শনিবাৰে মণিপুৰৰ চুৰাচান্দপুৰত উপস্থিত হৈছিল প্ৰধানমন্ত্ৰী নৰেন্দ্ৰ মোডী। আৰু তাৰ পিছদিনা অৰ্থাৎ দেওবাৰে কুকি-জোৰ সংখ্যাগৰিষ্ঠতা থকা চুৰাচান্দপুৰ জিলাৰ সদৰ চুৰাচান্দপুৰ চহৰত পুনৰ হিংসাত্মক পৰিস্থিতিৰ সৃষ্টি হয়।
প্ৰধানমন্ত্ৰীৰ ভ্ৰমণৰ বাবে প্ৰস্তুত কৰা সাজসজ্জা ভাঙি পেলোৱাৰ অভিযোগত বৃহস্পতিবাৰে নিশা দুজন লোকক গ্ৰেপ্তাৰ কৰা হৈছিল। দেওবাৰে বিয়লি স্থানীয় ৰাইজে মুক্তিৰ তেওঁলোকৰ দাবীত প্ৰতিবাদ সাব্যস্ত কৰে। এই প্ৰতিবাদে এটা সময়ত হিংসাত্মক ৰূপ লয়
এজন জ্যেষ্ঠ আৰক্ষী বিষয়াই দাবী কৰা মতে, দেওবাৰে বিয়লি প্ৰতিবাদকাৰীয়ে চুৰাচান্দপুৰ থানাত আক্ৰমণৰ চেষ্টা চলাইছিল। উত্তেজিত ৰাইজে কৰ্তব্যৰত আৰ এ এফৰ জোৱানৰ ওপৰতো শিলগুটি নিক্ষেপ কৰে। ইয়াৰ এটা ভিডিঅ’ও ছ’চিয়েল মিডিয়াত ভাইৰেল হৈছে।
আৰক্ষী বিষয়াজনে জনোৱা মতে, উত্তেজিত ৰাইজে যেতিয়া থানাত প্ৰৱেশ কৰিবলৈ চেষ্টা কৰে তেতিয়া আৰক্ষীয়ে লাঠিচালনাৰ আশ্ৰয় লয়।
আৰক্ষী আৰু প্ৰশাসনে প্ৰতিবাদকাৰীসকলক অৱগত কৰে যে আইনী উপায়েৰে লোক দুজনৰ মুক্তি নিশ্চিত কৰিব লাগিব। ইয়াৰ পিছতে প্ৰতিবাদকাৰীৰ অধিবক্তাই চুৰাচান্দপুৰ জিলা আদালতত দুয়োজন ব্যক্তিৰ জামিন বিচাৰি আবেদন জনায়। কৰ্তব্যৰত দণ্ডাধীশে আৱেদন শুনানি গ্ৰহণ কৰি সন্ধিয়ালৈকে দুয়োজনকে জামিন মঞ্জুৰ কৰে। ইয়াৰ পিছতে পৰিস্থিতি শান্ত হয়।
প্ৰধানমন্ত্ৰীৰ ভ্ৰমণৰ পূৰ্বে চুৰাচান্দপুৰক বহু ফ্লেক্স বেনাৰেৰে সজাই তোলা হৈছিল। কিন্তু বৃহস্পতিবাৰে নিশা স্থানীয় একাংশ বাসিন্দাই সেইবোৰ ভাঙি জুই লগাই দিয়ে। আৰক্ষীয়ে তেওঁলোকক ছত্ৰভংগ দিবলৈ চেষ্টা চলাইছিল। ফলত ৰাইজ আৰু আৰক্ষীৰ মাজত সংঘৰ্ষৰ সৃষ্টি হয়। সেই সময়তে গ্ৰেপ্তাৰ কৰা হৈছিল দুজন লোকক।
অৱশ্যে সেই নিশা উত্তেজনা বেছি বিয়পি পৰা নাছিল। কাৰণ, পিছদিনা অৰ্থাৎ শুকুৰবাৰে চুৰাচান্দপুৰ চহৰৰ কেইবাটাও নাগৰিক সংগঠনে সেই লোকসকলৰ কাৰ্যকলাপৰ গৰিহণা দিছিল। প্ৰধানমন্ত্ৰী মোডীৰ ভ্ৰমণৰ পূৰ্বে শান্তিপূৰ্ণ পৰিৱেশ বজাই ৰাখিবলৈ আহ্বান জনাইছিল।
শনিবাৰে প্ৰধানমন্ত্ৰীৰ ভ্ৰমণৰ দিনটোও কোনো ধৰণৰ উত্তেজনা নোহোৱাকৈ পাৰ হৈ গ’ল। কিন্তু পিছদিনা আকৌ শান্তিত ব্যাঘাত জন্মিল।
