ভাৰতবাসীক এটা সুন্দৰ দেওবাৰ দিয়াৰ প্ৰতিশ্ৰুতি দিছিল। সূৰ্যকুমাৰ যাদৱে নিজৰ সেই কথা ৰাখিলে। বেটেৰে তেওঁ বিশেষ একো কৰিব নোৱাৰিলে। তাৰ বিশেষ প্ৰয়োজনো নাছিল। শুভমন গিল আৰু অভিষেক শৰ্মা, পুনৰ এই দুই তাৰকাৰ হাততে ককাঁল ভাগিল পাকিস্তানৰ। এছিয়া কাপৰ গ্ৰুপ পৰ্যায়তে হওক বা ছুপাৰ ফোৰতে হওক, ছবিখন একেই থাকিল।
ডুবাই ষ্টেডিয়ামত পাকিস্তানৰ বিৰুদ্ধে ৭টা বল বাকী থকা অৱস্থাত ৬ উইকেটত জয়লাভ কৰে ভাৰতে। ছুপাৰ ফোৰত পাকিস্তানক পৰাস্ত কৰি ভাৰতে এইবাৰ এছিয়া কাপত খিতাপ দখলৰ পথ প্ৰায় নিষ্কন্টক কৰিলে।
অৱশ্যে গ্ৰুপ পৰ্যায়ত ছলমান আলী আঘা বাহিনীৰ বেটিঙৰ অৱস্থাৰ পৰা এইবৰা সামান্য উন্নতি ঘটিছে। কিন্তু কুলদীপ যাদৱ আৰু অভিষেক শৰ্মাই যদি কেইবাটাও সহজ কেচ মিছ নকৰিলেহেঁতেন তেন্তে বহু আগতেই পাকিস্তানৰ বেটিং সমাপ্ত হ’লহেঁতেন। তদুপৰি বলিঙত ব্যৰ্থ হয় যশস্প্ৰিত বুমৰাহ।
তথাপিও পাকিস্তানক দেওবাৰে অলপ সাহসী যেন দেখা গৈছিল। ভাৰতীয় অধিনায়কগৰাকীয়ে টছত জয়ী হৈ বলিং কৰাৰ সিদ্ধান্ত লয়। কিন্তু সাহিবজাদা ফাৰহানে আৰম্ভণিৰে পৰা আক্ৰমণাত্মক বেটিং কৰিছিল। মাত্ৰ ৯টা বলত ১৫ ৰান সংগ্ৰহ কৰি পাকিস্তানী বেটিঙৰ বাবে মঞ্চ তৈয়াৰ কৰে ফখৰ জামানে। চলি থকা এছিয়া কাপত এটাও ৰান কৰিব নোৱাৰা আয়ুবে তিনি নম্বৰত নামি ২১ ৰানৰ ইনিংছ খেলিছিল।
যদিও পাকিস্তানী মিডল অৰ্ডাৰৰ কোনোৱেই সেই অৰ্থত ডাঙৰ ৰান কৰা নাছিল, তথাপিও তেওঁলোকে সৰু সৰু কেমিঅ’ খেলি ৰানৰ হাৰ অব্যাহত ৰাখিছিল। ছলমান আঘা (১৭), হুছেইন তালাত (১০), মহম্মদ নৱাজ (২১)ৰ পিছতে ফাহীম আশ্ৰাফে ২০ (২০) ৰান কৰে। আনহাতে, অ’পেনাৰ ফাৰহানে ৪৫টা বলত ৫৮ ৰান সংগ্ৰহ কৰে। দলটোৰ সমন্বিত প্ৰচেষ্টাত পাকিস্তানৰ স্ক’ৰ ১৭১ লৈ বৃদ্ধি পায়।
