছে।
ইকুৱেটৰ প্ৰদেশত প্ৰায় ১৫০ কিলোমিটাৰ দূৰত্বত বুধবাৰ আৰু বৃহস্পতিবাৰে সংঘটিত হয় এই দুৰ্ঘটনা।
কংগোৰ মানৱ পৰিক্ৰমা মন্ত্ৰালয়ে এক প্ৰতিবেদনত প্ৰকাশ কৰা অনুসৰি বৃহস্পতিবাৰে সন্ধিয়া প্ৰদেশখনৰ লুকোলেলা ভূখণ্ডৰ কংগো নদীৰ কাষত প্ৰায় ৫০০ যাত্ৰীসহ এখন নাও উটি যায়। প্ৰতিবেদনত কোৱা হৈছে এই দুৰ্ঘটনাৰ পিছত ২০৯ জন জীৱিত লোকক উদ্ধাৰ কৰা হৈছে।
ইয়াৰ এদিন পূৰ্বে প্ৰদেশখনৰ বাছাংকুছু ভূখণ্ডত এখন মটৰচালিত নাও উটি যোৱাৰ ফলত কমেও ৮৬ জন লোকৰ মৃত্যু হৈছিল, ইয়াৰে অধিকাংশই ছাত্ৰ বুলি সংবাদ মাধ্যমে প্ৰকাশ কৰিছে।
উল্লেখ্য যে এনে ভ্ৰমণত লাইফ জেকেট বিৰল, আৰু নাও বা জাহাজবোৰত সাধাৰণতে অতিৰিক্ত বোজা থাকে।
বহু নাৱে ৰাতিও যাত্ৰা কৰে, যাৰ ফলত দুৰ্ঘটনাৰ সময়ত উদ্ধাৰৰ প্ৰচেষ্টা জটিল হৈ পৰে আৰু বহু মৃতদেহৰ কোনো হিচাপ প্ৰায়ে নোহোৱা হৈ পৰে।
