ইজৰাইলৰ সেনা বাহিনীয়ে মঙলবাৰৰ পৰা গাজা ষ্ট্ৰিপত তীব্ৰ আক্রমণ আৰম্ভ কৰিআতংকৰ সৃষ্টি কৰিছে। বিমান আৰু স্থল বাহিনীৰ আক্ৰমণত গাজাৰ আকাশ-বতাহ কঁপাই তুলিছে।
স্থানীয় চিকিৎসা সূত্ৰৰ মতে, কেৱল মঙলবাৰে প্ৰায় ৮০ জন লোক নিহত হৈছিল। বুধবাৰে পুনৰ ৩০ জনতকৈ অধিক নিহত হোৱাৰ খবৰ আহিছে। শতাধিক আহতক চিকিৎসালয়ত ভৰ্তি কৰাটো দুঃসাধ্য হৈ পৰিছে।
ইজৰাইলৰ প্ৰতিৰক্ষা মন্ত্ৰীয়ে আক্ৰমণৰ কথা স্বীকাৰ কৰি কয় “পণবন্দীৰ মুক্তি আৰু হামাছৰ পৰাজয় আমাৰ উদ্দেশ্য। প্ৰধানমন্ত্ৰী বেঞ্জামিন নেতানিয়াহুৱে ঘোষণা কৰে যে তেওঁৰ লক্ষ্য হ’ল গাজাত হামাছৰ শেষ দুৰ্গ ধ্বংস কৰা।
উল্লেখ্য যে ইজৰাইলৰ আক্ৰমণত সাধাৰণ পেলেষ্টাইনী লোক নিহত হোৱাৰ অভিযোগ উঠিছে। ৰাষ্ট্ৰসংঘই এই অভিযানক “গণহত্যা” বুলি আখ্যা দি তীব্ৰ গৰিহণা দিছে।
কেৱল গাজা নহয়, ইৰাণ সমৰ্থিত হাউথী গোটোও ইজৰাইলৰ লক্ষ্য বুলি সদৰী কৰিছে। মঙলবাৰে ইজৰাইলৰ সেনাই য়েমেনৰ হোদেইদা বন্দৰত আক্ৰমণ চলায়। মাত্ৰ একেদিনাই ১২টা ক্ষেপণাস্ত্ৰ নিক্ষেপ কৰা হয়। যদিও আক্ৰমণৰ পূৰ্বে স্থানীয় লোকসকলক খালী কৰাৰ নিৰ্দেশ দিয়া হৈছিল।কিন্তু বুধবাৰে নতুন আক্ৰমণৰ খবৰ পোৱা নাই বুলি উল্লেখ কৰিছে।
মঙলবাৰে নিশা গাজাৰ আকাশত বিমান, বোমা আৰু বন্দুকৰ গুলীৰ শব্দই গোটেই চহৰখন কঁপাই তোলে। আতংকিত নাগৰিকসকলে নিজৰ সৰু-বৰ সামগ্ৰী গোটাই সুৰক্ষিত স্থানলৈ পলায়নৰ চেষ্টা কৰে। ইজৰাইলৰ এই ধাৰাবাহিক আক্ৰমণত গাজাৰ পৰিস্থিতি দিনকে দিনে অধিক ভয়ংকৰ হৈ পৰিছে।