শেহতীয়াকৈ ভাৰত-পাকিস্তানৰ খেলখন ইমানেই একপক্ষীয় যে এই ৰানটোও যুঁজৰ বাবে পৰ্যাপ্ত যেন লাগিব পাৰে। ভাৰতৰ বেটিঙৰ প্ৰথমটো বলত অভিষেকে স্পষ্ট কৰি দিলে যে সেয়া একেবাৰেই নহয়। শ্বাহীন শ্বাহ আফ্ৰিদিৰ প্ৰথমটো বল দৰ্শকৰ মাজলৈ সোমাই গ’ল। তেতিয়াৰ পৰাই বেছিভাগ বলত সেইটোৱেই লিখা থাকিল। কোনোবাটা চাৰি, কোনোবাটো ছয়। কেতিয়াবা অভিষেক, কেতিয়াবা শুভমন গিল।
প্ৰথমে কোনে অৰ্ধশতক অৰ্জন কৰিব সেয়া যেন দুয়ো বন্ধুৰ মাজত প্ৰতিযোগিতা আৰম্ভ হৈছিল। অৱশ্যে তাত অভিষেকেই জিকিছিল। গিল ৪৭ ৰানত আউট হৈছিল। কিন্তু তেতিয়ালৈকে পাকিস্তানৰ বলাৰসকল দিশহাৰা হৈ পৰিছিল। এই যুটিৰ পাৰ্টনাৰশ্বিপ আছিল ১০৫ ৰান। এসময়ত হেৰিছ ৰাউফহঁতক শাসন কৰিছিল ‘কিং’ কোহলীয়ে, বৰ্তমান কৰে ‘প্ৰিন্স’ গিলে।
গিল আউট হোৱাৰ পিছত সূৰ্য্যও সোনকালে উভতি যায়। অলপ বেছি সময় খেলিব পাৰিলেহেঁতেন। কিন্তু তেওঁ ৰানৰ গতি লেহেমীয়া কৰিব বিচৰা নাছিল। অভিষেকেও একে পদ্ধতি অনুসৰণ কৰি আউট হৈ আহিল। ত্ৰয়োদশ অভাৰত আব্ৰাৰৰ পৰৱৰ্তী বলটোৱে ছয় মাৰিলেও তেওঁ শান্ত নহ’ল। অৱশ্যে এইবাৰ তেওঁ গুগলীটো ভালদৰে ধৰিব নোৱাৰিলে। ৭৪ ৰানৰ মূৰত হেৰিছ ৰাউফৰ হাতত কেচ তুলি দিয়ে।
ভাৰতে কেইবাটাও কেচ মিছ কৰিছিল যদিও পাকিস্তানে তেনে কৰা নাছিল। অৱশ্যে অভিষেক ঘূৰি অহাৰ সময়ত ভাৰতৰ জয়ৰ বাবে মাত্ৰ ৪৬ ৰান বাকী আছিল। ওমান মেচখনৰ নায়ক সঞ্জু চেমছন ১৩ ৰানত আউট হৈছিল। বাকী কাম শেষ কৰিলে হাৰ্দিক পাণ্ডিয়া আৰু তিলক ভাৰ্মাই। শেষত টিম ইণ্ডিয়াই ৬ উইকেটত জয়লাভ কৰে।
পাকিস্তানক পৰাস্ত কৰিবলৈ বিশেষ কষ্ট নাপালেও দুটা কথাই ভাৰতক চিন্তিত কৰিব। প্ৰথমতে মিছড কেচ, দ্বিতীয়তে মিডল অৰ্ডাৰৰ সেই পুৰণি বেমাৰ। যদি তেওঁলোকে সেইটো ঠিক কৰিব পাৰে তেন্তে অপ্ৰতিৰোধ্য হৈ পৰিব সূৰ্য বাহিনী।
সংক্ষিপ্ত স্কোৰঃ
পাকিস্তানঃ ১৭১/৫ (সাহিবজাদা ৫৮, শিৱম ৩৩/২, কুলদীপ ৩১/১)
ভাৰতঃ ১৭৪/৪ (অভিষেক ৭৪, শুভমন ৪৭, হেৰিছ ২৬/২)
ভাৰতে ৬ উইকেটত জয়লাভ কৰে।
